2 Corintios 5 - Dios Rimashca Shimicunami

¹ Cai pachapi causana carpa huasi shina ñucanchij aicha huañujpica, Dios rurashca huasita huiñaipaj jahua pachapi charishcataca yachanchijmi. Chai huasica, gentecunapaj maquihuan mana rurashcachu.

² Chaimantami jahua pachapi caj ñucanchij causanataca, churanata churarishca shina, aij ña chaipi causacushpachari yuyanchij.

³ Chaita churachishca cashpami, ñucanchijca mana lluchulla cashun.

⁴ Cai carpa huasi shina cai aichapi causacushpaca, llaquihuan aij nicunchijmi. Ñucanchijca mana lluchulla cashun ninchijchu, ashtahuanpish churachishcacunami cashun ninchij. Cai huañuj aichataca, causai chingachishpa mushujyachichunmi shuyacunchij.

⁵ Chashna cachun ñucanchijta allichijca Diosmi. Japina cashcata ricuchij cachunpish, paipaj Espiritutami curca.

⁶ Chaimantami chaipi shunguta churashpa, chai yuyailla causacunchij. Cai aichapi causacushpalla, Mandaj Jesusmanta carupi cashcataca yachanchijmi

⁷ (ñahuihuan ricushcataca mana caticunchijchu, crishcallapimi caticunchij).

⁸ Chaimantami chai yuyailla canchij, ashtahuancarin ñucanchijca cai aichahuanca ña mana ashtahuan cashpa, Mandaj Jesushuanmi cashun ninchij.

⁹ Ñucanchijca cai pachapiraj cashpapish, jahua pachapi cashpapish, Mandaj Jesusta cushichina yuyaillami canchij.

¹⁰ Imalla rurashcata Cristo ricuchicun ñaupajpica, tucuicunamari ricurigrinataj canchij. Chaipimi cai cuerpohuan cashparaj, cada quiquin allita rurashca cashpa, mana allita rurashca cashpapish, japina cashcata japishun.

Dioshuan alli tucuichij nishpa huillajcunami canchij nishcami

¹¹ Mandaj Jesusta manchanata yachashcamantami tucuicunallataj manchachun huillacunchij. Ñucanchij ima shina cashcataca Diosmi yachan, cancunapish ñucanchij ima shina cashcataca yachachunmi munanchij.

¹² Ñucanchijta allicunami canguichij nichunca mana chashna ninchijchu, ashtahuanpish ñucanchijmanta cancuna sumajyarichunllami chashna ninchij. Ñahui ricuillapi allimi canchij nishpa, shungupica manapish ima cajcunaman cutichichunmi chashnaca ninchij.

¹³ Ñucanchijca loco shina cashpaca, Diospajmi chashna canchij. Alli yuyaiyuj cashpaca, cancunapajmi chashna canchij.

¹⁴ Shujllami tucuicunamanta huañurca, tucuicunami paipi huañurcacuna. Chaimantami Cristopaj c'uyaica ñucanchijtaca chaita huillachicun.

¹⁵ Causacujcunaca ama paicunapajlla causachun, ashtahuanpish paicunamanta huañujpaj, causarijpaj causachunmi tucuicunamanta huañurca.

¹⁶ Cunanca ñucanchijca pita mana ñaupa causaipi yuyashca shinaca yuyanchijchu, Cristotapish ñaupamanca aicha yuyashca shina yuyashca cashpapish cunanca mana chashna yuyanchijchu.

¹⁷ Chaimanta maijanpish Cristopi cajca, tucuita mushujyachishcamanta mushujmi. Ñaupa ima shina cashcaca ña chingarircami, cunanca tucuita mushujyachishcami.

¹⁸ Tucui chaicunataca Diosmi rurarca. Paica Cristomanta ñucanchijhuan alli tucushpami, ñucanchijtaca Dioshuan alli tucuichij nishpa huillachun huillajcunata rurarca.

¹⁹ Diosca cai pachapi causajcunapaj juchacunata manataj yuyarishachu nishpaca, Cristomantami paicunahuanca alli tucurca. Alli tucunata huillachunca ñucanchijmanmi mingarca.

²⁰ Chaimanta ñucanchijca, Cristopaj shutipi huillajcunami canchij. Diosllataj ñucahuan alli tucupaichij nicuj shinami ñucanchijta huillachijpi, Cristopaj shutipi: “Dioshuan alli tucupaichij” nicunchij.

²¹ Cristotaca mana juchayuj cajpipish, Diosca ñucanchijmantami juchayujta rurarca. Cristomanta ñucanchijca, Dios munashca shina cashcata rurajcuna cachunmi chashnaca rurarca.