2 Corintios 7 - Dios Rimashca Shimicunami

¹ Chaimanta c'uyashcacuna, Dios cushami nishcacunata charishcamantaca, ñucanchij aichatapish, yuyaitapish mapayachicujtaca tucui anchuchishunchij. Diosta manchashpa, tucui jucha illaj tucungacama paipajlla alli causashunchij.

Corintopi causaj crijcuna Diospajman cutirijpi Pabloca cushicushcami

² Ñucanchijta uyapaichij: Ñucanchijca, pitapish ima mana allita mana rurarcanchijchu, pitapish mana pandachircanchijchu, pitapish mana umarcanchijchu.

³ Mana cancunata llaquichingaraicu chashnaca ninichu. Ña nishca shinallataj causashpapish, huañushpapish, ñuca shunguca cancuna yuyaillami.

⁴ Cancunamanta sumajyarishcataca mana pingashpami huillani. Tucui llaquicunahuan cashpapish, cushicuihuan jundami cani, jahuanpi jahuanpimi yallitaj cushicucuni.

⁵ Macedoniaman shamushpaca ñucanchij cuerpoca ima samarinata mana charircachu. Ashtahuanpish tucuipimi llaquichishcacuna carcanchij. Jahua aichapipish llaquichishca, shungupish manchaihuanmi carcanchij.

⁶ Chashna cajpipish mana jatun tucushcacunata cushichij Diosca, Tito shamujpimi ñucanchijtaca cushichirca.

⁷ Mana pai shamujllapichu cushicunchij. Ashtahuanpish cancuna paita cushichishcamanta, ñucata ricunaihuan cashcamanta, llaquilla cashcamanta, ñuca munashcata rurashun nicushcata pai huillajpipishmi, ashtahuan cushicurcani.

⁸ Quillcata cachashpa ñuca cancunata llaquichishca cashpapish, mana yallitaj llaquirinichu. Chai quillca cancunata ashacama llaquichishcata yachashpaca, llaquirircanimi.

⁹ Cunanca cushicunimi. Mana cancunata llaquichishcamantachu cushicuni. Ashtahuanpish chai llaquichishcahuan mana allita ruracushcata saquishpa cutirishcamantami cushicuni. Dios munashca shina llaquirishcamantaca ñucanchijca ima llaquita mana rurarcanchijchu.

¹⁰ Diosmanta shamuj llaquica mana allita ruracushcata saquishpa paiman cutirishpa quishpirishcapi ashtahuan alli tucunapajmi shamun. Chaimantaca mana imata llaquirinachu, ashtahuanpish cai pachamanta llaquimi, huañuiman pushan.

¹¹ Diosmanta shamuj llaquicunaca imata rurashcata ricuichigari. ¡Chai llaquilla canachu, chai yuyailla canachu, p'iñalla canachu, manchailla canachu, ima munailla canachu, huañuricujlla canachu, mana allita rurajta llaquichinachu, cancunamanca shamurcari! Tucui chaicunamantami chuya cashcata ricuchircanguichij.

¹² Cancunaman chai quillcata cachashpaca, mana llaquichijmanta, llaquita apajmantapish yuyarishpachu quillcarcani. Ashtahuanpish Dios ricucujpi, cancuna ñucanchijta llaquishcata yachachunmi quillcarcanchij.

¹³ Chaimanta cancuna cushicushcata yachashpami cushicurcanchij. Ashtahuanca Tito cushicushcamantami ashtahuan cushicurcanchij. Tucui cancunamari, paipaj shungutaca cushichishcanguichij.

¹⁴ Cancunamanta Titoman parlashpaca, achcata cushicushpa mana pingarishpami parlarcani. Ashtahuanpish cancunaman tucui ima parlashcata ima shina cashcallatami parlarcanchij. Shinallataj cancunamanta achcata cushicushpa Titoman parlashcapish ima shina cashcallatajmi carca.

¹⁵ Tucui cancuna pai nishcata cazushpa, manchaihuan, chujchuihuan chasquishcata yuyarishpami, cancunataca ashtahuan c'uyacun.

¹⁶ Tucui imatapish cancunapi shunguta churashpami ñucaca cushicuni.