2 REYES 25 - Dios Rimashca Shimicunami

Jerusalén pueblo urmashcami

¹ Sedequías Judá llajtata iscun huatata ña mandacujpi, chai huatapaj chunga quillapi, chai quillapaj chunga punllapimi, Babilonia llajtata jatun mandaj Nabucodonosorca, Jerusalenta llaquichingapaj paipaj tucui soldadocunandij shamushpa chai pueblo muyundijta shayarircacuna. Chaipica tucui pueblo muyundijtami macanacungapaj torrecunata shayachircacuna.

² Sedequías chunga shuj huatata mandacuncamami chai pueblo muyundijta muyunchishca carcacuna.

³ Chai huatapaj chuscu quilla iscun punllapica, Jerusalenpica ima micuna illajpi imata mana micuipajmi tucurcacuna.

⁴ Chaimi chai pueblopaj jatun pircata jutcushpaca macanacuj runacunaca tuta llujshishpa miticushpa rircacuna. Paicunaca caldeocuna chai pueblo muyujpi cajllapitajmi jatun mandajpaj huerta ladopi caj ishqui pircapaj punguman rina ñanta miticushpa rircacuna. Jatun mandajca Arabá pambaman rina ñantami rirca.

⁵ Chashna rijpipish Caldeo soldadocunaca jatun mandajta catishpa rishpami, Jericó pueblo pambapi prezu japircacuna. Tucui paipaj soldadocunaca caita chaitami rircacuna.

⁶ Jatun mandaj Sedequiasta prezu japishpaca, Babilonia llajtata jatun mandaj Ribla pueblopi cajpimi chaiman aparcacuna. Chaipimi Sedequiasta ima shina llaquichinata mandarca.

⁷ Sedequiaspaj churicunataca, Sedequías ricucujpimi cungata p'itichircacuna. Sedequiastaca ñahuicunata surcushpa, cadenacunahuan huatashpami Babiloniaman aparcacuna.

Diospaj huasita urmachishpa judacunata prezu apashcami

⁸ Nabucodonosor Babilonia llajtata chunga iscun huatata ña mandacujpi, chai huatapaj pichca quilla, chai quillapaj canchis punllapimi, Babilonia llajtata jatun mandajpaj cuidaj soldadocunata mandaj, paipajta ruraj Nabuzaradanca Jerusalenman shamurca.

⁹ Paimi Mandaj Diospaj huasitapish, mandashpa tiyana huasitapish, Jerusalenpi caj huasicunatapish, jatun mandaj churashca mandajcunapaj huasicunatapish tucuita rupachirca.

¹⁰ Cuidaj soldadocunata mandaj Nabuzaradanhuan shamuj Caldeo soldadocunaca, Jerusalén muyundij jatun pircatapish urmachircacunami.

¹¹ Chashna rurashca q'uipami, cuidaj soldadocunata mandaj Nabuzaradanca, Jerusalenpi mana huañushpa puchushcacunatapish, Babilonia llajtata jatun mandajpaj maquipi curishcacunatapish, imatapish ruranata yachajcunatapish Babiloniaman prezu aparca.

¹² Chashna apashpapish cuidaj soldadocunata mandaj Nabuzaradanca, huajchacunallatami uva chagracunapi, allpapi trabajachun chaillapitaj saquirca.

¹³ Caldeocunaca Mandaj Diospaj huasipi caj ishqui jatun bronce pilarcunatapish p'aquishpa, Mandaj Diospaj huasipi caj carretacunatapish, chai jahuapi yacuta churanapaj churashca bronce pailatapish imallami bronce cajcunataca tucuitami Babiloniaman aparca.

¹⁴ Shinallataj mangacunatapish, paletacunatapish, rupashca mechacunata anchuchinacunatapish, cucharoncunatapish, broncemanta cajhuan imallata ruranacunataca chaipurallatami tucuita aparca.

¹⁵ Shinallataj inciensota rupachinacunatapish, jatun tazacunatapish, curimanta rurashcacunataca curipurallata, cullquimanta rurashcacunataca cullquipurallata tandachishpami, cuidaj soldadocunata mandajca tucuita aparca.

¹⁶ Mandaj Diospaj huasipaj Salomón rurashca ishqui jatun pilarcunata, yacuta churana pailata, chaita aparij carretacunapish mashnata pezashcataca mana yachai tucuipajmi carca.

¹⁷ Chai pilarca pusaj metro chunga centímetro altomi carca. Chai jahuapica quimsa chunga pichca centímetro altota charij broncemanta rurashca capitelmi tiyarca. Chai capitelca broncemanta rurashca linchitajllahuan pilluchishca, chai muyundijtapish broncemanta rurashca granadacunata huarcuchishcami carca. Caishuj pilarpish chashnallatataj rurashcami carca.

¹⁸ Cuidaj soldadocunata mandaj soldadoca, curacunata mandaj Seraías curata, paipaj cati mandaj Sofonías curata, platocunata cuidaj quimsa runacunatapishmi prezu aparca.

¹⁹ Chai pueblomantaca macanacunata alli yachajcunata mandaj soldadota, chai pueblopi caj jatun mandajman yuyaita cuj pichca runacunata, chai llajtapi causajcunapaj shuticunata quillcashpa charij punta quillcaj soldadota, chai pueblollapitaj caj sujta chunga c'aricunatapishmi prezu aparca.

²⁰ Tucui chaicunatami cuidaj soldadocunata mandaj Nabuzaradanca, Babilonia llajtata jatun mandajpajman Ribla puebloman aparca.

²¹ Babilonia llajtata jatun mandajca Hamatpi caj Ribla pueblopimi paicunataca huañuchirca. Chashnami Judá llajtapi causajcunaca paicunapaj llajtamanta shujtaj llajtaman prezu apashca carca.

Mana huañushpa puchushcacuna Judá llajtapi cajcunaca Egiptoman miticushpa rishcami

²² Babilonia llajtata jatun mandaj Nabucodonosorca, mana huañushpa puchushca Judá llajtapi cajcunata mandachunca, Safanpaj nieto Ahicampaj churi Gedaliastami churarca.

²³ Babilonia llajtata jatun mandajca, Judá pueblota mandaj cachunca Gedaliastami churashca nijta uyashpami, Judá llajta soldadocunata mandajcunapish tucui gentecunapish Mizpa puebloman Gedaliaspajman shamurcacuna. Paicunahuanca Netaniaspaj churi Ismael, Carea runapaj churi Johanan, Netofa pueblopi causaj Tanhumet runapaj churi Seraías, Maacamanta caj shuj runapaj churi Jaazaniaspishmi rircacuna.

²⁴ Chaipimi Gedaliasca: “Caldeocunapajta rurashpa causanataca ama manchaichijchu. Cai llajtapi causashpa Babilonia llajtata jatun mandajpajta rurashpa causaichijlla. Chashna rurashpaca, allimi causanguichij” nishpami, soldadocunata mandajcunamanpish tucui paicunapaj cajcunamanpish chaica chashnatajmi canga nishpa ari nirca.

²⁵ Gedalías canchis quillata ña mandacujpimi, Judá llajtata jatun mandajpaj familiapura caj Elisama runapaj nieto Netaniaspaj churi Ismaelca chunga runacunandij Mizpa puebloman shamurca. Chaipimi Gedaliastapish, Judá llajtallamantataj paihuan chaipi causacujcunatapish, paihuan caj Caldeocunatapish huañuchirca.

²⁶ Caldeocunata manchashcamantami chai pueblopi causajcunaca uchillacunamanta callarishpa, jatuncunacama soldadocunata mandajcunandij Egiptoman rircacuna.

Joaquintaca carcelmanta llujshichishpa Babilonia llajtapi alli nishcami

²⁷ Judá llajtata jatun mandaj Joaquín Babilonia llajtapi quimsa chunga canchis huatata ña prezu cajpimi, Babilonia llajtataca Evil-merodac mandai callarirca. Pai mandai callarishca chai huatapaj chunga ishqui quilla, chai quillapaj ishqui chunga canchis punllapimi, Judá llajtata jatun mandaj Joaquintaca prezumanta llujshichirca.

²⁸ Chaipimi Evil-merodacca Judá llajtata jatun mandajtaca Babilonia llajtapi paihuan caj jatun mandajcunatapish yalli jatun mandaj canapi churashpa, sumaj shimicunahuan rimarca.

²⁹ Chaimi Joaquinca prezupi tiyacushpa churashca churanata llujshichishpa, shujtaj churanata churarirca. Paica paipaj tucui causaipimi jatun mandajhuan micuj carca.

³⁰ Jatun mandajca, Joaquinmanca punllantami pai micunapajca tucuita cuj carca.