2 SAMUEL 10 - Dios Rimashca Shimicunami

Amonitacunata siriocunata David mishashcami

¹ Tucui chaicuna q'uipaca, amonitacunata jatun mandajmi huañurca. Pai huañujpica paipaj churi Hanunmi mandarca.

² Chaimi Davidca: “Ñucami Nahaspaj churi Hanunhuanca paipaj yaya ñucahuan alli cashca shinallataj paihuanpish llaquishcata ricuchigrini” nishpami, paipaj yaya huañushcamanta cushichingapaj Davidca paipajta ruraj maijancunata cacharca. Davidpajta rurajcuna amonitacunapajman chayajpica,

³ chai llajtata q'uipa mandajcunaca, paicunata mandaj Hanuntaca: “¿Cambaj yaya huañushcamanta canta cushichichunlla Davidca paipajta rurajcunata cachashcatachu yuyangui? Manachu Davidca paipajta rurajcunataca cantapish cai pueblocunatapish ima shina cashcata ricushpa, q'uipataca tucui chingachingapaj ricushpa tigramuchun cachashca canga” nircacuna.

⁴ Chaimi Hanunca, Davidpajta rurajcunata japishpa, shuj lado barbasta tucui raspashpa, churanacunatapish shuj lado uritaca siqui patacama lliquishpa paicunataca tigrachishpa cacharca.

⁵ Chaita Davidman yachaj chayachijpica, paicunaca yallitaj pingaihuan cana cashcata yachashpami jatun mandajca maijancunata tupanaman cachashpaca: “Cutinllataj barbas huiñangacama Jericopi saquirichij. Barbas huiñajpica tigramunguichijllami” ninaman cacharca.

⁶ Amonitacunaca chaimanta David paicunahuan p'iña cashcata yachashpami, Bet-rehobpi causaj siriocunata, Sobapi causaj siriocunata chaquillahuan purij 20.000 runacunata, jatun mandaj Maacapaj 1.000 runacunata, Is-tobpaj 12.000 runacunata pagashpa pushamuchun cacharca.

⁷ Chaicunata David uyashpaca, c'ari c'ari tucui soldadocunahuanmi Joabta cacharca.

⁸ Amonitacunaca macanacungapaj llujshishpaca paicunapaj puebloman yaicuna pungullapimi macanacunalla tucushpa shayarircacuna. Sobamanta caj siriocunapish, Rehobmanta cajcunapish, Is-todmanta cajcunapish, Maacamanta cajcunapish shujtaj pambapimi shayarircacuna.

⁹ Joabca ñaupaj ladomantapish, huasha ladomantapish amonitacuna quimimugrijta ricushpami, israelcunapuramantaca ashtahuan alli soldadocunata agllashcahuan, siriocunahuan macanacungapaj macanacunalla tucushpa shayarirca.

¹⁰ Caishuj soldadocunataca amonitacunahuan macanacunallata rurashpa shayachishpami, paipaj huauqui Abisaiman cushpa cashna nirca:

¹¹ “Siriocuna ñucata mishagrijpica, can ayudanaman shamungui. Amonitacuna canta mishagrijpica, ñucami canta ayudanaman shamusha.

¹² Taita Diospaj agllashcacunamanta, ñucanchij pueblomantaca c'ari c'ari cailla, c'ari c'ari cashunlla. Mandaj Dios paipaj ima shina alli canapaj rurachunlla” nirca.

¹³ Joabca, paihuan caj israelcunahuanmi siriocunahuan macanacungapaj c'uchuyagrirca. Ashtahuanpish siriocunaca paicunata miticushpa rircallacunami.

¹⁴ Amonitacunaca siriocuna miticushpa rijta ricushpaca, paicunapish Abisaita miticushpa rishpami, paicunapaj puebloman yaicushpa pacatucurcacuna. Chaita ricushpaca Joabca, Amonitacunahuan macanacunata saquishpa Jerusalenman tigrarcallami.

¹⁵ Siriocunaca, israelcuna paicunata mishajpi pingai tucucunchij nishpami, cutinllataj tandanacurcacuna.

¹⁶ Hadad-ezer, Éufrates yacu ch'imba ladoman caj siriocunata pushanaman cachajpimi, pushanaman rijcunaca Helam puebloman chayarcacuna. Paicunaca paicunata mandaj Sobacta pushashcami chayarca. Sobacca Hadad-ezerpaj soldadocunata mandajmi carca.

¹⁷ Chaita Davidman huillajpica, paica tucui israelcunata tandachishpami Jordán yacuta ch'imbashpa Helamman shamurca. Chaipimi siriocunaca macanacunalla tucushpa shayarishpa Davidhuan macanacurca.

¹⁸ Ashtahuanpish siriocunaca israelcunapaj ñaupajmanta miticushpami callparca. Chaipica Davidca 700 carrocunapi caj soldadocunata, caballopi tiyarij 40.000 soldadocunatapishmi huañuchirca. Soldadocunata mandaj Sobactapish chugrichijpimi, paica chaillapitaj huañurca.

¹⁹ Hadad-ezerta ayudacuj tucui jatun mandajcunaca chaita ricushpami, ña paicunata israelcuna mishashca cashcata yuyarcacuna. Chaimi paicunaca israelcunahuan alli tucushpa, paicunapaj ucupi tucurcacuna. Chaimantapachami siriocunaca, amonitacunata ayudashpa israelcunahuan macanacunataca mancharcacuna.