2 SAMUEL 2 - Dios Rimashca Shimicunami

Judá llajtata jatun mandaj cachun Davidta churashcami

¹ Chai q'uipami Davidca Mandaj Diostaca: –Judá llajtapi tiyaj ¿maijan pueblocunaman huichiyashachu?– nishpa tapujpi Mandaj Diosca: –Huichiyailla– nirca. Cutinllatajmi Davidca: –¿Maimantaj huichiyasha?– nijpi Mandaj Diosca: –Hebronman huichiyai– nirca.

² Chaimi Davidca, paipaj ishqui huarmicunata pushashpa rirca. Chai huarmicunamanta shujca, Jezreel pueblomanta caj Ahinoam shutimi carca. Caishujca Carmel pueblomanta Nabalpaj huarmi cashca Abigailmi carca.

³ Davidca paihuan caj runacunatapish, paicunapaj huasi ucu familiandijmi pusharca. Paicunaca Hebronpi caj pueblocunapimi causarcacuna.

⁴ Judá llajta runacuna shamushpami, Davidtaca aceitehuan churashpa Judá llajtata jatun mandaj cachun churarcacuna. Galaad llajtapi caj Jabes pueblopi causajcunami Saultaca pambarcacuna nishpami Davidmanca huillarcacuna.

⁵ Chaimi Davidca Galaadpi caj Jabespi cajcunamanca: “Cancunapaj amo Saulta llaquishpa paita churanapaj jutcuta cushcamantaca Mandaj Dios cancunata alli nishca cachun nishpa huillachunmi huillajcunata cacharca.

⁶ Cunanca Mandaj Diospish cancunata llaquishca cachun. Cancuna chashna rurashcamantaca ñucapish cancunapaj allicunataca rurashatajmi.

⁷ Cancunapaj amo Saúl huañujpipish, fuerzarishpa c'ari c'ari sinchi maquicuna tucuichij. Judá llajtapi causajcunaca paicunata jatun mandaj cachunmi ñucataca aceitehuan churancuna” nircami.

Israelcunahuan Judá llajtapi causajcunahuan macanacushcami

⁸ Saulpaj soldadocunata mandaj Abnerca, Nerpaj churimi carca. Paica Saulpaj churi Is-bosetta, Mahanaim puebloman pushashpa rishpami,

⁹ Galaad, Gesuri, Jezreel, Efraín, Benjamín llajtacunapi causaj tucui israelcunata jatun mandaj cachun churarca.

¹⁰ Saulpaj churi Is-bosetca israelcunata mandai callaringapajca chuscu chunga huatayujmi carca. Paica ishqui huatatami mandarca. Judá llajtapi causajcunallami Davidtaca catircacuna.

¹¹ Hebronpi cashpa Judá llajtata David mandashca punllacunaca canchis huata sujta quillacunami carca.

¹² Nerpaj churi Abnerca, Saulpaj churi Is-bosetpajta rurajcunandijmi Mahanaimmanta llujshishpa Gabaonman rirca.

¹³ Sarviapaj churi Joabpish, Davidpajta rurajcunandij Hebronmanta llujshishpa rishpami, Gabaonpi caj yacu tanque c'uchupi Is-bosethuan tupanacurca. Chaipimi shujcunaca yacu tanque shuj ladoman, caishujcunaca chaishuj ladoman shayarircacuna.

¹⁴ Chaipimi Abnerca Joabtaca: –Cunanca ishquindij ladomanta mosocuna llujshishpa, ñucanchij ñaupajpi macanacuchun– nijpi Joabca: –Shinashpaca macanacungapaj llujshichij– nirca.

¹⁵ Shina nijpica, Saulpaj churi Is-bosetpaj partecunaca Benjaminpaj aillumantami chunga ishqui runacuna llujshircacuna. Davidpajta rurajcunamantapish chunga ishquillatajmi llujshircacuna.

¹⁶ Paicunaca caishujmanta chaishujmanta uma ajchapi japinacushpami, caishujmanta chaishujmanta espadahuan costillaspi satinacurcacuna. Chashnami paicunaca tucuicuna shuj huañuita huañurcacuna. Chaimantami Gabaonpi caj chai pambataca, “Helcat-hazurimta” shutichircacuna.

¹⁷ Chashna tucujpimi chai punllaca yallitaj p'iñarinacushpa caishuj soldadocunapish macanacushpa Abnertapish, israelcunatapish Davidpajta rurajcuna misharcacuna.

¹⁸ Chaipica: Sarviapaj Joab, Abisai, Asael quimsa churicunapishmi carca. Chai Asaelca urcupi purij tarugapaj chaquicuna shina yallitaj callpaj chaquicunayujmi carca.

¹⁹ Chashna cashpami Asaelca, alli ladomanpish lluqui ladomanpish mana anchurishpa Abnertaca catirashpa rirca.

²⁰ Abner huashaman tigralla ricushpaca: –¿Canca Asaelchu cangui?– nijpi Asaelca: –Ari, ñucami cani– nirca.

²¹ Chaimi Abnerca: –Alli ladota cashpa, lluqui ladota cashpa rishpa caishuj soldadocunata catishpa paicuna ima charishcacunata quichushpa ñucataca ama catichu– nirca. Shina nijpipish Asaelca, paita catinataca mana saquircachu.

²² Chaimi Abnerca cutinllataj Asaeltaca: –Ñucata catinataca saqui. Maitataj cantaca huañuchishari. Cambaj huauqui Joabhuanca ¿ima shinataj ñahui ñahui tupashari?– nirca.

²³ Manataj saquijpimi, Abnerca Asaeltaca paipaj lanza huasha lado puntahuan pechopi satijpi lanzaca huashaman pasarca. Chaimi Asaelca chaillapitaj urmashpa huañurca. Asael huañushca siricun chaita rijcunaca tucuicunami paita ricushpa shayarircacuna.

²⁴ Joabpish, Abisaipish Abnertaca ashtahuanmi catishpa rircacuna. Ña inti huashicucuitami, Gía pueblo ch'imbapurapi caj Amma urcuman chayarcacuna. Chai urcuca, Gabaonman rina shitashca pamba ñan c'uchullapimi carca.

²⁵ Chaipimi Benjaminpaj ailluca Abnerpaj huashapi tucui soldadocuna shuj shinalla tucushpa urcu puntapi shayarircacuna.

²⁶ Chai urcumantami Abnerca, Joabtaca: –¿Macanacuica tucuicunata tucuchingacamachu caticungalla? Macanacui tucurishca huashaca jayaj llaqui canataca ¿manachu yachangui? Quiquin huauquicunallatataj catirashpa llaquichinata saqui nishpaca, ¿ima horacamataj ninguiyari?– nirca.

²⁷ Chaimi Joabca: –¡Taita Diosca causajmi! Can mana chashna nishca cajpica, ñuca gentecunaca caya tutamantacama paipaj huauquicunata catinataca mana saquinmanchu carca– nirca.

²⁸ Chashna nishpa gachupi Joab tocajpica, tucuicuna chaillapi saquirishpa israelcunataca ña mana ashtahuan catirashpa llaquichircacunachu. Ña mana ashtahuan macanacurcacunachu.

²⁹ Abnerpish, paihuan cajcunapish chai tutaca tucui tutami Arabata rircacuna. Bitrón chaita Jordán yacuta ch'imbashpami Mahanaimman chayarcacuna.

³⁰ Joabca Abnerta catirashpa llaquichinata saquishpaca, tucuicunata tandachishpa ricushpaca, Davidpajta rurajcunamanta chunga iscun runacuna, Asaelpish illashcatami yachaj chayarca.

³¹ Davidpajta rurajcunaca Abnerhuan caj Benjaminpaj aillutaca 360 runacunatami huañuchishca carca.

³² Chai q'uipaca Asaelpaj aichata apashpaca Belenpimi paipaj yayata churashca jutcupi churarcacuna. Chai tutaca tucui tuta rishpami Joabpish, paihuan caj runacunapish pacarinapajca Hebronman chayarcacuna.