2 REYES 2 - Dios Rimashca Shimicunami

Eliasta jahua pachaman causajta apashcami

¹ Eliasca, Mandaj Dios paita shuj acapanapi jahua pachaman apasha nijpimi, Eliasca Eliseohuan Gilgalmanta shamucurca.

² Chaipimi Eliasca Eliseotaca: –Ñucataca Mandaj Diosca Bet-elmanmi cacharca. Cunanca canca caillapi saquiri– nijpi Eliseoca Eliastaca: –Mandaj Diosca causajmi. Canpish causajmi cangui. Canmantaca manataj saquirishachu– nijpica, Bet-elmanmi ishquindijllataj uriyarcacuna.

³ Chaipica profeta canata yachacuj Bet-elpi cajcuna Eliseota tupanaman llujshishpaca: –¿Canta yachachij Eliastaca, Mandaj Dios quichushpa cunan apana cashcataca yachanguichu?– nijpi Eliseoca: –Ari yachanimi. Chaitaca upalla caichijlla– nirca.

⁴ Eliasca cutinmi Eliseotaca: –Ñucataca Mandaj Diosca Jericomanmi cacharca. Cunanca canca caillapi saquiri– nijpi Eliseoca: –Mandaj Diosca causajmi. Canpish causacunguimi. Canmantaca manataj saquirishachu– nijpica Jericomanmi ishquindijllataj rircacuna.

⁵ Profeta canata yachacuj Jericopi cajcunapish Eliseopajman c'uchuyashpaca: –¿Canta yachachij Eliastaca, Mandaj Dios cunan quichushpa apana cashcataca yachanguichu?– nijpi Eliseoca: –Ari, chaitaca yachanillatajmi upalla caichijlla– nircami.

⁶ Chaipipish Eliasca cutinmi: –Ñucataca Mandaj Diosca Jordanmanmi cacharca. Cunantajca canca caillapi saquiripai– nijpi Eliseoca: –Mandaj Diosca causajmi. Canpish causacunguimi. Canmantaca manataj saquirishachu– nishpaca Jordanmanpish ishquindijllatajmi rircacuna.

⁷ Paicunaca Jordán yacu uripimi shayarircacuna. Chaipi cajpimi profeta canata yachacuj pichca chunga runacuna shamushpa, paicunapaj ch'imbanij carullapi shayarircacuna.

⁸ Chaipica Eliasca, paipaj jahua churanata japishpa doblashpa yacuta huajtajpimi, uriman huichiman yacu chaupirijpi chaquishca pambata ishquindij ch'imbarcacuna.

⁹ Ña ch'imbashpaca Eliasca Eliseotaca: –Cambaj c'uchumanta ñucata manaraj apajpi ¿cambajca imatataj rurachun? ningui. Chaita mañai– nijpimi Eliseoca: –Canpi tiyaj espiritumantaca, canpi tiyajmanta yallihuan saquihuai– nirca.

¹⁰ Shina nijpi Eliasca: –Mana rurai tucuipajtamari mañangui. Shina cajpipish, cambaj c'uchumanta ñucata anchuchigrijpi ricushpaca, chaita chasquinguimi. Ashtahuanpish mana ricushpaca, mana chasquinguichu– nircami.

¹¹ Paicuna chashna parlanacuihuan ricujpimi, nina lunyacuj caballocuna nina lunyacuj carrota aisashca shamushpa, ishqui ricujta ch'icanyachirca. Chaimi Eliasca shuj acapanapi jahua pachaman huichiyarca.

¹² Chaita ricushpami Eliseoca: “¡Ñuca yayalla, ñuca yayalla! ¡Canca israelcunapaj macanacuna carro shina, paicunapaj caballocunapi tiyarij soldadocuna shinamari carcangui!” nishpa caparirca. Chai q'uipaca, Eliastaca cutinca ña mana ricurcachu. Eliseoca, pai churarishca churanataca lliquishpa, ishquitami rurarca.

Eliseotaca Eliaspaj randi huillaj cachun churashcami

¹³ Chai q'uipaca, Eliasmanta urmashpa saquirishca churanata japishpami, Jordán yacullamantaj tigrashpa chai yacu uripi shayarirca.

¹⁴ Chaipimi, Eliasmanta urmashca churanata japishpa yacupi huajtashpaca: “Eliaspaj Taita Dios, Mandaj Dios ¿maipitaj canguiyari?” nishpa chai churanahuan yacuta cutin huajtajpi, chai yacuca ura ladoman janaj ladoman chaupirijpi, Eliseoca ch'imbarca.

¹⁵ Profeta canata yachacuj Jericomanta cajcuna, Jordán ch'imba ladoman shayacujcuna chaita ricushpaca: “Eliaspi tiyacushca espirituca, cunanca Eliseopimari tiyacun” ninacushpa paita tupanaman shamushpaca, paipaj ñaupajpimi cungurircacuna.

¹⁶ Chaipimi paicunaca: –Mandaj Diospaj Espíritu, canta yachachijta aparishpa ñataj mai urcupi, mai pugru pambapi shitagrishca canman. Cambajta rurajcunapurapica pichca chunga c'ari c'ari runacunami tiyanchij. Paicunata mashcanaman cachai– nijpi Eliseoca: –Pita ama cachaichijchu– nirca.

¹⁷ Chashna nijpipish “cachailla” nishpa nicujllapimi “shinashpaca cachaichigari” nirca. Chaimi paicuna pichca chunga runacunata cachajpi, paicuna rishpaca quimsa punllacama mashcashpapish, Eliastaca mana japircacuna.

¹⁸ Paicuna Jericoman Eliseopajman ña tigramujpica, Eliseoca: –¿Manachu ñucaca ama mashcagrichijchu nircani?– nircami.

Jayaj yacuta Eliseo allichishcami

¹⁹ Chaipimi Jericopi causajcunaca Eliseotaca: –Riqui, quiquin ñuca amo ricushca shinaca cai pueblo tiyacun pambaca sumajmari. Ashtahuanpish yacucunaca mana allichu, allpapish ima granota mana p'ucunchu– nircacuna.

²⁰ Chaimi Eliseoca: –Shuj mushuj mangata apamuichij. Chaipica cachita churaichij– nijpi paicunaca apamurcacuna.

²¹ Eliseoca, chaita japishpaca pugyucunaman rishpa, chai yacucunapi cachita shitashpaca: –Mandaj Diosca cashnami nin: Ñucami cai yacucunataca chuyayachini. Cunanca ña mana huañuchingachu, ña mana unguchingachu ninmi– nircami.

²² Chai yacucunaca Eliseo nishca shinallataj cunancamami chuya.

²³ Chai q'uipaca Eliseoca Bet-elmanmi rirca. Pai ñanta huichiyacujpimi, chai pueblomanta huambracuna llujshishpaca: “¡Lluchu umamari huichiyacun, lluchu umamari huichiyacun!” nishpa, chanzata rurarcacuna.

²⁴ Eliseo paicunata tigralla ricushpaca, Mandaj Diospaj shutipi llaqui tucushca canman nijpimi, sachamanta ishqui osocuna llujshishpa, chuscu chunga ishqui huambracunata cashtushpa mirga mirgata rurarca.

²⁵ Eliseoca Bet-elmantaca, Carmelo urcumanmi rirca. Chaimantaca Samariamanmi tigrarca.