2 REYES 12 - Dios Rimashca Shimicunami

Judá llajtata Joás mandashcami

¹ Israel llajtata Jehú ña canchis huatata mandacujpimi, Joasca Judá llajtata mandai callarirca. Paica chuscu chunga huatatami Jerusalenpi causashpa mandarca. Paipaj mamaca, Beersebamanta Sibia shutimi carca.

² Joasca ima shina Dios munashca shina ruranata Joiada yachachijpica Joiadapaj tucui causaipimi Mandaj Diospaj ñaupajpica ima pandata mana rurashpa causarca.

³ Shina cashpapish, lomacunapi tiyaj altarcunapi israelcuna sacrificiota ruracushcamanta, inciensota rupachicushcamantarajca lomacunapi tiyaj altarcunataca mana anchuchi tucurcachu.

⁴ Joasca curacunataca: –Mandaj Diospaj huasiman Diospajlla cachun cungapaj apamushca cullquita, Diospaj imata rurasha nishpa mana pajtachishcamanta cuna cashca cullquita cushcacunatapish, cunata munashpa cushcacunatapish, tucuita Mandaj Diospaj huasiman apamushcacunata tandachishpa,

⁵ curacuna chasquichij. Chai cullquitaca, cada huasi familia apamushcacunata chasquishpa, Diospaj huasita maillata allichina cashcata, uchilla pungucunatapish allichichinguichij– nircami.

⁶ Shina nijpipish, curacunaca jatun mandaj Joás ishqui chunga quimsa huatata mandacui huatacamapish Diospaj huasita allichina cashcacunataca manaraj allichircacunachu.

⁷ Chaimi jatun mandaj Joasca curacunata mandaj Joiadata, caishuj curacunatapish cayashpaca: –Diospaj huasita allichina cashcataca ¿ima nishpataj manaraj allichinguichij? Diospaj huasita allichipaj apamujcunapaj cullquitaca cunanmantaca ña mana cancunachu chasquina canguichij. Cancuna chasquishpa charicushcacunatapish Diospaj huasita allichinapaj cuichij– nircami.

⁸ Shina nijpica curacunata jatun mandajca, cullquita cujcunapaj maquimanta japinata saquishpa, Diospaj huasitapish ña mana paicuna allichina tucurcacunachu.

⁹ Chaimi curacunata jatun mandaj Joiadaca, shuj cajonta japishpa chai cajonpaj tapata jutcushpa altarmanta alli ladoman churarca. Mandaj Diospaj huasiman apamujcuna apamushca cullquitaca pungupi cuidaj curacuna japishpami, chai cullquitaca chai cajonpi tucuita churajcuna carca.

¹⁰ Chai cajonpi achca cullqui ña tandarishcata ricushpaca jatun mandajpaj quillcajhuan, curacunata mandaj curahuan tucushpa shamushpami Mandaj Diospaj huasipi tiyacuj cullquitaca sacopi churashpa apashpa yupajcuna carca.

¹¹ Chai yupashca cullquitaca Mandaj Diospaj huasita allichichun mingashcacunamanmi mashna minishtirishcata ricushpa cujcuna carca. Paicunami chai cullquitaca carpinterocunaman, imalla allichina cashcata allichijcunaman,

¹² albañilcunaman, rumita labrajcunaman pagarcacuna. Mandaj Diospaj huasita allichinapaj caspicunata, labrashca rumicunata, ima shujtaj illashcacunatapishmi randijcuna carca.

¹³ Mandaj Diospaj huasita allichingapaj apamushca cullquihuanca, chai huasillapitaj charingapaj cullquimanta rurashca tasacunata, rupashca mechacunata anchuchinacunata, jatun tasacunata, trompetacunata, curimanta cullquimanta rurashca ima shujtaj charinacunataca mana rurachircacunachu.

¹⁴ Chai cullquitaca, Mandaj Diospaj huasita allichinapajlla apamushca cashcataca chaita allichijcunaman cujpimi, Mandaj Diospaj huasitaca allichircacuna.

¹⁵ Chai huasita allichichun mingashcacunaman cullquita yupashpa cujcunaca, mingashcacunaca cashcata rurajcuna cajpimi, mashna minishtirishcata cushcataca mashna cullqui tucurishcata ricuchichunca mana mañajcuna carca.

¹⁶ Juchamanta cushca cullquitapish, ima pandata rurashcamanta cushca cullquitapish, Mandaj Diospaj huasipajca mana apajcunachu carca. Chai cullquica curacunapajllami carca.

¹⁷ Chai punllacunallatajmi, Siria llajtata jatun mandaj Hazaelca Gatpi causajcunahuan macanacungapaj huichiyashpa macanacushpa chai pueblota japirca. Hazaelca Jerusalenpi causajcunahuan macanacungapaj huichiyanatapishmi yuyarca.

¹⁸ Chaimi Judá llajtata jatun mandaj Joasca, Mandaj Diospaj huasipi Diospajta ruranapaj churashca charinacunata llujshichirca. Chaicunataca Josafat, Joram, Ocozías paipaj ñaupa yaya jatun mandajcuna Judá llajtata mandacushpa chaipi churashcacuna, paillatajpish chaipi churashcacunami carca. Shinallataj Diospaj huasipi, mandana huasipi huaquichishca tiyacuj curitapishmi llujshichirca. Chai tucuita tandachishpa, Siria llajtata jatun mandaj Hazaelman cuchun cachajpimi, chaita japishpa Hazaelca, Jerusalenmanta anchurirca.

¹⁹ Joás ashtahuan imalla rurashcata, tucui pai imalla rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

²⁰ Joastaca paipajta rurajcunallatajmi, shujtajcunahuan huashalla yuyarinacushpa, pugru pugrupi allpata jundachishpa rurashca huasipi huañuchircacuna. Sila puebloman uriyacujpimi,

²¹ Joastaca Simeatpaj churi Josacar, Somerpaj churi Jozabad paipajta rurajcunallataj chugrichishpa huañuchircacuna. Paitaca paipaj ñaupa yayacunata churashcallapitajmi, Davidpaj pueblopi churarcacuna. Paipaj randica paipaj churi Amasiasmi mandarca.