2 REYES 7 - Dios Rimashca Shimicunami

¹ Shina nijpi Eliseoca: –Mandaj Dios nishcata uyai. Caya cai horas shinataca Samaria pueblo pungupica, shuj seah nishca ashtahuan alli cutami shuj siclo cullqui valicunga. Ishqui seah cebadapish shuj siclo cullquimi valicunga ninmi Mandaj Diosca– nircami.

² Chaimi jatun mandajpaj alli maqui shina runaca, Diospaj runataca: –Mandaj Dios jahua pacha ventanacunata pascajpipish, mana can nishca shinatajca tucuipajchu yuyachin– nijpi Eliseoca: –Ñuca nishca shina tucujta cambaj quiquin ñahuihuan ricushpapish, chaitaca mana micunguichu– nirca.

³ Samariaman yaicuna pungupimi lepra ungüi japishca, chuscu runacuna tiyacurcacuna. Paicunaca caishuj chaishujmi: –¿Maitataj huañungacamaca caipi tiyacushunllari?

⁴ Puebloman yaicushpapish jatun yaricai tiyashcamantaca chaipipish huañushunllatajmi. Caipi tiyacushpallapish huañushunllatajmi. Chaipaj randica, sirio soldadocuna tiyacun carpa huasicunaman jacuchij. Paicuna mana huañuchijpica causashunmi, paicuna huañuchijpica huañushunllatajchari– ninacurcacuna.

⁵ Ña tutayacujpimi sirio soldadocunapaj carpa huasicunaman ringapaj jatarishpa rircacuna. Siriocunapaj carpa huasicunaman paicuna chayanapajca pi mana chaipi carcachu.

⁶ Mandaj Diosmi sirio soldadocunapaj rinrinpica macanacuna carretacunapi, caballocunapi huaranga huaranga soldadocuna shamujta uyachishca carca. Chaimi chai soldadocunaca: “Israelcunata jatun mandajca, heteocunata jatun mandajcunamanpish, Egiptota jatun mandajcunamanpish cullquita cushpamari, ñucanchijhuan macanacuchun pushamushca yuyachin” ninacurcacuna.

⁷ Chashna ninacushpaca, ña tutayacuitami jatarishcahuan, paicunapaj carpa huasicunatapish, caballocunatapish, burrocunatapish shitashpa miticushpa rircacuna. Paicunapaj causaita quishpichingapaj nishpami, carpa huasicunatapish ima shina cajtaca chashnata shitashpa miticushpa rircacuna.

⁸ Lepra ungüihuan cajcuna carpa huasicunaman chayashpaca shuj carpa huasiman yaicushpami micurcacuna ubyarcacuna. Chaimantaca cullquitapish, curitapish, churanacunatapish japishpami pacagrircacuna. Cutin tigrashpa shujtaj carpa huasiman yaicushpapish, chaimantapish chashnallataj apashpami pacagrircacuna.

⁹ Chai q'uipaca caishuj chaishujmi cashna ninacurcacuna: –Mana allitamari ruracunchij. Cunanca alli huillaita huillana punllapimari ñucanchijca upalla saquiricunchij. Pacaringacama mana huillagrishpaca, ñucanchijllatajmari llaqui tucushun. Chaipaj randica, cunantaj puebloman yaicushpa cai alli huillaitaca jatun mandajpaj huasipi huillashunchij– ninacurcacunami.

¹⁰ Chashna ninacushpa Samariaman shamushpaca, pueblo pungupi cuidajcunata caparishpami: –Ñucanchijmi sirio soldadocunapajman rircanchij. Chaipica pi mana cashcachu, rimashcallapish mana uyarinchu. Paicunapaj caballocuna, burrocunallami huatanapi huatashca shayacushca. Carpa huasicunapish ima shina shayachishcaca chai shinallatajmi shayacushca– nircacunami.

¹¹ Chashna huillajpica pueblo pungupi cuidajcunaca, jatun mandaj mandashpa tiyana huasiman yaicushpami huillarcacuna.

¹² Chaimi chai tutallataj jatun mandaj jatarishpaca, paipajta rurajcunataca: –Siriocuna imata ruracushcatami cancunaman huillagrini. Paicunaca ñucanchij yaricaihuan cashcata yachashcamantami ñucanchij cai pueblomanta llujshijpica, ñucanchijtaca causajta japishpa paicunaca cai puebloman shamungapaj paicunapaj carpa huasicunamanta llujshishpa maipi miticugrishcacuna canga– nircami.

¹³ Shina nijpimi, paipajta rurajcunamanta shuj runaca: –Shinashpaca, cai pueblopi manaraj huañushca caballocunamanta pichca caballocunapi maijancunata ricunaman cachashunri. Huañujpipish causajpipish, ima mana cangachu. Tucuicunami huañuncuna ñucanchijpish huañushunllatajmi– nirca.

¹⁴ Chaimi jatun mandajca ishqui caballo aisashca shuj carropi rishpa siriocunapaj carpa huasicunapi ricumugrichij nishpa cacharca.

¹⁵ Paicunaca Jordán yacucama rishpami, chai ñancunapica siriocunapaj churanacunapish, paicunapaj ima charinacunapish tucui ñancunapi siricujta ricurcacuna. Chaicunataca sirio soldadocunami, manchaihuan miticunaman callpacushpa shitashpa rishcacuna carca. Jatun mandaj cachashcacuna tigrashpaca, imallata ricushcataca tucuitami huillarcacuna.

¹⁶ Chaita huillajpi israelcuna rishpaca, siriocunapaj carpa huasicunapi imalla tiyashcatami llujshichishpa apamurcacuna. Chaicunatami Mandaj Dios huillachishca shinallataj shuj seah alli cutataca shuj siclo cullquillapi c'aturcacuna, ishqui seah cebadatapish shuj siclo cullquillapimi c'aturcacuna.

¹⁷ Jatun mandajca, paipaj alli maqui shina caj runataca pueblo pungupimi cuidachun churashca carca. Paica randijcuna pungu pambapi urmachishpa sarujpimi huañurca. Jatun mandaj Diospaj runapajman rijpi pai huillashca shinallatajmi huañurca.

¹⁸ Chaipica Diospaj runa nishca shinallatajmi tucurca: Diospaj runaca jatun mandajmanca: “Caya cai horasllatajmi Samaria pueblo pungupica, ishqui seah cebadataca shuj siclo cullquillapi, shuj seah alli cutataca, shuj siclo cullquillapi c'atungacuna” nircami.

¹⁹ Diospaj runa chashna nijpipish jatun mandajpaj alli maqui shina runaca: “Mandaj Dios jahua pacha ventanacunata pascajpipish, can nishca shinaca mana tucuipajchu yuyachin” nircami. Shina nijpica Diospaj runaca: “Ñuca nishca shina tucujta cambaj quiquin ñahuihuan ricushpapish, chaitaca mana micunguichu” nishcami carca.

²⁰ Diospaj runa nishca shinallatajmi, chai runaca puebloman yaicuna pungupi randijcuna sarujpi huañurca.