2 SAMUEL 20 - Dios Rimashca Shimicunami

Seba runa mana allita ruranata yuyarishcami

¹ Chaipica cashnami tucurca: Benjamín aillumanta caj Bicri runapaj churi Seba runami, Gilgalpi carca. Paica millai runami carca. Paimi trompetapi tocashpaca: “Ñucanchijca Davidpaj parteca mana cana canchijchu. Isaipaj churihuanca ima japinata mana charinchijchu. Tucui israelcuna quiquin carpa huasicunaman richijlla” nirca.

² Chaimi tucui israelcuna Davidta catinata saquishpa Bicripaj churi Seba runata catircacuna. Chashna cajpipish judacunaca Jordán yacumanta Jerusalencama causajcunami paicunapaj jatun mandajta catircacuna.

³ Davidca Jerusalenman paipaj huasiman chayashpaca, paipaj huasita cuidachun saquishca chunga paipaj caishuj huarmicunataca huarmicunalla causanapi churashpami, tucui imalla minishtirishcacunata cushpa causarca. Davidca chai huarmicunapica ña mana chayarircachu. Paicunaca viudacuna shinami huañungacama huarmicuna causanapi causarcacuna.

⁴ Chai q'uipami, jatun mandajca Amasa runataca: –Judacunataca cunanmanta quimsa punllapaj caipi ñucapajman tandanacumuchun nigri. Chai punllaca canpish caipi cangui– nirca.

⁵ Amasa runaca judacunata jatun mandajpajman tandanacuichij nishpa huillanaman rishpaca, chaipi cangui nishca punllapajtajca uniyashcamantami mana chaipi carca.

⁶ Chaimi Davidca, Abisaitaca: –Bicripaj churi Seba runaca, Absalontapish yallimi llaquichigrin. Chaimanta cunanca cambaj amopajta rurajcunata pushashpa, paita catishpa ri. Ñataj sinchi pircayuj pueblocunaman yaicushpa miticunman. Chaipica ashtahuan llaquimi canga– nirca.

⁷ Shina nijpimi Abisaica Joabpaj runacunandij, cereteocunandij, peleteocunandij, tucui c'ari c'ari runacunandij Jerusalenmanta llujshishpa Bicripaj churi Seba runata llaquichingapaj catishpa rircacuna.

⁸ Gabaón c'uchupi tiyaj jatun rumiman ña paicuna c'uchuyagrijpimi, Amasa runaca Joabta tupanaman llujshirca. Joabca macanacuna churanata churarishca, chaitaca alli chumbillirishcami carca. Chai chumbillinapica espadata mana alli huaquichishcata huarcuchishcami carca. Chaimi chai espadaca pambaman urmarca.

⁹ Joabca Amasahuan tupashpaca: –Ñuca huauquicu ¿allillachu cangui?– nishpa, muchangapajmi alli lado maquihuanca Amasapaj barbaspi japirca.

¹⁰ Amasaca Joab paipaj maquipi espadata charicujmantaca mana cuidarircachu. Chaimi huijsapi espadata Joab satijpi tucui chunllullicuna pambaman tallirijpi, Amasaca Joab manaraj cutin espadahuan satijpi huañurca. Chaimantaca Joabca, paipaj huauqui Abisaindijmi Bicripaj churi Seba runata llaquichingapaj catishpa rircacuna.

¹¹ Joabpaj runacunamanta shujmi Amasa runapaj c'uchupi shayarishpaca: –Joabtapish, Davidtapish maijanpish c'uyashpaca, Joabta catishpa richij– nirca.

¹² Amasa runaca chaupi ñanpimi paipaj yahuarllapitaj singuricurca. Tucui chaita pasacujcuna ricushpaca, chaipimi shayarircacuna. Chaimi chai runaca tucuicuna chaipi shayarijta ricushpa, Amasataca ñanmanta ladoman shitashpa shuj churanahuan paipaj jahuapi shitarca.

¹³ Amasa runata ñanmanta anchuchishca q'uipa Joabta caticujcunaca, ña mana chaipi shayarircacunachu. Ashtahuanpish Bicripaj churi Seba runata cati japina yuyailla rircallacunami.

¹⁴ Seba runaca tucui Israel aillucunapaj llajtacunata purishpami, Abel-bet-maaca puebloman chayarca. Barimpi causajcunapish tandanacushpami Seba runata catishpa rircacuna.

¹⁵ Joabpaj runacuna Abel-bet-maaca puebloman chayashpaca, chai pueblo muyundijtami shayarircacuna. Paicunaca pueblo muyundij pircacunata urmachingapajmi baluarteta churashpa muyujta shayarircacuna. Joabhuan tucui cajcunaca pircata urmachingapajmi tucuicuna trabajarcacuna.

¹⁶ Chaimi yachaisapa shuj huarmi chai pueblo pirca jahuapi shayarishpaca: –¡Uyaichij, uyaichij, Joabtaca ñucahuan parlanacuchun caiman shamuchun huillaichij!– nishpa caparishpa rogarca.

¹⁷ Joab chai huarmipajman c'uchuyajpi chai huarmica: –¿Canchu Joab cangui?– nijpi paica: –Ari, ñucami Joab cani– nirca. Chaimi chai huarmica: –Cambajta ruraj ñuca ima nishcata uyahuai– nijpi Joabca: –Uyashallami– nirca.

¹⁸ Chai huarmi ni callarishpaca: –Ñaupaca: Maijanpish imata yachasha nishpaca, Abel pueblopi tapugrichij nijcunami carca. Chaipi tapushpami imatapish allichijcuna carca.

¹⁹ Israel llajtapica, cai pueblomari mana p'iñanacushpa causajcuna canchij. Chashna cashpa tucui israelcunapaj mama shina llajtatamari canca chingachisha nicungui. ¿Ima nishpataj Mandaj Dios cushcataca chingachisha ninguiyari?– nircami.

²⁰ Chaimi Joabca: –¡Nunca, nunca ama chashna tucushca cachun! Ñucaca mana ñutuchishpa chingachingapajchu shamurcani.

²¹ Can yuyacushca shinaca mana chashnachu. Efraín urcumanta caj Bicripaj churi Seba runamari, jatun mandaj Davidta llaquichingapaj jatarishca. Chai runallata ñuca maquipi churai. Chaipica cai pueblota mana imata rurashpa rishallami– nijpimi, chai huarmica Joabtaca: –Shinashpaca Seba runapaj umataca cunanllatajmi cai pirca jahuamanta cancunapajman shitashun– nirca.

²² Chai huarmica yachaisapa cashcahuan tucuicunata tandachishpa parlajpica, Bicri runapaj churi Seba runapaj umata p'itishpami Joabpajman shitarcacuna. Chaimi Joabca trompetapi tocajpi tucuicuna chai pueblo c'uchumanta anchushpa paicunapaj quiquin carpa huasicunaman rircacuna. Joabpish jatun mandajpajman Jerusalenman tigrarcallami.

David churashca mandajcunami

²³ Chashna rurashca q'uipaca, Joabca tucui Israel soldadocunata mandajmi saquirirca. Joiadapaj churi Benaiaca cereteo, peleteo soldadocunata mandajmi tucurca.

²⁴ Adoram runaca, tributota japijcunata mandajmi tucurca. Ahiludpaj churi Josafatca, imalla tucushcacunata quillcajmi tucurca.

²⁵ Seva runaca jatun mandajpaj quillcajmi tucurca. Sadocpish Abiatarpish curacunami carca.

²⁶ Jair pueblomanta caj Ira runapish, Davidpaj curami carca.