2 REYES 6 - Dios Rimashca Shimicunami

Eliseoca hachata huambuchishcami

¹ Profeta canata yachacujcunaca Eliseotaca: –Riqui, canhuan ñucanchij causacun cai huasica uchijllamari.

² Chaimanta cunanca Jordanman rishpa jatun caspicunata shuj shuj apamushpa huasichishpa chaipi causashunchij– nijpimi Eliseoca: –Shinashpaca richigari– nirca.

³ Shina nijpimi paicunapuramanta shujca Eliseotaca: –Cambajta ruraj ñucanchijhuan jacupai– nijpi: –Shinashpaca ñucapish cancunahuan risha– nirca.

⁴ Eliseoca paicunahuan rishpaca Jordanman chayashpa yuracunatami p'itircacuna.

⁵ Yurata p'iticujpi shuj runapaj hacha yacupi huashicujpimi: –¡Aij, ñuca amito! ¡Chai hachaca mañashcallamari carca!– nishpa caparirca.

⁶ Chaimi Diospaj runaca: –¿Maipitaj huashicurca?– nijpi, chai runaca maipi huashicushcata ricuchijpi, Eliseoca caspita p'itishpa hacha huashicushcapi caspita shitashpa fierro hachata huambuchishpaca,

⁷ ña japi nijpi, chai runaca maquita chutashpa hachata japirca.

Sirio soldadocunata Eliseo Samariaman apashcami

⁸ Siria llajta jatun mandajca, israelcunahuan macanacuita charishpami, paipajta rurajcunahuan maillapi carpa huasicunata shayachinata yuyarirca.

⁹ Chaimi Diospaj runaca, Israel llajtata jatun mandajmanca: “Riqui, Sirio soldadocunami chaimanca rin, chaitaca ama pasanguichijchu” nishpa huillachun cacharca.

¹⁰ Israel llajtata jatun mandajca, Diospaj runa huillashca ladomanmi ricujcunata cacharca. Siriocunamanta cuidaringapajmi tauca cutin cachacujlla carca.

¹¹ Chaimi Siria llajtata jatun mandajca, paipaj shungupi caita chaita yuyashpa paipajta rurajcunata cayashpaca: –¿Maijan ñucanchijpuramantachu Israel llajtata jatun mandajpura tucushpa huashalla huillacun? ¿Manachu chaita huillai tucunguichij?– nirca.

¹² Shina nijpi paipajta rurajcunamanta shujca: –Jatun mandaj ñuca amito, chaica mana chashnachu. Ashtahuanpish profeta Eliseomari Israelpi. Paimari Israel llajtata jatun mandajmanca can imallata nishcacunataca cambaj dormina ucupi pacallapi rimashcacunacama tucuita huillacun– nircami.

¹³ Chaimi jatun mandajca: –Chai runata japimuchun soldadocunata cachangapaj pai maipi cashcata yachamugrichij– nijpi paicunamanta shujca: “Paica Dotán pueblopimari” nishpa huillajpi,

¹⁴ jatun mandajca caballopi tiyarijcunatapish, carrocunatapish, achca soldadocunatapish chai puebloman cachajpi paicunaca tuta shamushpa chai pueblo muyundijpi shayarircacuna.

¹⁵ Diospaj runapajta ruraj cayandij tutamanta jatarishpa llujshishpaca, chai pueblo muyundijpica soldadocunapish, caballopi tiyarishca soldadocunapish, carrocunapish muyundijta shayacujta ricushpami, Eliseotaca: –Aij, ñuca amito cunanca ¿imataj rurashunri?– nirca.

¹⁶ Shina nijpimi Eliseoca: –Ama manchaichu, ñucanchijhuan cajcunamari paicunahuan cajcunata yalli– nirca.

¹⁷ Eliseoca: –Mandaj Dioslla, paipish ricuchun paipaj ñahuicunata pascapai– nishpami mañarca. Eliseopajta ruraj runapaj ñahuita Mandaj Dios pascajpica, Eliseo maipi can urcupica caballopi tiyarishca soldadocunapish, nina lunyacuj carrocunapish paipaj muyundijta chai loma junda cajtami ricurca.

¹⁸ Siriocuna paipajman uriyamujpica, Eliseoca Mandaj Diostaca: “Cai runacunataca ñahui mana ricujta rurapai” nishpami mañarca. Mandaj Diosca Eliseo mañashca shinallatajmi, ñahui mana ricujta rurarca.

¹⁹ Chashna cajpimi Eliseoca paicunataca: –Cai ñanca mana cancuna ricushcaman rina ñanchu. Cai pueblopish mana cancuna chayagrisha nicushca pueblochu. Ñucata catichij, ñucami cancuna mashcacushca runapajman pushasha– nishpami, Samaria puebloman pusharca.

²⁰ Samariaman chayashpaca Eliseoca: “Mandaj Dioslla, cai gentecuna ricuchun paicunapaj ñahuicunata pascahuai” nishpa mañajpi, Mandaj Dios paicunapaj ñahuita pascajpica, Samaria pueblo chaupipi cashcatami ricurcacuna.

²¹ Israel llajtata jatun mandajca siriocunata ricushpami Eliseotaca: –Ñuca yayito ¿paicunataca huañuchishachu?– nirca.

²² Shina nijpi Eliseoca: –Ama huañuchichu ¿cambaj espadahuan, cambaj arcohuan macanacuipi prezu japimushcataca huañuchinguimanllachu? Paicunata mandajcunapajman tigrachun micunatapish carashpa, yacutapish ubyachishpa cachailla– nircami.

²³ Chaimi israelcunata jatun mandajca jatun micuita allichishpa paicunaman carashpa, ña micujpi, ubyajpica tigrachishpa cacharcalla. Paicunaca paicunata mandajpajmanmi tigrarcacuna. Chaimanta pachami siriocunaca macanacunacunahuan allichirishpa israelcunata quichungapajca ña manataj shamurcacuna.

Eliseoca Samariapi ima tucunata huillashcami

²⁴ Chai q'uipaca cashnami tucurca. Siria llajtata jatun mandaj Ben-adadca, paipaj tucui soldadocunata tandachishpami, Samariaman huichiyashpa chai pueblo muyundijta shayarircacuna.

²⁵ Chashna muyundijta chapacushcamanta Samariapi jatun yaricai cajpimi, shuj burro umataca pusaj chunga cullquipi c'aturcacuna. Paloma cacataca, chaupi librallatami pichca cullquipi c'aturcacuna.

²⁶ Chai punllacunapimi israelcunata jatun mandaj pirca jahuata puricujpi shuj huarmica: –¡Jatun mandaj ñuca amito, quishpichihuayari!– nishpa caparirca.

²⁷ Shina nijpi jatun mandajca: –Mandaj Dios canta mana ayudajpica, ñucacarin maitataj ayudai tucushari. Trigo p'utsatapish, uvata capinatapish mana charinichu nishpaca,

²⁸ jatun mandajca: ¿Imataj tucunguiyari?– nijpi, chai huarmica: –Cai huarmimari ñucataca: Cambaj churita cunan huañuchishpa micushun. Cayaca ñuca churita micushunllami nirca.

²⁹ Shina nijpimi ñuca churitaca yanushpa micurcanchij. Cayandij punlla paipaj churita micungapaj caiman apamui nijpica, paica paipaj churita pacashpamari mana apamun– nircami.

³⁰ Chai huarmi chashna nijta jatun mandaj uyashpaca, pai churarishca churanata lliquirishpa, pirca jahuata puricujpimi, ucutaca cañamazuta churashca cashcata tucuicuna ricurcacuna.

³¹ Jatun mandajca: “Safatpaj churi Eliseota cunan punllataj cungata mana p'itijpica, Mandaj Dios ñucata jatunta llaquichichun” nishpami sinchita caparirca.

³² Eliseoca paipaj quiquin huasipimi tiyacurca. Paihuanca tucui cunaj yuyajcunami chaipi tiyacurcacuna. Chaimanmi jatun mandajca, shuj runata cacharca. Chai huillaj runa manaraj paipajman chayajpimi, Eliseoca cunaj yuyajcunataca: –Huañuchij runa cachashca ñuca umata p'itinaman shamujtaca ¿manachu ricunguichij? Pai shamujta chaparashpa pai chayamujpica punguta huichcashpa ama yaicuchinguichij. Paipaj amopish paita catishpa shamucujpi paipaj chaqui sarushca uyarijtaca ¿manachu uyanguichij?– nircami.

³³ Cunaj yuyajcunahuan Eliseo rimacujpirajmi huillaj runa paipajman chayamushpaca: –Cai llaquitaca, Mandaj Diosllatajmi cachashca. Chaimanta Mandaj Diostaca imapajtaj ashtahuan shuyanari– nirca.