2 CRÓNICAS 6 - Dios Rimashca Shimicunami

Salomonca Diospaj huasita Diosman mingashcami

¹ Chai q'uipami Salomonca: “Mandaj Diosca amsa p'uyupimi causasha nishcami.

² Shina cajpipish ñucaca can causachunca shuj huasitami shayachini. Chaipi huiñaita causachun” nircami.

³ Shina nishpa jatun mandajca, chaipi tandanacushca israelcunapajman muyurishpami Taita Dios allicunata cuchun nirca. Tucui tandanacushca israelcunami chaipi shayacurcacuna.

⁴ Chaipimi Salomonca: “Israelcunata Mandaj Taita Diosca alli nishca cachun. Ñuca yaya Davidman pai imallata rurasha nishcataca paipaj maquihuanmi pajtachishca, nishpami cashna nirca:

⁵ Ñuca agllashcacunata Egiptomanta llujshichimui punllamantapacha Israel aillucunapurapica maijan aillupaj maijan pueblota ñuca huasita shayachishpa chaipi ñuca shutita churachunca mana agllarcanichu. Shinallataj ñuca agllashca israelcunata pushaj cachunpish, maijanta mana agllarcanichu.

⁶ Shina cashpapish cunanca ñuca tiyana cachunca, cai Jerusalentami agllarcani. Shinallataj Davidtami ñuca pueblo israelta pushaj cachun agllarcani nishcami carca.

⁷ Ñuca yaya Davidca, israelcunata Mandaj Taita Diospaj shutipi huasita shayachinatami paipaj shungupica yuyarca.

⁸ Chashna cajpipish, Mandaj Diosllatajmi ñuca yaya Davidtaca: Canca cambaj shungupica ñuca shutipi huasita shayachinatami yuyashcangui. Cambaj shungupi chaita yuyashpaca, allitamari yuyashcangui.

⁹ Shina cajpipish chai huasitaca mana canchu shayachingui. Ashtahuanpish cambaj lomo tullumanta llujshishca cambaj churimi ñuca shutipi chai huasitaca shayachinga nishcami carca.

¹⁰ Mandaj Diosca pai nishcataca pajtachishcami. Chaimantami ñucaca pai nishca shinallataj, ñuca yaya Davidpaj randi shayarishpa israelcunata mandaj tucushpa jatun tiyarinapi tiyarircani. Israelcunata Mandaj Taita Diospaj shutipi shuj huasitapishmi shayachircani.

¹¹ Cai huasi ucupica, Mandaj Diosllataj israelcunahuan ari ninacushca quillcata huaquichishca tiyacun arcatami churarcani” nircami.

¹² Chai q'uipaca Salomonca, Mandaj Diospaj altar ñaupajpi, tucui israelcuna tandanacushcacunapaj shayarishpami, maquicunata huichi chutarca.

¹³ Pai shayaringapaj broncemanta rurashca jahuapimi shayacurca. Chuscundij ladollamantajmi ishqui metro, ishqui chunga pichca centímetro ancho carca. Altomanca shuj metro, quimsa chunga pichca centimetromi carca. Chai shayanataca paillatajmi chai chaupi huasi canllapi churashca carca. Chai jahuapimi tucui israelcuna tandanacushcacunapaj ñaupajpi cungurishpami, maquicunata jahua pachaman huichi chutashpa cashna nirca:

¹⁴ “Israelcunata Mandaj Taita Dios, canhuan ari ninacushca shina causaj, cambajta rurajcunata llaquishpa chaitataj pajtachijca jahua pachapipish, cai pachapipish can Dios shinaca pi mana tiyanchu.

¹⁵ Cambajta ruraj ñuca yaya Davidman cambaj shimihuan cushatajmi nishcata cambaj maquihuantaj rurashpa pajtachijpimi, cunan punllaca chashna tucushca.

¹⁶ Israelcunata Mandaj Taita Dioslla, cunanca cambajta ruraj ñuca yaya Davidman cushatajmi nishcataca pajtachiyari. Canca paitaca: Cambaj huahua huahuacuna ñuca nishcata cazushpa causajpi, can purishca shinallataj ñuca ñaupajpi purijpica, israelcunata mandaj canamantaca cambaj huahua huahuacunaca manataj illangachu nishcami carcangui.

¹⁷ Israelcunata Mandaj Taita Dioslla, cambajta ruraj Davidman cushatajmi nishcataca pajtachihuayari.

¹⁸ ¿Taita Diosca allpa pachapica runacunahuanca causangatajchu? Jahua pachacunapish, jahua pachamanta ashtahuan jahuaman caj jahua pachapish can causanapajca, mana pajtaipajchu. Canta yuyarinapaj cachun ñuca shayachishpa cai huasicarin ¿maitataj pajtangari?

¹⁹ Chashna cashpapish ñucata Mandaj Taita Dioslla, cambajta ruraj ñuca mañashcata, rogarishcata uyangapajca ricuracunguimi. Cambajta ruraj ñuca cambaj ñaupajpi caparishpa mañacushcata uyahuai.

²⁰ Canca cai huasipimi causasha nircanguimi. Chaimanta tutapish, punllapish cai huasita chapanataca ama saquihuaichu. Cambajta ruraj ñuca maipi cashpapish cai huasita ricushpa mañashcata uyangui.

²¹ Cambajta ruraj ñucapish, can agllashca tucui israelcunapish cambaj huasita chapashpa mañashcataca, can causacun jahua pachamanta uyashpa perdonapai.

²² Maijanpish shujtajta mana allita rurajpi, pai mana allita rurashcataca cai huasipi caj altar ñaupajpi huillachun nijpi huillanaman shamujpica,

²³ chaipica canca jahua pachamanta uyashpami cambajta rurajcunataca, Diosta mana manchajtaca pai ima shina cashcata ricuchishpa chai mana allita rurashcataca paipaj jahuallamantaj tigrachishpa llaquichingui. Cashcata rurajtaca pai cashcata rurashcata ricuchishpa allita cupangui.

²⁴ Can agllashca israelcunaca, canta p'iñachishpa juchallishcamantaca paicunata p'iñajcuna llaquichishca tucungachari. Chaipica canman cutirishpa, cambaj shutipi juchacunata huillashpa, canta rogashpa cai huasipi cambaj ñaupajpi mañajpica,

²⁵ jahua pachamanta uyashpa, can agllashca israelcunapaj juchacunata perdonashpa, can paicunaman cushca, can paicunapaj ñaupa yayacunaman cushca llajtallamantaj tigrachinguimi.

²⁶ Shinallataj paicuna canta p'iñachishpa juchallijpi, jahua pachata huichcajpi mana tamyachijpi, can llaquichishcamanta paicunapaj juchacunata cutishpa canman juchacunata huillashpa cai huasiman tigrarishpa canta mañajpica,

²⁷ jahua pachamanta can uyashpa cambajta rurajcunapaj juchacunata, can agllashca israelcunapaj juchacunata perdonashpa, alli ñanpi purinata yachachishpa, paicunapaj allpacuna cachun can cushca allpacunapica tamyachinguimi.

²⁸ Cai llajtapica yaricaipish, ungüicunapish tiyangachari. Mana cashpaca granocunata inti chaquichingachari. Mana cashpaca huaira quilluyangachari. Mana cashpaca langostacuna, piquicuna shamushpa chagracunata llaquichingachari. Mana cashpaca ñucanchijta p'iñajcuna ñucanchijhuan macanacungapaj shamushpa pueblocuna muyundijpi chapangachari. Mana cashpaca ima shujtaj llaqui cashpa, ungüi cashpapish japingachari.

²⁹ Maijan runa cashpa, mana cashpaca tucui israelcuna cashpa chai llaquicunahuan cashpa paipaj shungupi nanachishpa llaquirishpa, cai huasiman tigrarishpa, paicunapaj maquicunata chutashpa mañajpi, rogarijpica uyanguimi.

³⁰ Paicuna mañashcata jahua pacha can causacunmanta uyashpa, paicunata perdonashpaca paicunapaj shungu ima shina cajta can yachashca shinallataj, paicuna ima shina rurashca shinallatajmi tucuicunaman cungui. Tucui runacunapaj shungutaca canllamari yachangui.

³¹ Ñucanchij ñaupa yayacunaman can cushca allpapi causajcunaca, tucui causaipi canta manchashpa causachunmi chashna rurangui.

³² Manapish Israel cajcuna cambaj shutita uyashpa, cambaj maquica tucuita rurai tucuj cashcata, cambaj rigracunapish chutashca cashcata uyashpa caru llajtamanta shamushpaca, cai huasiman tigrarishpami mañangacuna.

³³ Paicuna mañashcataca can causacun jahua pachamanta uyashpami, manapish Israel caj canta caparishpa mañashcataca uyangui. Tucui llajtapi causajcuna cambaj shutita rijsishpaca, can agllashca israelcuna shinallataj canta manchachuncuna. Ñuca rurashca cai huasipi tucuicuna cambaj shutita adorana cashcatapish entendichuncuna.

³⁴ Can agllashca israelcuna, paicunata p'iñajcunahuan macanacunaman can cachajpi rishpaca, maipi cashpapish, can agllashca pueblopi cambaj shutipi ñuca rurashca huasi ladoman ñahui Mandaj Diosta mañajpica,

³⁵ canca jahua pachamantami paicuna mañashcata, rogarishcata uyashpa, paicunata mitsangui.

³⁶ (Juchata mana ruraj runaca mana tiyanchu) Shina cajpipish canta mana cazushpa juchallijpica, canca paicunahuan p'iñarishpami caru llajtaman cashpa, c'uchulla llajtaman cashpapish, prezu apachun paicunata p'iñajcunapaj maquipi churangui.

³⁷ Paicunaca prezu apashca llajtapi cashpami, quiquin shungullapitaj mana allita rurashcamanta cutirishpaca, huananchijmi nishpa cashna nishpa mañangacuna: Juchallishcanchijmi, millaitami rurashcanchij, mapatami rurashcanchij ningacuna.

³⁸ Paicunata prezu apajcunapaj llajtapi cashpami, paicunaca tucui shunguhuan tucui almahuan canman cutirishca cashpaca, paicunapaj ñaupa yayacunaman can cushca cai llajta ladoman, can agllashca pueblo ladoman, cai ñuca rurashca cai huasi ladoman ñahuita churashpa mañangacuna.

³⁹ Paicuna mañashcata, rogarishcata can causacun jahua pachamanta uyashpami, can agllashcacunataca canta mana cazushpa llaquichishcata perdonashpa mitsapangui.

⁴⁰ Ñuca Dioslla, canta caipi mañashcataca, cambaj rinrinhuan uyarapangui, cambaj ñahuihuan chaparangui.

⁴¹ Mandaj Taita Dioslla, cunanca can tucuita rurai tucuj cashcata ricuchina arcahuan can tiyana huasiman jacupai. Mandaj Dioslla, cambajta ruraj curacunaca quishpirishcahuanca churanata churarishca shina cachun. Cambajllacunaca tucuicunallataj can cushca allicunahuan cushicushpa causachun.

⁴² Mandaj Taita Dioslla, can agllashpa churashca jatun mandajtapish, ama shitashpa saquinguichu. Cambajta ruraj Davidta c'uyashcataca yuyaripangui” nircami.