2 REYES 14 - Dios Rimashca Shimicunami

Judá llajtata Amasías mandashcami

¹ Joacazpaj churi Joás israelcunata ishqui huatata ña mandacujpimi, Judá llajtata jatun mandaj Joaspaj churi Amasiasca mandai callarirca.

² Amasiasca mandai callarinapajca ishqui chunga pichca huatayujmi carca. Paica ishqui chunga iscun huatatami Jerusalenpi mandarca. Paipaj mamaca Jerusalenllamantataj Joadán shutimi carca.

³ Amasiasca, paipaj ñaupa yaya David rurashca shina mana rurashpapish Mandaj Diospaj ñaupajpica ima pandata mana rurarcachu. Paipaj yaya Joás rurashca shinami tucuita rurarca.

⁴ Chashna cashpapish Amasiasca, lomacunapi tiyaj altarcunataca israelcuna chaipi sacrificiocunata cucushcamanta, inciensota rupachicushcamantarajca lomacunapi tiyaj altarcunataca mana anchuchi tucurcachu.

⁵ Amasiasca pai ima shina mandanata tucuita allichishpami, paipaj yaya jatun mandajta huañuchij paipaj yayapajta rurajcunataca tucuicunata huañuchirca.

⁶ Moisés mandashcapi nishca shinallatajmi paipaj yayata huañuchijcunapaj churicunataca mana huañuchirca. Chai mandashcapica Mandaj Diosca: “Yaya mamapaj juchamantaca huahuacunataca ama huañuchingui. Huahuacunapaj juchamantapish, yaya mamataca ama huañuchingui. Maijanpish millaita rurajca, chai millaimantaca paimi huañunga” nicunmi.

⁷ Amasiasca cachi tiyan pugru pambapi, 10.000 edomitacunata huañuchishpami Sela pueblotaca quichurca. Chai pueblotaca, Jocteeltami shutichirca. Cunancama chai shutillatajmi.

⁸ Amasiasca, Joacazpaj churi Jehupaj nieto israelcunata jatun mandaj Joaspajmanca: “Ñahui ñahui ricunacungapaj shamui” nichunmi huillashpa purijcunata cacharca.

⁹ Ashtahuanpish israelcunata jatun mandaj Joasca Judá llajtata jatun mandaj Amasiasmanca: “Líbano urcupi tiyaj uchilla casha yurami, Líbano urcullapitaj tiyaj cedro yurataca: Cambaj ushushita ñuca churipaj huarmi cachun cui nichun cacharca. Shina nijpica chai Líbano urcupi causaj sacha animalcuna shamushpami chai casha yurataca sarushpa pasarcacuna.

¹⁰ Edom llajtataca misharcanguitajmari. Chaimantami cambaj shungupica jatun tucungui. Ashtahuanpish cushicushpa cambaj huasipi saquirilla. Cambajpish can mandacun llajtapaj llaquipajllatajca ¿ima nishpataj llaquita mashcacungui?” nichunmi cacharca.

¹¹ Shina nijpipish, Amasiasca mana cazurcachu. Chaimi israelcunata jatun mandaj Joasca, Judá llajtapi caj Bet-semesman uriyashpa, Amasiashuan ñahui ñahui ricunacurca.

¹² Chai macanacuipica, israelcunami Judá llajta soldadocunataca misharcacuna. Chaimi Judacunaca miticushpa, paicunapaj carpa huasicunaman callparcacuna.

¹³ Israel llajtata jatun mandaj Joasca chai Bet-semes pueblopimi, Judá llajtata jatun mandaj Amasiastaca prezu japirca. Amasiaspaj yayaca Joasmi carca. Joaspaj yayaca Ocoziasmi carca. Chai q'uipaca Jerusalenman shamushpami, Jerusalén muyundij jatun pircataca, 180 metrota urmachirca. Efraín pungumanta callarishpaca esquinapi caj pungucama urmachishpami,

¹⁴ Curitapish, cullquitapish, ima charinacunatapish, Mandaj Diospaj huasipi japishcatapish, mandana huasipi japishcacunatapish aparca. Jatun mandajpaj churicunatapish prezu japishpami Samariaman tigrarca.

¹⁵ Joás ashtahuan imalla rurashcata, tucui pai imalla rurashcata, pai c'ari c'ari cashcata, Judá llajtata jatun mandaj Amasiashuan macanacushcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

¹⁶ Joás huañushpa paipaj ñaupa yayacunahuan dormijpica, Israel llajtata jatun mandajcunata churashcallapitajmi, Samariapi churarcacuna. Paipaj randica paipaj churi Jeroboammi mandarca.

¹⁷ Judá llajtata jatun mandaj Joaspaj churi Amasiasca, Israel llajtata jatun mandaj Joacazpaj churi Joás huañushca q'uipaca, chunga pichca huatahuanmi causarca.

¹⁸ Amasías ashtahuan imalla rurashcata ashtahuan yachasha nishpaca, Judá llajtata jatun mandajcuna imallata rurashcata quillcashca libropimi ricuna.

¹⁹ Amasiastaca, Jerusalenpimi shujcuna huashalla yuyarinacushpa huañuchishun nircacuna. Chaimanta Laquisman miticushpa rijpipish, catishpami chai pueblopi japishpa huañuchircacuna.

²⁰ Paitaca caballocunapi Jerusalenman apashpami, Davidpaj pueblopi paipaj ñaupa yayacunata churashcallapitaj churarcacuna.

²¹ Judá llajtapi tucui causajcunaca, Amasiaspaj randi mandachunca paipaj churi Azariastami churarcacuna. Azariasca jatun mandaj tucunapajca, chunga sujta huatayujmi carca.

²² Amasías huañushpa paipaj ñaupa yayacunahuan dormijpica, Azariasmi Elat pueblota cutin shayachishpa Judá llajtallapajtaj cachun nirca.

Q'uipa Jeroboam Israel llajtata mandashcami

²³ Joaspaj churi Amasías Judá llajtata, chunga pichca huatata ña mandacujpimi, israelcunata jatun mandaj Joaspaj churi Jeroboamca Israel llajtata mandai callarirca. Paica chuscu chunga shuj huatatami Samariapi mandarca.

²⁴ Jeroboamca Mandaj Diospaj ñaupajpica, millaitami rurarca. Nabatpaj churi Jeroboam juchallishpa israelcunata juchallichishca shina juchallinataca mana saquircachu.

²⁵ Jeroboamca israelcunata Mandaj Dios paipajta ruraj Jonasman huillachishca shinallatajmi Israel llajtapaj lindecuna maillata cashcataca Hamat pueblo yaicunamanta callarishpaca, Arabá cuchacama allichishpa israelcunapajllataj cachun churarca. Jonasca Amitaipaj churi Gat-hefer pueblomanta profetami carca.

²⁶ Israelcunaca shujtajpajta rurajcuna cashpapish, mana rurajcuna cashpapish jatun llaquihuan cajta, pi ayudajpish mana tiyashcatami Mandaj Diosca ricurca.

²⁷ Mandaj Diosca Israel shutitaca cai pachamanta p'ichajta mana anchuchisha nishpami, Joaspaj churi Jeroboamta paicunata quishpichichun churarca.

²⁸ Jeroboam ashtahuan imalla rurashcata, tucui pai imalla rurashcata, pai c'ari c'ari cashcata, jatun macanacuita rurashcata, Damasco pueblo, Hamat pueblo Judacunapaj cashcatapish cutin Israelpaj cachun tigrachishcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

²⁹ Jeroboam paipaj ñaupa yayacunahuan dormijpica, Israel llajtata jatun mandajcunata churashcallapitajmi churarcacuna. Paipaj randica paipaj churi Zacariasmi mandarca.