2 Pedro 3 - Dios Rimashca Shimicunami

Mandaj Jesús shamuna punllami

¹ C'uyashca crijcuna, caihuanca ishqui cutinmi quillcani. Ishquindij quillcapitajmi alli yuyachishpa cunashpa mapata ama yuyachun quillcani.

² Diospajlla caj profetacuna ñaupaman huillashcatapish Quishpichij Mandaj Jesús huillagri nishca apostolcuna cancunaman huillashcatapish alli yuyarichunmi quillcani.

³ Tucuimanta yallica, cashna tucunatami yachana canguichij. Q'uipa punllacunapica paicunapaj quiquin aicha munaicunata rurashpa, chanzata rurajcunami shamungacuna.

⁴ Chaicunaca: “¿Maitagari Cristo cutin shamushami nishcaca? Mana pajtanchu. Ñucanchij yayacunapish ñami huañushca. Tucui imalla tiyajcunata Dios rurashca pachamanta cunancama tucui imapish chashnallatajmari caticun” ningacunami.

⁵ Chashnacunaca callaripi Dios jahua pachata, cai pachatapish rimashpalla rurashcata cai pachataca yacumanta ch'icanyachishcata, yacullamantataj tiyashcataca manataj crincunachu.

⁶ Ñaupaman tiyaj cai pachapi causajcunapish chashnallataj mana crijpimi yacu juillu millpushca chingachirca.

⁷ Chashna cajpipish cunan tiyaj jahua pachapish, cai pachapish Dios rimajllapitajmi, ninahuan rupachinapaj ch'icanchishca tiyacun. Diosta mana rijsijcunata imalla rurashcata ricuchishpa chingachina punllapimi, chashna chingachinga.

⁸ Shina cajpipish c'uyashcacuna, Jatun Diospajca shuj punllallami huaranga huatacuna shina. Huaranga huataca shuj punlla shinalla cashcataca ama mana yachajcuna shina caichijchu.

⁹ Mandaj Jesusca ima nishpataj mana utca shamun nishpa maijancuna nicujpipish, mana paicuna yuyashca shinachu. Ashtahuanpish shujllapish ama chingarichun nishpa tucuicuna mana allita ruracushcata saquishpa cutirichun nishpa ñucanchijta llaquishcamantamari manaraj shamun.

¹⁰ Shina cajpipish Mandaj Jesús shamunaca mana yuyashcapimi, tutapi shuhua shamuj shina ñapish shamunga. Chaipica imalla tiyajcunapish jahua pachapish manchanayajta c'ulun nishpa cuyurishpa tucui imalla tiyajcunapish rupashpa chingaringami. Cai pachapish tucui ima tiyajcunandij rupachishcami canga.

¹¹ Tucuita chingachishcami canga. ¡Chaimanta Diospajlla tucushpa pai yuyailla causashpa,

¹² Dios shamuna punlla utca shamuchun nichij. Chai punllapica, jahua pachacunatapish rupachishpami shitanga. Chaipi imalla tiyajcunapish rupachishpa yacuyachishcami canga!

¹³ Ashtahuanpish ñucanchijca, pai rurasha nishca shinallataj mushuj jahua pachacunata, mushuj cai pachatami shuyacunchij. Chaipica tucuicunami cashcata rurajcunalla canga.

¹⁴ Chaimanta c'uyashcacuna, chashna canata shuyacushpaca, ima mapa illaj, pi mana juchachipaj, alli sumajta causacujta Dios japichun tucui imatapish allita rurana yuyailla ruraichij.

¹⁵ Ñucanchijta Mandaj Jesusca maijanpish quishpirichun nishpa mana utca shamushcata yuyaringuichij. Chashnallatajmi ñucanchij c'uyashca huauqui Pablopish Dios yuyaita cujpi quillcashca.

¹⁶ Pabloca pai quillcashcapica cazi tucui quillcacunapimi, chaicunallatataj yachachishca. Chaicunapica, maijan quillcacunaca mana jahualla entendipajmi. Chashnallataj cajpimi Dios Quillcachishca shujtaj quillcacunatapish mana yachaj, mana entendijcunaca paicuna chingarinapajllataj panda yachachincuna.

¹⁷ C'uyashcacuna caicunataca manaraj chashna tucujpi yachashcamanta millaicuna pandata yachachishcata uyashpa alli caticushcata saquishpa pajta paicunata catinguichijman.

¹⁸ Chaipaj randica, mana c'uyaipajta c'uyaj cashcata ñucanchijta Mandaj Quishpichij Jesucristota ashtahuan rijsishpa huiñaichij. Cunanpish, huiñai huiñaitapish paica sumajmari nishca cachun. Chashna cachun.