2 SAMUEL 12 - Dios Rimashca Shimicunami

Davidta Natán rimashcami

¹ Mandaj Dios Natanta Davidpajman cachajpimi paipajman shamushpaca: –Shuj pueblopimi ishqui runacuna causarca. Paicunaca shujca achcata charij, caishujca huajchami carca.

² Chai achcata charijca achca ovejacunayuj, huagracunayujmi carca.

³ Chai huajcha runaca shuj ovejallatami charirca. Paillataj randishpami huiñachishca carca. Chaimi paihuan huiñashpa, paipaj huahuacunahuanpish tandalla, paipaj micunallatataj micuj carca, paipaj vasollamantataj ubyaj carca, paipaj rigrapimi dormichij carca. Paipaj quiquin ushushita shinami charij carca.

⁴ Chai charij runapajmanca carumanta pasacuj shuj runami chayarca. Chai runaman carangapajca paipaj ovejata, paipaj vacataca mana huañuchishpa carasha nishpami, chai huajcha runapaj shujlla ovejata japishpa huañuchishpa yanushpa cararca– nircami.

⁵ Chaimi Davidca nina sindirij shina chai charij runahuan p'iñarishpa Natantaca: –¡Mandaj Diosca causajmi, chashna ruraj runaca huañunatajmi can!

⁶ Chai huajcha runata mana llaquishpa, paipaj ovejata huañuchishcamantaca, chai charij runaca chuscu cutinhuanmi cutichina can– nirca.

⁷ Chaimi Natanca Davidtaca: –¡Chai runa shinaca canllatajmari cangui! Israelcunata Mandaj Diosca cashnami nin: Ñucami cantaca israelcunata jatun mandaj cachun churarcani. Saulpaj maquimantapish cantaca ñucami quishpichircani.

⁸ Cambaj amopaj huasitapish paipaj huarmicunatapish, cambaj maquipimi churarcani. Israelcunatapish, judacunatapish mandachunmi churarcani. Chai cushcacuna ashalla cashca cajpipish, ñucallatajmi ashtahuan imatapish cuiman carcani.

⁹ Mandaj Diospaj ñaupajpi millaita rurashpa ¿ima nishpataj paipaj shimitaca, manapish ima cashcata shina rurarcanguiyari? Heteo Uriasta espadapi huañuchishpami, paipaj huarmitaca cambaj cachun japircangui. Paitaca amonitacunapaj espadapi huañuchunmi cacharcangui.

¹⁰ Heteo Uriaspaj huarmita cambaj huarmi cachun japinga raiculla ñucata yangapi churashcamantaca, cunanmantapacha cambaj huasi ucupurapica espadahuan llaquica manataj illangachu.

¹¹ Ñuca Mandaj Diostajmi cashna nini: Cambaj quiquin huasi ucupurallamantatajmi canta llaquichichunca jatarichisha. Cambaj huarmicunataca quichushpami cambaj huasi ucupurallamantaj cujpi can ricucuita punlla luzpi chayaringa.

¹² Canca pacallapimi chashna rurarcangui, ashtahuanpish ñucaca tucui israelcuna ricucunpi punlla luzmi chashna rurachisha ninmi nigri– nircami.

¹³ Shina nijpimi Davidca Natantaca: –Mandaj Diosta p'iñachishpamari juchallishcani– nijpi Natanpish Davidtaca: –Mandaj Diosca cambaj juchataca, ñami anchuchin mana huañunguichu.

¹⁴ Mandaj Diosta p'iñajcunaman paita c'amichishcamantaca huacharishca cambaj huahuaca huañungatajmi– nircami.

¹⁵ Natanca paipaj huasiman tigrarcallami. Mandaj Diosca Uriaspaj huarmi Davidpajta huachashca huahuatami unguchishpa anchayachishpa huañunallata rurarca.

¹⁶ Chaimi Davidca chai huahuamanta Diosta mañarca, ayunarca. Huasiman yaicushpaca tutapish pamballapimi sirishpa pacarirca.

¹⁷ Paipaj huasipi causaj cunaj yuyajcunaca pambamanta jatarichingapajmi Davidpajman rirca. Paica mana jatarisha nircachu. Paicuna micui nijpipish mana micurcachu.

¹⁸ Canchis punllapica chai huahuaca huañurcami. Davidpajta rurajcunaca, huahua huañushcata paiman yachaj chayachinataca mancharcacunami. “Huahua manaraj huañujpi ñucanchij paita imallatapish nishun nijpipish paica mana uyasha nircachu. Cunancarin huahuaca huañunmari nishpa huillajpicarin imapish tucungallatajmari” nishpami paicunapuralla ninacushpa mana huillashun nircacuna.

¹⁹ Davidca, paipajta rurajcuna paicunapuralla parlanacucujta ricushpami, huahuaca ñami huañushca yuyachin nishpa Davidca paipajta rurajcunataca: –¿Huahuachu huañun?– nijpi paicunaca: –Ari, huañunmi– nircacuna.

²⁰ Chaimi Davidca, pambamanta jatarishpa armashpa mishquijllata ashnacujcunahuan churarishpa, shujtaj churanata churarishpa Mandaj Diospaj huasiman yaicushpa, paita adorarca. Chai q'uipaca paipaj huasiman shamushpa, micunata mañajpi micunata cujpica micurcami.

²¹ Chaipimi paipajta rurajcunaca: –¿Imatataj ruranguichu imamí? Huahua manaraj huañujpica ayunashpamari huacacurcanguilla. Huahua huañujpirajchu, cunanca jatarishpa micungui imamí– nircacuna.

²² Shina nijpimi Davidca: –Huahua manaraj huañujpica Taita Diosca ñucata llaquishpa, huahuata alliyachingapishchari nishpami ayunashpa huacacurcanilla.

²³ Cunanca ñamari huañushca, tigrachimui tucuna cashpatajmari ayunacushallari. Paica ña mana tigramungachu ashtahuanpish ñucami paipajman risha– nircami.

Salomón huacharishcami

²⁴ Davidca, paipaj huarmi Betsabetaca cushichircami. Paipaj huarmi Betsabepajman rishpaca paihuanmi chayarinacurca. Chaimi Davidpajtaca shuj c'ari huahuata huacharca. Paitaca, Salomón shutitami shutichirca. Mandaj Diosca chai huahuata c'uyacushcataca,

²⁵ profeta Natanta Davidman huillanaman cachashpami yachaj chayachirca. Chai huahuataca Mandaj Dios nishcata uyashpami Jedidías shutita shutichirca.

Rabá pueblota David japishcami

²⁶ Joabca Amón llajtapi caj Rabapi causajcunahuan macanacushpami jatun mandaj mandashpa tiyana pueblota japirca.

²⁷ Joabca Davidmanca: “Rabá pueblotami muyujta shayarishpa chai pueblopaj yacucunatapish ña japini.

²⁸ Cai pueblotaca ñuca japishca nishpa ñuca shuti chai pueblopi ama tiyachun, canhuan saquirijcunata tandachishpa cai pueblo c'uchupi carpa huasicunata shayachishpa can japinaman shamui” nishpa huillachunmi huillajcunata cacharca.

²⁹ Chaimi Davidca paihuan chaipi saquirishcacunata tucuita tandachishpa Rabaman rishpa, paicunahuan macanacushpa chai pueblotaca pai japirca.

³⁰ Chai pueblota jatun mandajpajtaca coronatami quichurca. Chai coronaca shuj talento curitami pezarca. Sumaj rumicunahuan churashcami carca. Chaitaca Davidpaj umapimi churachirca. Chai pueblomantaca achca charinacunatapishmi llujshichirca.

³¹ Chai pueblopi causajcunatapish llujshichishpami, sierracunahuan, trillana fierrocunahuan, fierro hachacunahuan trabajachun churarca. Ladrillocunata cusana hornocunapi trabajachunpishmi churarca. Amón llajtapi tiyaj tucui pueblocunapi causajcunatapish chashnallataj rurachunmi churarca. Chashna rurashpaca Davidca tucui israelcunandij Jerusalenman tigrarcallami.