2 REYES 23 - Dios Rimashca Shimicunami

¹ Shina nijpica jatun mandaj Josiasca, Judapi caj, Jerusalenpi caj cunaj yuyajcunata paipaj ñaupajman tandachichunmi mandarca.

² Chai q'uipami jatun mandajca, Judapi tucui causajcunandij, Jerusalenpi tucui causajcunandij Mandaj Diospaj huasiman huichiyarca. Chaicunaca curacuna, profetacuna, uchillacunamanta callarishpaca jatuncunacamami tucuicuna huichiyarcacuna. Dioshuan ari ninacushca librota Mandaj Diospaj huasipi japishcatami tucuicunapaj ñaupajpi paicuna uyajta rezarca.

³ Ña rezashca q'uipaca jatun mandajca, pilar c'uchupi shayarishpami, Mandaj Diosllata catinata paihuan ari ninacushpaca, can mandashcacunataca huaquichishunmi, can ima shina cashcata ricuchishpa causachun nishcatapish pajtachishunmi, can chaitataj pajtachichun nishcatapish tucui shunguhuan tucui almahuanmi pajtachishun. Cai libropi quillcashpa pajtachingapaj ari ninacushcatapish pajtachishunmi nirca. Chaitaca tucuicunami allimi nishpa ari nircacuna.

Rurashcalla dioscunata Josías chingachishcami

⁴ Chai q'uipami jatun mandaj Josiasca, curacunata jatun mandaj Hilciastapish, q'uipa mandaj curacunatapish Diospaj huasi pungupi cuidajcunatapish: “Baalpaj, Aserapaj, jahua pachapi tiyaj luzerocunapaj imallata ruranacuna cashcata Mandaj Diospaj huasimanta llujshichichij” nirca. Shina nijpi llujshichishpaca Jerusalenmanta carupi caj Cedrón pambapimi rupachircacuna. Chai ushpataca, Bet-elpi shitachunmi cacharca.

⁵ Chai q'uipaca, rurashcalla dioscunapaj curacunatami anchuchirca. Chaicunaca Judapi caj lomacunapi, Jerusalén muyundijcunapi tiyaj altarcunapi inciensota rupachichun Judá llajtata jatun mandajcuna churashcami carca. Shinallataj Baalmanpish, intimanpish, lunamanpish, zodiaco nishcata ricuchijcunamanpish, jahua pachapi tiyaj tucui luzerocunamanpish inciensota cushpa rupachij curacunatapishmi anchuchirca.

⁶ Asera huarmi diosman rijchajtapish Mandaj Diospaj huasimanta llujshichichishpami Jerusalenmanta caruman caj Cedrón pugru pambaman apashpa chaipi rupachirca. Ña tucui ushpa tucujpica, huajchacuna huañujpi pambashca jahuatami shitachirca.

⁷ Mandaj Diospaj huasipi rurashcalla dioscunata adorana altarcunatapishmi urmachirca. Chaillapitaj huainayajcuna cashcatapishmi anchuchirca. Chaipica huarmicunami, Asera huarmi diospaj churanacunata ahuashpa tiyajcuna carca.

⁸ Judá llajta pueblocunapi caj tucui curacunatapish tandachishpami, lomacunapi tiyaj altarcunapi chai curacuna inciensota rupachina altarcunataca, Geba pueblomanta callarishpa, Beerseba pueblocama tucuita yangata rurarca. Pueblota mandaj Josuepaj nishca pungu c'uchupi tiyaj altarcunatapishmi urmachirca. Chai altarcunaca puebloman yaicuna pungu lluqui ladomanmi carca.

⁹ Lomacunapi tiyaj altarcunapaj curacuna cashca curacunaca, Jerusalenpi caj Mandaj Diospaj huasipi caj altarmanca mana huichiyarcacunachu. Chai curacunapurallami levadura illajlla tandata micujcuna carca.

¹⁰ Josiasca, Hinompaj churipaj pugru pambapi tiyaj Tofet altartapishmi yangata rurarca. Pi ama paicunapaj churita cashpa ushushita cashpa Moloc Diosman cushpa ña ama rupachichunmi chashna rurarca.

¹¹ Judá llajtata jatun mandajcuna intiman cushca caballocuna Mandaj Diospaj huasiman yaicuna pungu ladopi shayacujcunatapishmi anchuchirca. Intiman cushca carrocunatapishmi rupachirca. Chaicunaca Natán-melec eunuco runa causacun huasi c'uchupimi carca. Chai runaca pueblo muyundij michina pambacunata cuidajmi carca.

¹² Jatun mandaj Josiasca Acazpaj huasi jahuapi tiyaj altarcunatapishmi urmachirca. Chai altarcunataca Judá llajtata jatun mandajcunami rurachishca carca. Mandaj Diospaj huasi canlla ishquindij lado uripi Manasés rurachishca altarcunatapishmi urmachirca. Chai ñutushcacunataca Cedrón yacu huaicupimi shitarca.

¹³ Jatun mandaj Josiasca Jerusalén ch'imbapurapi caj chingarinapaj urcu alli ladopi caj altarcunatapishmi yangata rurarca. Chai altarcunataca israelcunata jatun mandaj Salomonmi sidoniocunapaj Astoret millanana rurashcalla diosta, moabitacunapaj Quemos millanana rurashcalla diosta, amonitacunapaj Milcom millanana rurashcalla diosta yuyarichun rurachishca carca.

¹⁴ Rumimanta imamanpish rijchajta rurashcacunatapish p'aquircami. Asera huarmi diosman rijchajcunatapish urmachircami. Chaicuna tiyashcapica huañushcacunapaj tullucunatami jundachirca.

¹⁵ Bet-elpi tiyaj altarcunatapish urmachircami. Nabatpaj churi Jeroboam lomacunapi altarcunata rurachishpa israelcunata juchallichishca altarcunatapish urmachircami. Lomacunapi tiyaj altarcunata urmachishpaca, ushpayajtami rupachirca. Asera huarmi diosman rijchajtapish rupachircami.

¹⁶ Josiasca tigralla ricushpaca, chai lomapica huañushcacunata churashca jutcucunata ricushpami, chai jutcucunamanta huañushcacunapaj tullucunata llujshichichishpa altar jahuapi rupachishpa chai altarcunataca yangata rurarca. Mandaj Dios paipaj runaman cashna tucuna cashcata huillachishca shinallataj pajtarca.

¹⁷ Chai q'uipaca Josiasca: –Chai pircaca ¿pita ricuchijtagari?– nijpi, chai pueblopi cajcunaca: –Chaipica Diospaj runata pambashcami. Paimi Judá llajtamanta shamushpa Bete-elpi caj lomacunapi caj altarcunata can cunan urmachina cashcataca huillarca– nircacunami.

¹⁸ Shina nijpi Josiasca: –Chai tullucunataca saquichijlla pi ama cuyuchinguichijchu– nirca. Chaimi paipaj tullucunapish, Samariamanta caj profetapaj tullucunapish pi mana cuyuchishca saquirirca.

¹⁹ Josiasca Samaria llajtapi caj pueblocunapi caj lomacunapi rurashcalla dioscunapaj huasicunatapish anchuchircami. Chaicunataca israelcunata jatun mandajcunami Mandaj Diosta yallitaj p'iñachingapaj rurachishca carca. Josiasca chaicunataca Bet-elpi ima shinami chingachirca chai shinallatajmi rurarca.

²⁰ Lomacunapi tiyaj altarcunapaj curacuna chaipi cajcunataca chai altarcuna jahuallapitajmi huañuchirca. Chai jahuapica gentecunapaj tullucunata rupachishpami Jerusalenman tigrarca.

Pascua punlla micuita Josías rurachishcami

²¹ Chai q'uipami jatun mandaj Josiasca tucui israelcunataca: “Cancunata Mandaj Dioshuan ari ninacushca cai libropi nicushca shinataj cancunata Mandaj Diosta yuyarishpa Pascuata ruraichij” nishpami mandarca.

²² Israelcunata juezcuna mandacui punllacunamanta pacha, chai juezcunapish, Israel llajtata jatun mandajcuna mandacui punllacunapish, Judá llajtata jatun mandajcuna mandacui punllacunapish chai shina Pascuataca mana rurarcacunachu.

²³ Josías ña chunga pusaj huatata mandacujpimi, Mandaj Diosta yuyarishpa chai Pascuataca Jerusalenpi rurarcacuna.

Josiasca tucui shunguhuantaj Diospajta rurashcami

²⁴ Josiasca muspachij yumbucunatapish, adivinajcunatapish, terafín nishca dioscunatapish, tucui imapish millananacunataca Judá llajtapi, Jerusalén pueblopi pai ricushcacunataca tucuitami p'ichajta anchuchirca. Mandaj Diospaj huasipi Hilcías cura japishca libropi tiyacuj mandashcacunata tucui pajtachingapajmi, chashna rurarca.

²⁵ Jatun mandaj Josías shina Moisés mandashcapi nishca shinataj tucui shunguhuan, tucui almahuan, tucui fuerzahuan mana alli ruracushcata saquishpa Mandaj Diospajlla tucujca pi mana tiyarcachu. Paipaj q'uipapish pi mana huacharircachu.

²⁶ Josías chashna rurajpipish, Judá llajtata jatun mandaj Manasés yallitaj millaita rurashpa Mandaj Diosta yallitaj p'iñachishcamantaca, pai nina sindirij shina yallitaj jatunta p'iñarishcamantaca judacunahuanca mana alli tucusha nircachu.

²⁷ Chashna cashpami Mandaj Diosca: “Judacunataca, israelcunata ñuca ñaupajmanta anchuchishca shinallatajmi anchuchisha. Ñuca agllashca pueblo Jerusalentaca shitashcatami saquigrini. Jerusalenpi caj huasipimi ñuca shutica canga nishcatapish anchuchigrinimi” nirca.

Josías huañushcami

²⁸ Josías ashtahuan imallata rurashca, tucui pai imallata rurashcataca ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

²⁹ Chai punllacunallatajmi Egipto llajtata jatun mandaj Necao faraonca Asiria llajtata jatun mandajhuan tupangapaj Éufrates jatun yacu c'uchuman huichiyarca. Chaimi jatun mandaj Josiaspish paihuan macanacungapaj llujshirca. Chaipimi Egipto llajtata jatun mandajca, paita ricushcahuan Meguido pueblopi huañuchirca.

³⁰ Chaipimi paipajta rurajcunaca shuj carropi churashpa, Meguidomanta huañushcata Jerusalenman apamushpa, pai rurachishca jutcullapitaj churarcacuna. Judá llajtacunaca Josiaspaj churi Joacazta jatun mandaj cachun aceitehuan umapi churashpami, paimi paipaj yayapaj randi jatun mandaj nishpa caparircacuna.

Judá llajtata Joacaz mandashcami

³¹ Joacazca, Judá llajtata mandai callarinapajca, ishqui chunga quimsa huatayujmi carca. Paica quimsa quillallatami Jerusalenpi mandarca. Paipaj mamaca, Libnamanta caj Jeremiaspaj ushushi Hamutal shutimi carca.

³² Joacazca, paipaj ñaupa yayacuna millaita rurashca shinallatajmi, Mandaj Diospaj ñaupajpica millaita rurarca.

³³ Joacaztaca Jerusalenpi ama ashtahuan mandachunmi Necao faraonca Hamat llajtapi caj Ribla pueblopi prezu churarca. Chashna rurashpaca Judá llajtataca patsaj talento cullquita, asha curitami cuchirca.

³⁴ Necao faraonca, Josiaspaj randi mandaj cachunca, Josiaspaj churi Eliaquimtami jatun mandaj cachun churarca. Eliaquimtaca, Joacim shutitami shutichirca. Joacaztaca Egiptomanmi aparca. Chaipimi paica huañurca.

³⁵ Joacimca cullquitapish, curitapish faraón mashnata cuchun mandashca shinami curca. Faraón ima shina mandashca shina cullquita, curita cungapajca Judá llajtapi causajcuna mashna allpata charishcata ricushpa paicunata cobrashpami Necao faraonmanca cuj carca.

Judá llajtata Joacim mandashcami

³⁶ Joacimca Judá llajtata mandai callarinapajca ishqui chunga pichca huatayujmi carca. Paica chunga shuj huatatami, Jerusalenpi mandarca. Paipaj mamaca, Ruma pueblomanta caj Pedaías runapaj ushushi Zebuda shutimi carca.

³⁷ Joacimca, paipaj ñaupa yayacuna millaita rurashca shinallatajmi, Mandaj Diospaj ñaupajpica, millaita rurarca.