2 CRÓNICAS 8 - Dios Rimashca Shimicunami

Salomonca shujtaj ruranacunatapish rurashcami

¹ Salomonca, Mandaj Diospaj huasitapish, pai mandashpa tiyana huasitapish ishqui chunga huatapimi shayachirca.

² Chai q'uipami, Hiram paiman cushca pueblocunata allichirca. Chashna allichishpaca israelcunatami chaipi causachun churarca.

³ Chai q'uipaca, Soba llajtapi caj Hamat pueblopi causajcunahuan macanacushpa mishashpami, chai pueblotapish japirca.

⁴ Shinallataj shitashca pambapi caj Tadmor pueblotapish, granocunata huaquichina pueblocunatapishmi allichirca. Granocunata huaquichina pueblocunatapish, Hamat pueblo c'uchullapitajmi ñaupaman ña rurashca carca.

⁵ Shinallataj janaj lado Bet-horón pueblotapish ura lado Bet-horón pueblotapishmi allichirca. Chai pueblocunaca muyundijta jatun pircacunayuj, aldabacunata churashca jatun pungucunayujmi carca.

⁶ Chashnallataj Salomonca Baalat pueblotapish, tucui imallata minishtirishcacunata huaquichina pueblocunataca carrocunata huaquichinapajpish, caballocunapi tiyarij gentecuna causanapajpish, Jerusalenpipish Libanopipish, tucui pai mandacun llajtacunapimi pai imallata rurasha nishcataca tucuita rurarca.

⁷ Heteo, amorreo, ferezeo, jebuseo nishcacunapura saquirishcacunatami chashna rurachirca. Paicunaca mana israelcunami carca.

⁸ Chaicunaca israelcuna mana tucuita huañuchishcacunapaj huahua huahuacunami carca. Paicunatami Salomonca, impuestota pagachishpa charirca. Chaitaca cunan punllacamami chashna rurachicun.

⁹ Salomonca israelcunataca shujllatapish sinchi trabajocunapica mana churarcachu. Paicunataca macanacuiman rijcuna cachun, paipajta rurajcuna cachun, soldadocunata mandajcuna cachun, carrocunapi purij soldadocunata mandajcuna cachun, caballopi tiyarij soldadocunata mandajcuna cachunmi churarca.

¹⁰ Salomonpajta ruracuj runacunataca, 250 runacunami mandaj carca.

¹¹ Salomonca, faraonpaj ushushi paipaj huarmitaca, Davidpaj pueblomantaca paipaj cachun shayachishca huasimanmi pusharca. Salomonca, israelcunata jatun mandaj Davidpaj huasipi paipaj huarmi causanaca, mana alli cana cashcatami yuyarca. Mandaj Diospaj arca tiyashca huasicunaca Diospajlla cashcamantami chaimanta anchuchirca.

¹² Salomonca, Mandaj Diospaj paillataj rurashca altarpimi, Mandaj Diosman cushpa tucui rupachij carca. Chai altarca, Diospaj huasiman yaicuna corredor ñaupajpimi carca.

¹³ Moisés mandashcapi nicushca shinallatajmi, imata yuyarina fiesta punlla cajpipish, chai punllapi rupachina animalta rupachij carca. Samana punllacunapi mushuj luna punllacunapi, huatanta yuyarina quimsa ch'ican ch'ican fiesta punllacunapimi chashna rupachij carca. Chai fiesta punllacunaca: Levadura illajlla tandacunata micuna punllacuna, semana fiesta punllacuna, yura ramacunahuan ramadacunata rurana punllacunami carca.

¹⁴ Shinallataj curacunatapish Diospajta rurachunca, paipaj yaya David mandashca shinallatajmi huashan huashan shamushpa paipajta rurachun churarca. Levitacunatapish, curacunahuan Diosta alabachunpish, punllanta paicuna imallata rurana cashcata rurachunpishmi, chai ruranacunallapitaj churarca. Diospaj huasi punguta cuidajcunatapish tucui pungucunapimi, huashan huashan shamushpa cuidana cashca shinallataj churarca. Diospajta ruraj Davidllatajmi, chashna mandashca carca.

¹⁵ Curacunapish, levitacunapish, cullquimanta imallata rurashcatapish chashna tucuitami jatun mandaj David mandashca shinallataj rurarcacuna.

¹⁶ Salomonca pai imallata rurana cashcataca, Mandaj Diospaj huasipaj callari rumicunata churashca punllamantapacha tucui shayachingacamami tucuita rurachirca. Chashnami Mandaj Diospaj huasitaca tucui shayachirca.

¹⁷ Chai q'uipami, Edom llajtapi caj Ezión-geber, Elot shuti pueblocunaman rirca. Chai pueblocunaca Puca Cucha uripimi.

¹⁸ Hiramca, paipaj barcocunapica mama cuchata alli rijsij barcocunata purichij paipajta rurajcunataca, Salomonpajta rurajcunahuanmi cacharca. Paicunami Ofir puebloman rishpa chaimantaca, 450 talentota pezaj curita japishpa jatun mandaj Salomonpaj apamurcacuna.