2 Corintios 6 - Dios Rimashca Shimicunami

¹ Ñucanchijca Diospajta paillahuantaj rurajcuna cashpami, Dios mana c'uyaipajta c'uyashcataca, ama yanga chasquishca caichijchu nishpa cunanchij.

² Diosca: “Chasquina punllapica, cantaca uyarcanimi. Quishpichina punllapica, cantaca quishpichircanimi” ninmi. Cunanmari chasquina punllaca, cunanmari quishpichina punllaca.

³ Ñucanchij ruracushcata pi ama mana alli nichunmi, pita ñitcachinataca mana mashcarcanchij.

⁴ Ashtahuanpish tucui imata rurashpapish, Diospajta rurajcuna cashcataca mana utca p'iñarishcapimi cashna ricuchinchij. Llaquichijpipish, ima illajlla cashpapish, llaquihuan cashpapish,

⁵ azotijpipish, carcelpi cashpapish, huaicashpa c'amijpipish, sinchita trabajachijpipish, mana dormishca cashpapish, mana micushca cashpapish,

⁶ chuya causanapipish, alli yachaj canapipish, ima llaquitapish apajlla, llaquij, allita ruraj canapi, jucha illaj Espirituhuan mana nij tucushpalla c'uyajmi canchij.

⁷ Mana llulla shimicunahuan, Diospaj poderhuan cashcata ruranapaj alli maquipi, lluqui maquipi cushca macanacunahuan,

⁸ alli nishca canapi, mana alli nishca canapi, allicunami nishca, mana allicunachu nishca, umajcuna nishca cashpapish, mana llullacunami canchij.

⁹ Alli rijsishca cajpipish, mana rijsishcata shinami charincuna, huañunalla cashpapish, causacunchijrajmi, macashca cashpapish mana huañunchijchu.

¹⁰ Llaquilla cashpapish, punllantami cushijlla canchij. Imata mana charijcuna cashpapish, achcacunatami charijyachicunchij. Imata mana charishpapish, tucuitami charinchij.

¹¹ Corintocunalla, cancunamanca, ñucanchij shungupi ima tiyashcataca tucuitami huillanchij.

¹² Ñucanchijca cancunamanca tucui shungu yuyashcatami huillacunchij, ashtahuanpish cancunami pacashpa ñucanchijmanca mana huillanguichij.

¹³ Ñuca rurashca shinallatajmi cancunapish shungupi ima tiyashcata mana pacashpa ñucamanpish huillana canguichij. Ñuca huahuacunata shinami chashna rimani.

Millaimanta anchurishpa causaichij nishcami

¹⁴ Cancunaca mana crijcunahuanca, yugushca shinaca ama tandanacuichijchu. Cashcata ruranaca, mana cashcata ruranahuanca mana tandanacunchu. Luzca, amsahuanca mana chagrurinchu.

¹⁵ ¿Cristoca, Belialhuanca shuj yuyailla tucunchari? ¿Shinallataj crijca, mana crijhuanca imata charingachu?

¹⁶ Dios causana huasica, rurashcalla dioscunahuanca mana shuj shinalla cai tucunchu. Cancunamari causacuj Dios causana huasi canguichij. Diosllatajmi, cashna nirca: “Ñucaca paicunapurapimi causasha, purisha. Ñucaca paicunapaj Diosmi casha, paicunaca ñuca agllashcacunami cangacuna” nishcami.

¹⁷ Chaimanta: “Paicunapaj chaupimanta llujshimuichij, ch'icanyarichij” ninmi Jatun Diosca. Shinallataj: “Ima mapata ama japirichijchu. Chashna rurajpica, cancunataca chasquishami.

¹⁸ Ñucaca, cancunapaj Yayami casha. Cancunaca ñuca churicuna, ushushicunami canguichij” ninmi Tucuita Rurai Tucuj Jatun Diosca.