2 CRÓNICAS 5 - Dios Rimashca Shimicunami

¹ Chashnami Salomonca, Mandaj Diospaj huasipi tiyachun, chai tucui charinacunata rurachirca. Salomonca, paipaj yaya David Mandaj Diosman cushca cullquitapish, curitapish, tucui imalla charinacunatapish Mandaj Diospaj huasiman apashpami, chaipi caj huaquichinapi huaquichirca.

Diospaj ari ninacushca quillcata huaquichina arcata Diospaj huasiman Salomón apashcami

² Chai q'uipami Salomonca israelcunata cunaj yuyajcunata, tucui aillucunata pushajcunata, tucui israelcunapaj quiquin familiacunata mandajcunatapish Jerusalenpi tandachirca. Paicunataca Davidpaj pueblopi caj Sionmanta Mandaj Dioshuan ari ninacushca quillcata huaquichina arcata apamungapajmi tandachirca.

³ Chaimi jatun mandaj Salomonhuanca huatapaj canchis quillapi, huatanta yuyarina fiesta punllapi tucui israelcuna tandanacurcacuna.

⁴ Israelcunata cunaj yuyajcuna ña tucuicuna chayajpica, levitacunaca, Diospaj arcata apangapaj japishpaca,

⁵ Mandaj Diospaj arcataca, Mandaj Dioshuan tupanacuna huasindij, chai carpa huasi ucupi imalla tiyashcacunandijmi aparcacuna. Tucui chaicunataca curacunahuan, levitacunahuanmi aparcacuna.

⁶ Jatun mandaj Salomonpish, tucui paihuan tandanacuj israelcunapish Diospaj arca ñaupajpimi, ovejacunata huagracunata Diosman cushpa sacrificarcacuna. Chaicunaca yallitaj achca cashcamanta mashna cashcata mana yachai tucuipaj, mana yupai tucuipajmi carca.

⁷ Chai q'uipami curacunaca, Mandaj Dioshuan ari ninacushcata quillcata huaquichina arcataca, maipi churana cashcaman yaicuchircacuna. Chaipica Diospaj huasi ucupi caj Diospajlla ch'icanchishca ucuman yaicuchishpami querubincunapaj alas ucupi churarcacuna.

⁸ Chai querubincunapaj alasca Diospaj arca jahuata chutashcami carca. Chashna cashpami Diospaj arcatapish, Diospaj arcata aparina caspicunatapish, tuparca.

⁹ Chai arcata aparina caspicunaca, yallitaj suni caspicunami carca. Chaimantami Diospajlla ch'icanchishca ucu ñaupajpi caj ucumantaca ricunalla carca. Chashna cashpapish canllamantaca mana ricurijchu carca. Cunancama chashnallatajmi tiyacun.

¹⁰ Chai arca ucupica, ima shujtajca mana tiyarcachu. Horeb urcupi cashpa Moisés churashca ishqui tablajlla rumicunallami tiyarca. Chaipica Mandaj Dios israelcunata Egiptomanta llujshichimushpa ari ninacushca quillcami carca.

¹¹ Curacunaca Diospajlla ch'icanchishca ucumanta llujshircacunami. (Chaipi caj tucui curacunallatajmi Diospajta rurangapaj allichirishcacuna carca. Shina cashpapish chaipi paipajta ruranaman huashan huashan shamuna cashca shinaca manaraj ruracurcacunachu.

¹² Asaf, Hemán, Jedutún shuti levitacunapish paicunapaj churicunandij, caishuj levitacunandijmi altar ñaupajpi lino churanacunata churashca shayacurcacuna. Tucui paicunaca cantaj levitacunami carcacuna. Paicunaca cimbalocunahuan, salteriocunahuan, arpacunahuanmi carca. 120 curacunapishmi trompetacunapi tocashpa paicunahuan shayacurcacuna).

¹³ Chashna tucuicuna chaipi cashpaca trompetacunapipish, cimbalocunapipish, shujtaj tocanacunapipishmi shuj shinalla tocashpa, cantashpa, Mandaj Diostaca pagui nishpa alabarcacuna. Paicuna chashna cantacujpica caishujcunaca: “Mandaj Diosta cantaichij, paica allimi. Pai llaquij canaca huiñai huiñaipajmi” nishpami cantarcacuna. Chashna cantacujpimi Mandaj Diospaj huasipica p'uyu jundarca.

¹⁴ Mandaj Diospaj sumaj cashca Mandaj Diospaj huasi ucupi jundajpimi, curacunaca Diospajta rurangapaj mana chai ucupi saquiri tucurcacuna.