2 REYES 15 - Dios Rimashca Shimicunami

Judá llajtata Azarías mandashcami

¹ Jeroboam Israel llajtata ishqui chunga canchis huatata ña mandacujpimi, Judá llajtata jatun mandaj Amasiaspaj churi Azariasca, Judá llajtata mandai callarirca.

² Azariasca mandai callarinapajca chunga sujta huatayujmi carca. Pichca chunga ishqui huatatami, Jerusalenpi mandarca. Paipaj mamaca, Jerusalenllamantataj Jecoliasmi carca.

³ Azariasca, tucui imapipish paipaj yaya Amasías shinallatajmi Mandaj Diospaj ñaupajpica, ima pandata mana rurarca.

⁴ Shina cashpapish, lomacunapi tiyaj altarcunapi israelcuna sacrificiota ruracushcamanta, inciensota rupachicushcamantarajca lomacunapi tiyaj altarcunataca mana anchuchi tucurcachu.

⁵ Chaimi Mandaj Diosca, chai jatun mandajtaca huañungacama lepra ungüihuan llaquichirca. Paica ch'ican huasipimi pailla causarca. Paipaj churi Jotammi mandana huasipi imalla rurana cashcata mingui tucushpa tucui gentecunata mandarca.

⁶ Azarías ashtahuan imalla rurashcata, tucui pai imalla rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

⁷ Azarías paipaj ñaupa yayacunahuan dormijpica, ñaupa yayacunata churashcallapitajmi, Davidpaj pueblopi churarcacuna. Paipaj randica paipaj churi Jotammi mandarca.

Israel llajtata Zacarías mandashcami

⁸ Azarías Judá llajtata quimsa chunga pusaj huatata ña mandacujpimi, Jeroboampaj churi Zacariasca, Israel llajtata mandai callarirca. Paica sujta quillallatami, israelcunataca mandarca.

⁹ Paica paipaj ñaupa yayacuna shinallatajmi Mandaj Diospaj ñaupajpica, millaita rurarca. Nabatpaj churi Jeroboam juchallishpa israelcunata juchallichishca shina juchallinataca mana saquircachu.

¹⁰ Paitaca Jabes runapaj churi Salummi, shujtajcunahuan huashalla yuyarinacushpa, tucuicunapaj ñaupajpi paita huañuchishpa pai mandaj tucurca.

¹¹ Zacarías ashtahuan imalla rurashcata, ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

¹² Mandaj Diosca Jehutaca: “Cambaj churicunataca chuscu huahua huahuacunacamami israelcunata mandachun saquisha” nishcami carca. Chaica chashnatajmi pajtarca.

Israel llajtata Salum mandashcami

¹³ Judá llajtata Uzías quimsa chunga iscun huatata ña mandacujpimi, Jabespaj churi Salumca Israel llajtata mandai callarirca. Paica shuj quillallatami Samariapi mandarca.

¹⁴ Pai mandacujpica, Gadi runapaj churi Manahemca, Tirsamanta Samariaman huichi shamushpami Jabespaj churi Salumtaca Samariapi huañuchishpa pai mandaj tucurca.

¹⁵ Salum ashtahuan imalla rurashcata, shujtajcunahuan huashalla yuyarinacushpa Zacariasta huañuchishcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

¹⁶ Manahemca, Tifsa pueblotaca tucui chingachishpami chaipi imalla tiyashcatapish tucui aparca. Tirsa muyundijpi causajcunatapish chai pueblo punguta mana pascasha nijpimi chashnallataj rurashpa, chichu huarmicunatapish huijsacunata lliquirca.

Israel llajtata Manahem mandashcami

¹⁷ Judá llajtata Azarías quimsa chunga iscun huatata ña mandacujpimi, Gadi runapaj churi Manahemca, Israel llajtata mandai callarirca. Paica chunga huatatami Samariapi mandarca.

¹⁸ Paica Mandaj Diospaj ñaupajpica, millaitami rurarca. Nabatpaj churi Jeroboam juchallishpa israelcunata juchallichishca shina juchallinataca paipaj tucui causaipi mana saquircachu.

¹⁹ Asiria llajtata jatun mandaj Pul runaca israelcunahuan macanacungapajmi shamurca. Chaimi Manahemca israelcunata mandachunca paillatataj churachun 1.000 talento cullquita Pul runaman curca.

²⁰ Asiria llajtata jatun mandajman chai tucui cullquita cunapajca Manahemca, israelcunataca ashtahuan charijcunatami cada shujta pichca chunga siclo cullquita mañarca. Chaita cujpica Asiria llajtata jatun mandajca, Israelpi mana saquirishpa tigrarcallami.

²¹ Manahem ashtahuan imalla rurashcata, tucui pai imalla rurashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

²² Manahem paipaj ñaupa yayacunahuan dormijpica, paipaj randica paipaj churi Pekaiami mandarca.

Israel llajtata Pekaía mandashcami

²³ Judá llajtata Azarías pichca chunga huatata ña mandacujpimi, Manahempaj churi Pekaiaca, Israel llajtata mandai callarirca. Paica ishqui huatatami Samariapi mandarca.

²⁴ Paica Mandaj Diospaj ñaupajpica, millaitami rurarca. Nabatpaj churi Jeroboam juchallishpa israelcunata juchallichishca shina juchallinataca mana saquircachu.

²⁵ Pekaiataca Remaliaspaj churi Peka, paipaj soldadocunata mandajllatajmi shujtajcunahuan huashalla yuyarinacushpa mandana huasipi Samariapi huañuchirca. Paihuanca Argob, Arie runacunatapishmi huañuchirca. Galaadmanta pichca chunga runacunahuan tucushpa huañuchishpami, Pekaca mandaj tucurca.

²⁶ Pekaía ashtahuan imalla rurashcata, tucui pai imalla rurashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

Israel llajtata Peka mandashcami

²⁷ Judá llajtata Azarías pichca chunga ishqui huatata ña mandacujpimi, Remaliaspaj churi Pekaca, Israel llajtata mandai callarirca. Paica ishqui chunga huatatami Samariapi mandarca.

²⁸ Peka runaca Mandaj Diospaj ñaupajpica, millaitami rurarca. Nabatpaj churi Jeroboam, juchallishpa israelcunata juchallichishca shina juchallinataca mana saquircachu.

²⁹ Israel llajtata Peka mandacui huatacunami, Asiria llajtata jatun mandaj Tiglat-pileser shamushpaca, Ijón, Abel-bet-maaca, Janoa, Cedes, Hazor, Galaad, Galilea llajtacunata, Neftalipaj tucui llajtacunatapish japishpa chaipi causajcunataca tucuita Asiriaman prezu aparca.

³⁰ Uziaspaj churi Jotam, Judá llajtata ishqui chunga huatata ña mandacujpimi, Remaliaspaj churi Pekataca, Ela runapaj churi Oseas shujtajcunahuan huashalla yuyarinacushpa huañuchishpa pai mandaj tucurca.

³¹ Peka ashtahuan imalla rurashcata, tucui pai imalla rurashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

Judá llajtata Jotam mandashcami

³² Israel llajtata Remaliaspaj churi Peka ishqui huatata ña mandacujpimi, Uziaspaj churi Jotamca Judá llajtata mandai callarirca.

³³ Jotamca mandai callarinapajca ishqui chunga pichca huatayujmi carca. Paica Jerusalenpimi chunga sujta huatata mandarca. Paipaj mamaca Sadocpaj ushushi Jerusami carca.

³⁴ Jotamca, paipaj yaya Uzías shinallatajmi Mandaj Diospaj ñaupajpica, ima pandata mana rurarca.

³⁵ Chashna cashpapish, lomacunapi tiyaj altarcunapi israelcuna sacrificiota ruracushcamanta, inciensota rupachicushcamantarajca lomacunapi tiyaj altarcunataca mana anchuchi tucurcachu. Mandaj Diospaj huasi jahua lado pungutaca Jotammi rurarca.

³⁶ Jotam ashtahuan imalla rurashcata, tucui pai imalla rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

³⁷ Chai huatacunallapitajmi Mandaj Diosca, Judá llajtapi causajcunata llaquichichunca, Siria llajtata jatun mandaj Rezinta, Remaliaspaj churi Pekata cachanata callarirca.

³⁸ Jotam huañushpa paipaj ñaupa yayacunahuan dormijpica, ñaupa yayacunata churashcallapitajmi Davidpaj pueblopi churarcacuna. Paipaj randica paipaj churi Acazmi mandarca.