2 Corintios 10 - Dios Rimashca Shimicunami

Pabloca apostól cashcatami ricuchishca

¹ Ñucaca Pablomi cani. Cristo llaquij alli shungu cashca shinami ñucapish, cancunataca uyapaichij nini. Ñucaca cancunahuan cashpaca, mana jatun tucushca carcanichu. Ashtahuanpish cancunamanta carupi cashpaca, c'ari c'arimi tucushcani.

² Paicunaca aicha munaitami rurashpa puricun nijcunataca ñuca shamushpa, p'iñarishpa achcata rimana yuyai cashca shina ama rimana tucuchun, cancunallataj ricupaichijlla nipanimi.

³ Cai aichapi causacushpapish, aicha munashca shinaca mana macanacucunchijchu.

⁴ Ñucanchijca mana cai pachapaj macanacunahuanchu macanacucunchij, ashtahuanpish Dios cushca imatapish rurai tucuj macanacunahuanmi jarcacuj pirca shinacunata urmachinchij.

⁵ Chashnami Diosmanta ama yachachun nishpa jatun tucushpa jarcaj yuyaicunataca chingachinchij. Cristota cazungapajmi ñucanchij tucui yuyaicunataca paiman curinchij.

⁶ Cancuna cazujcunataj tucujpipish, tucui mana cazujcunataca llaquichinapaj allichishcami canchij.

⁷ Imatapish ñahui ricushcallatami ricunguichij. Maijanpish Cristopajmi cani nishpaca, pai Cristopaj cashca shinallataj ñucanchijtapish Cristopaj cashcata yuyachun.

⁸ Mandaj Jesús cushca mandanata charinimi nishpa, ashahuan jatun tucushpa rimacushpapish, mana pingarinichu. Mana cancunata chingachichunchu cai mandanataca ñucanchijmanca curca, ashtahuanpish crishcapi ashtahuan sinchiyachichunmi curca.

⁹ Quillcacunata cachashpaca, cancunata yallitaj manchachingapaj cachashcataca ama yuyanguichijchu.

¹⁰ Ñuca quillcashcacunataca, cashnami nincuna. Paica yallitajmi sinchita rimashpa quillcan. Paitaj caipi cashpaca, irqui shinami carca, pai rimashcapish pita mana cazuchipajmi carca nicun nijtami uyani.

¹¹ Maijanpish chashna nicujca, caita yuyaipi charichun. Ima shinami carupi cashpa quillcashpa rimanchij, shinallatajmi cancunahuan cashpapish rurashun.

¹² Ñucanchijca allimi canchij mana ninchijchu, shujtajcuna shinapish mana cashun ninchijchu. Paicunallataj allimi canchij nijcunaca shujtajcuna shina cashun nijcunaca, yuyai illajcuna cashcatami ricuchin.

¹³ Chaimanta ñucanchijca maipish cachun mana jatun tucunchijchu. Ashtahuanpish ñucanchijman imalla ruranata Dios cushca shinallami ruranchij. Paillatajmi cancunapajcamapish chayachirca.

¹⁴ Chaimi cancunapajpi cashpaca mana yalli mana carcanchij. Ñucanchijraj cancunapajman mana chayashca cajpica ima shinachari canguichijman carca. Ashtahuanpish ñucanchijmi Cristomanta alli huillaita huillangapajca, cancunapajman punta chayarcanchij.

¹⁵ Shujtajcuna trabajashcallapi satirishpaca, mana jatun tucunchijchu. Ashtahuanpish cancuna crishcapi huiñajpi, cancunapurapi ashtahuan yachachishpa jatunyarina yuyaillami canchij. Chaimi ñucanchij yuyaica.

¹⁶ Chashnami cancunapaj llajtamanta ashtahuan caru llajtacunapipish, alli huillaitaca huillashun ninchij. Shujtajcuna rurashcallapi ama jatun tucungapajmi ña shujtajcuna, huillashpa callarichishcapica mana yaicurishun ninchij.

¹⁷ Pipish jatun tucusha nishpaca, Mandaj Jesuspi jatunyarichun.

¹⁸ Paillataj allimi cani nirijca manapish alli nishcachu, ashtahuanpish Diosllamari alli nijca.