2 REYES 19 - Dios Rimashca Shimicunami

Senaqueribpaj maquimanta judacunata quishpichishcami

¹ Chaita uyashpaca jatun mandaj Ezequiasca paipaj churanata lliquirishpa, cañamazuta churarishpami, Mandaj Diospaj huasiman yaicurca.

² Ezequiasca mayordomo Eliaquimtapish, quillcaj Sebnatapish, curacunata pushaj curacunatapish cañamazuta churarishcacunatami, Amozpaj churi profeta Isaiaspajman richun cacharca.

³ Paicunataca: “Ezequiasca cashnami nin nigrichij: Cunan punllaca c'amishcamanta yallitaj jatun llaquihuan llapishcami canchij. Huahua ña huacharinalla cajpi huachacuj mana fuerzata charij shinami canchij.

⁴ Rabsaces nishca mandaj tucui imalla nishcacunata Mandaj cambaj Taita Dios uyashpa paicunahuan p'iñaringapishchari. Paitaca Asiria llajtata jatun mandaj paipaj amomi causaj Diosta p'iñashpa c'amichun cachashca. Mandaj cambaj Dios chaita ña uyashcami. Mana huañushpa puchushca caipi caj israelcunamanta Diosta mañapai ninmi” nichunmi cacharca.

⁵ Jatun mandaj Ezequiaspajta rurajcuna Isaiaspajman shamushpa chaita huillajpimi,

⁶ Isaiasca: “Cancunapaj amomanca cashna nigrichij: Mandaj Diosca cashnami nin: Asiria llajtata jatun mandajpajta rurajcuna ñucata p'iñashpa c'amishcata uyashpapish ama manchaichu.

⁷ Ñucami paipica, shuj espirituta churasha. Chaimi paica caita chaita ninacucun bullacuna uyarijpi paipaj llajtaman tigranga. Paitaca paipaj llajtallapitajmi espadahuan huañuchichisha ninmi nigrichij” nircami.

⁸ Rabsaces nishca mandaj tigrashpaca, Asiria llajtata jatun mandajtaca Libna pueblopi causajcunahuan macanacucunpimi japigrirca. Laquismanta Libnaman rishcata uyashpami chaiman rircalla.

⁹ Chaipi cashpami, Asiria llajtata jatun mandajca Etiopiata jatun mandaj Tirhaca paihuan macanacungapaj llujshimushcata yachaj chayarca. Chaimi paica Ezequiaspajman paipaj randi parlanacujcunata cutinllataj cachashpaca:

¹⁰ “Judá llajtata jatun mandaj Ezequiastaca cashna ningui: Can shunguta churacushca Dios, Jerusalentaca Asiria llajtata jatun mandajpaj maquipica mana churashachu nishpa cambaj Dios umashcaca ama caichu.

¹¹ Asiria llajtata jatun mandajcuna tucui caishuj llajtacunata chingachishcataca canllataj uyashcanguimi. ¿Canllachu quishpirishami yuyacungui?

¹² Ñuca ñaupa yayacunaca Gozán, Harán, Resefpi causajcunata, Edén llajtapi caj Telasarpi causajcunata llaquichicujpica, chai llajtacunapaj dioscunaca mana quishpichi tucurcacunachu.

¹³ Hamat, Arfad, Sefarvaim, Hena, Iva pueblocunata jatun mandajcunapish ¿cunanca maitagari? ninguichij” nishpami cacharca.

¹⁴ Ezequiasca jatun mandajpaj randi cachashcacunapaj maquimanta japishpa chai quillcata rezashca q'uipaca, Mandaj Diospaj huasiman huichiyashpami, Mandaj Diospaj ñaupajpi tendishpa churarca.

¹⁵ Ezequiasca Mandaj Diospaj ñaupajpica cashna nishpami mañarca: “Israelcunata Mandaj Dios, querubincunapaj chaupipimi causangui. Canllamari tucui cai pacha llajtacunapaj Dios cangui. Jahua pachatapish, cai pachatapish canmi rurarcangui.

¹⁶ Mandaj Dioslla, cantaj uyahuayari. Mandaj Dioslla cambaj ñahuita pascashpa ricuhuayari. Causaj Diosta c'amishpa, Senaquerib quillcashpa cachashca shimicunata uyahuayari.

¹⁷ Mandaj Dioslla, Asiria llajtata jatun mandajcunaca shujtaj llajtacunataca tucui ima tiyashcacunandij chingachircacunatajmari.

¹⁸ Paicunapaj dioscunataca ninapimi rupachircacuna. Chaicunaca mana diostaj cajpi, ashtahuanpish runacuna rurashca rumi dioscuna, caspi dioscuna cajllapimi cashna chingachircacuna.

¹⁹ Cunanca Mandaj Dios, ñucanchij Dioslla quishpichihuayari. Tucui cai pacha llajtacunapi causajcuna quiquin Mandaj Dioslla Diostaj cashcata yachachunmi chai jatun mandajpaj maquimanta quishpichichun rogani” nishpami mañarca.

²⁰ Chaipimi Amozpaj churi Isaiasca, Ezequiasman cashna nichun cacharca: Mandaj Dios israelcunapaj Diosca: Asiria llajtata jatun mandaj Senaquerib imallata nishcata huillashpa, can ñucata mañashcataca uyanimi ninmi.

²¹ Senaquerib ima shina tucunata Mandaj Dios nishca shimicunaca caicunami: “Sionpi causajcunaca c'arita mana rijsij solteracuna shinami cantaca yanganchishpa asingacuna. Jerusalenpi causajcunaca umata cuyuchishpami cantaca callpachingacuna.

²² ¿Pitataj mana alli shimicunahuan rimarcangui? ¿Pita p'iñashpataj c'amircangui? ¿Pitataj caparirishpa c'ariyarcangui? ¿Pitataj jatun tucushca ñahuihuan ricurcangui? Israelcunapaj jucha illaj Diostami chashna rurarcangui.

²³ Huillajcunata cachashpami, Mandaj Diostaca cashna c'amichircangui: Ñuca achca carrocunahuanca jatun urcucunamanmi huichiyashcani. Mana huichiyaipaj Líbano urcumanpish huichiyashcanimi. Chaipi caj jatun cedro yuracunatapish p'itishami. Ashtahuan alli sumaj cipres yuracunatapish p'itishami. Ashtahuan carupimi causagrisha. Tucui laya q'uihuacuna tiyan yuracuna junda pambacunapimi tiyacusha ninguimi.

²⁴ Ñucallataj pugyuta allashpami shujtaj llajtacunapaj yacuta ubyarcani. Egiptopaj tucui jatun yacucunatapish ñuca chaquihuan sarushpami chaquichircani niricunguimi.

²⁵ Chashna tucunata ñaupa huatacunaman ñuca rurashcataca ¿manachu uyarcangui? Chashna tucunataca ñaupa huatacunamanmi ñuca yuyaipi charircani. Chashna canata cunan ñuca callarichijpimi, canca muyundijta jatun pircayuj pueblocunata urmachishpa rumi montoncunallata saquircangui.

²⁶ Chaimantami chai pueblocunapi causajcunaca fuerza illaj, musparishca yanga tucurcacuna. Paicunaca chagrapi tiyaj q'uihuacuna shina, llulluraj chagracuna shina, huasi jahuapi huiñashca q'uihua manaraj p'ucushpa chaquirij shinami tucurcacuna.

²⁷ Ñucaca can ima shina cashcatapish tucuitami yachani. Imallata ruracushcatapish tucuitami yachani. Ñucata yallitaj p'iñacushcatapish yachanimi.

²⁸ Ñucata p'iñashpa yallitajmi p'iñaringui. Chashna can jatun tucushcaca ñuca rinrinmanmi huichiyashca. Cunanca cambaj singapica fierro ipitami churachigrini. Cambaj shimipica frenotami amullichigrini. Chashna rurashpami, can maitami shamurcangui chai ñanllatataj tigrachishpa cachagrini” ninmi.

²⁹ Cai nishcacuna chashnataj tucunata yachachunca can Ezequiasmanca caicunahuanmi ricuchigrini: “Cai huataca ñau granocunallatami micunguichij. Cati huatapish ñau granocunallatatajmi micunguichij. Ishqui huatapaj q'uipa huataca tarpunguichijmi, tandanguichijmi. Uvacunatapish tarpunguichijmi. Chai grano p'ucushcataca micunguichijmi.

³⁰ Judapaj ailluca, miticushpa puchushcacunaca ucujtami sapiyanga. Jahuamanca alli granotami p'ucunga.

³¹ Jerusalenmantami mana huañushpa puchushcacuna llujshinga. Sión urcumantami quishpirishcacuna llujshinga. Tucuita Mandaj Diosca yallitaj c'uyaj cashpami chashna ruranga.

³² Chaimanta Asiria llajtata jatun mandajmantaca Mandaj Diosca cashnami nin: Cai pueblomanca mana yaicungachu, puntajlla caspillatapish mana shitangachu, escudota apashcapish mana shamungachu, cai pueblota llaquichingapaj baluartetapish mana shayachingachu.

³³ Pai shamushca ñanllatatajmi, tigrashpa ringa. Cai pueblomanca manataj yaicungachu. Mandaj Diostajmi chashna nini.

³⁴ Ñuca quiquinllatataj c'uyashcamanta, ñucapajta ruraj Davidta c'uyashcamanta, cai pueblo ama chingarichunca ñucami huaquichisha ninmi” nircami.

³⁵ Chai tutallatajmi Mandaj Diospaj ángel, Asiria llajta soldadocunapaj carpa huasicunaman rishpaca, 185.000 soldadocunata huañuchirca. Cayandij tutamanta jatarishpa ricunapajca tucuimi huañushca aichacunalla siricurca.

³⁶ Chaimi Asiria llajtata jatun mandaj Senaqueribca, Nínive puebloman tigrashpa chaipi saquirirca.

³⁷ Chaipica cashnami tucurca: Senaqueribca Nisroc diospaj huasipi paipaj diosta adoracujpimi, Adramelec, Sarezer paipaj churicuna espadahuan huañuchishpa, paicunaca Ararat llajtapi miticugrircacuna. Senaqueribpaj randica paipaj churi Esar-hadonmi mandarca.