2 CRÓNICAS 16 - Dios Rimashca Shimicunami

Asahuan Ben-adadhuan shuj yuyailla tucushcami

¹ Jatun mandaj Asa Judá llajtata, quimsa chunga sujta huatata ña mandacujpimi, Baasaca Judá llajtapi causajcunahuan macanacungapaj huichiyashpaca, Judá llajtata jatun mandaj Asapajman pi ama llujshi tucuchun, pi ama yaicui tucuchun Ramá pueblo muyundijpica jatun pircata shayachirca.

² Chaimi jatun mandaj Asaca, Mandaj Diospaj huasipipish, mandashpa tiyana huasipipish huaquichinacunapi tiyacuj cullquita, curita llujshichishpa, Siria llajtata jatun mandaj Ben-adadman cashna nishpa cuchun, Damasco puebloman cacharca:

³ “Cambaj yayahuan ñuca yayahuan shuj shinalla cashca shinallataj, canpish ñucapish shuj yuyailla tucushun. Chaipajmi cullquita, curita cambajman cachani. Israel llajtata jatun mandaj Baasahuan ari ninacushcataca p'aquilla. Chaipimi, ñucataca llaquichinataca saquingallami” nircami.

⁴ Ben-adadca, jatun mandaj Asa imalla nishcata allimi nishpami, israelcuna causan pueblocunata llaquichigrichun paipaj soldadocunata mandajcunata cacharca. Paicunami israelcunataca Ijón, Dan, Abel-maim shuti pueblocunatapish, Neftalí llajtatapish granocunata huaquichina pueblocunatapish quichurcacuna.

⁵ Chaita uyashpami Baasaca, Ramá pueblopi jatun pircata ruracushcata saquishpa rirca.

⁶ Chaimi jatun mandaj Asaca Judá llajtapi tucui causajcunahuan Ramá puebloman rishpa, Ramapi Baasa pircachicushca rumicunata, caspicunataca chaimanta apashpa, chaicunahuanca Geba, Mizpa shuti pueblocunapi jatun pircacunata rurachirca.

⁷ Chai punllacunami Dios ricuchishcata huillaj Hanani runaca, Judá llajtata jatun mandaj Asapajman shamushpa cashna nirca: “Canca canta Mandaj Dios ayudachun paipi shunguta churanapaj randica, Siria llajtata jatun mandajtamari ayudachun mañashcangui. Chaimi Siria llajtata jatun mandajpaj soldadocunaca, cambaj maquimanta quishpirishpa rishcacuna.

⁸ Etiopía, Libia llajta soldadocunaca yallitaj achcacunami carca. Shinallataj macanacuna carrocunatapish, caballocunatapishmi charircacuna. Mandaj Diospi shunguta churashcamantami, paica chai tucui achca soldadocuna cajpipish, cambaj maquipi churarca.

⁹ Mandaj Diosca tucui shunguhuan paita cazujcunapaj allita rurashpa, tucuita rurai tucuj cashcata ricuchingapajmi, tucui cai pachata ricuracun. Canca yuyai illaj shinami Siria llajtata jatun mandajhuan alli canata ari ninacushcangui. Chashna rurashcamantaca cunanmantapachaca, ashtahuanmi canhuan macanacungapaj shamungacuna” nircami.

¹⁰ Chashna nijpica yallitaj p'iñarishpami, Asaca Dios ricuchishcata huillajtaca carcelpi churarca. Asaca chai huatacunaca, Judapi causajcunataca taucacunatami llaquichirca.

Asa huañushcami

¹¹ Asa ñaupaman ashtahuan imallata rurashcata, q'uipata imallata rurashcata ashtahuan yachasha nishpaca Judá llajtata jatun mandajcuna, Israel llajtata jatun mandajcuna imallata rurashcata quillcashca libropimi ricuna.

¹² Asaca ña quimsa chunga iscun huatata mandacushpami, chaquicuna ungüi tucushpa yallitaj anchayarca. Chashna ungushpaca, Mandaj Diosta mashcanapaj randica, jambijcunallatami mashcarca.

¹³ Asaca chuscu chunga shuj huatata mandacushpami paipaj ñaupa yayacunahuan tandanacugrirca.

¹⁴ Pai huañujpica, shuj ataudpimi churarcacuna. Chai ataudpica, mishquijllata ashnaj tucui laya jambicunatami jundachircacuna. Chai jambicunaca, mishquijllata ashnaj jambicunata ruranata alli yachajcuna rurashcami carca. Ataudpi churashpaca, Asataca Davidpaj pueblopi paillataj rurachishca pambana jutcupimi churarcacuna. Chai punllaca paita yuyarishpami, huañui punllapi imata rupachina cashcata achcata rupachircacuna.