2 SAMUEL 1 - Dios Rimashca Shimicunami

Saúl huañushcata David yachaj chayashcami

¹ Saúl huañushca q'uipaca cashnami tucurca. Davidca amalecitacunahuan macanacushpa mishashpa Siclagman tigrashpaca, ishqui punllacunatami chaipi carca.

² Quimsa punllapica, Saulpaj carpa huasicunamanta shujmi, churanacunapish lliqui lliqui, umapi allpahuan shitarishca chayamurca. Davidpaj ñaupajman c'uchuyashpaca, paita alli nishcata ricuchingapajmi pambaman tupajta cumurirca.

³ Davidca paitaca: –¿Maimantataj shamunguiyari?– nijpi paica: –Ñucaca israelcunapaj carpa huasicunamantami miticushpa shamuni– nirca.

⁴ Chaimi Davidca: –¿Imataj tucurcari? Ñucaman huillapayari– nijpi, paica: –Israelcunami macanacuimanta miticushpa callpancuna. Achca israelcunami huañuncuna, Saulpish paipaj churi Jonatanpish huañunmi– nirca.

⁵ Davidca huillaj mosotaca: –Saulpish, paipaj churi Jonatanpish huañushcataca ¿ima shinataj yachangui?– nircami.

⁶ Chaimi huillaj mosoca: –Ñucapish chai punllatajmari Gilboa urcuman rishca carcani. Saulca paipaj lanzahuan taunarishcalla cajta, paita p'iñajcunaca carrocunahuan, caballopi tiyarishcacuna caticujtami ricurcani.

⁷ Saulca tigralla huashaman ricushpaca ñucatami ricurca. Chaimi ñucataca: Caiman shamui nijpi caipimi cani nircani.

⁸ Chaipimi ñucataca: ¿Canca pitaj cangui? nijpi: Ñucaca amalecita runami cani nircani.

⁹ Chashna nijpimi paica ñucataca: Ñucataca yallitaj llaquimari japin. Chashna cashpapish causajrajmari cani. Ñucapajman c'uchuyashpa ñucata huañuchichunmi rogani nirca.

¹⁰ Shina nijpimi pai ña mana causana cashcata yachashpa huañuchircani. Paipaj umapi churarishca coronatapish, paipaj rigrapi aparishca brazaletetapish surcushpami can ñuca amopajman apamurcani– nircami.

¹¹ Chaimi Davidca pai churashca churanata chutashpa lliquirirca. Paihuan caj runacunapish chashnallatajmi rurarcacuna.

¹² Saulpish paipaj churi Jonatanpish, Mandaj Diospaj gentecunapish, Israelpaj aillucunapish espadapi huañushcamantaca, achcata llaquirishpa huacashpami, chishiyangacama ayunarcacuna.

¹³ Chai q'uipami Davidca huillanaman shamuj mosotaca: –Canca ¿maimantataj cangui?– nishpa tapujpi paica: –Ñucaca caru Amalec llajtamanta runapaj churimi cani– nirca.

¹⁴ Chaimi Davidca: –Mandaj Dios churashca jatun mandajta cambaj maquihuan huañuchinataca ¿ima nishpataj mana mancharcanguiyari?– nishpa,

¹⁵ Davidca paipaj runacunapuramanta shujta cayashpaca: –Ri, chai runata huañuchigri– nijpi pai chugrichijpica huañurcallami.

¹⁶ –Mandaj Dios churashca jatun mandajta ñucami huañuchircani nishpa cambaj shimillahuantaj huillashcamantaca cambaj yahuarmantaca cambaj jahuallatajmi canga– nircami.

Saulpish Jonatanpish huañujpi David llaquirishpa huacashcami

¹⁷ Saúl paipaj churi Jonatandij huañushcamantami, Davidca tononchishpa huacarca.

¹⁸ Judá aillucunapish chashnallataj huacachunmi yachachichun mandarca. Jaser libropica cashnami quillcashca tiyacun:

¹⁹ “¡Aij, Israelpaj sumaj canaca, cancunapaj jahua urcucunapimari chingarishca! C'ari c'ari cajcunaca ¡Ima shinataj urmarcari!

²⁰ Circuncisionta mana rurashcacunapaj ushushicuna cushicushpa ama tushuchun, filisteocunapaj ushushicunapish ama cushicuchun, Gat pueblopica ama huillanguichijchu. Ascalón plazacunapipish ama parlanguichijchu.

²¹ Gilboa urcucunalla, c'ari c'ari cajcunapaj escudocunaca chaipimari shitashca saquirishca. Saulpaj escudopish aceitehuan mana churashcapaj shinamari shitashca saquirishca. Chaimanta cancunapica, amataj tamyachun, shullallapish amataj urmachun. Chai allpapica ofrendata cunapajca amataj p'ucuchun.

²² Jonatanpaj arcopish, Saulpaj espadapish huañushcacunapaj yahuar illajlla, c'ari c'aricunapaj huira illajllaca mana tigrajchu carca. Jonatanpaj arcoca manataj huashaman tigrajchu carca. Saulpaj espadapish chushajllaca manataj tigrajchu carca.

²³ Saulhuan Jonatanhuanca, alli c'uyanacujmi carca. Alli apanacujmi carca. Paicunapaj causaipipish manataj ch'icanyajcunachu carca. Huañuipipish manataj ch'icanyancunachu. Aguilacunata yalli callpajcunami carca. Leoncunata yalli fuerzayujcunami carca.

²⁴ Israel huarmicunalla, Saulmantaca huacaichigari. Paimari cancunamanca amsa puca churanata churachij carca. Paimari curihuan allichishca sumaj churanata churachij carca.

²⁵ ¡C'ari c'aricunaca ima shinataj macanacuipica urmarcacunari! ¡Jonatanca cancunapaj urcucunapimari huañushca!

²⁶ Ñuca huauqui Jonatanlla, canmantaca llaquihuan huañucunimi. Ñucataca yallitaj c'uyajmi carcangui. Cambaj c'uyaica yallitaj mancharinami ñucapajca carca. Cambaj c'uyaica huarmicunapaj c'uyaitapish yallimi carca.

²⁷ ¡C'ari c'aricunaca ima shinataj urmarcacunari! ¡Macanacunacunapish ima shinataj chingarircari!” nircami.