2 Corintios 1 - Dios Rimashca Shimicunami

Allillachu canguichij nishcami

¹ Dios munashcamanta Jesucristopaj apóstol Pablomi cani. Huauqui Timoteondijmi, Corintopi caj Diospaj tandanacushca crijcunaman quillcanchij. Acaya llajtapi caj jucha illajcunamaca tucuicunamanmi quillcanchij.

² Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

Llaquicunahuan Pablo cashcami

³ Ñucanchijta Mandaj Jesucristopaj Dios Yayataca, alli nishca cachun. Paica llaquij Yayami, tucuipi cushichij Diosmi.

⁴ Paimi tucui ñucanchij llaquicunapipish cushichin. Shujtajcuna ima llaquipi cajpipish, Dios ñucanchijta cushichishca shinallataj cushichichunmi, ñucanchijtaca chashna cushichin.

⁵ Cristo yallitaj llaquicunata apashca shinallatajmi, ñucanchijpish apacunchij. Pai Cristollamantatajmi ñucanchij yallitaj cushicunapish shamun.

⁶ Ashtahuanpish, cancuna cushichishca, quishpichishca cachunmi llaquichishcacuna canchij. Shinallataj cancuna cushichishca, quishpichishca cachunmi Diosca ñucanchijtaca cushichin. Chaimi cancunapish ñucanchij shinallataj llaquihuan cashpaca apai tucunguichij.

⁷ Ñucanchij shinallataj cancunamanta llaquicunahuan cajpica, ñucanchijta shinallataj cushichishca cana yuyailla cana cashcataca allimi yachanchij.

⁸ Huauquicuna, Asiapi ñucanchijta jahuanpi jahuanpi llaquicuna japishcataca, yachachunmi munani. Chaipica yallitaj mana apaipaj llaquicunahuanmi carcanchij. Chaimantami ña mana causanchijchu yuyarcanchij.

⁹ Ashtahuanpish huañunatajmi nishca canatami ñucanchijpica yuyarcanchij. Ñucanchijllapitaj ama yuyaita churashpa, ashtahuanpish huañushcacunata causachij Diospi yuyaita churachunmi chashna tucurca.

¹⁰ Chai Diosmi quishpichirca, cunanpish quishpichicunmi, chashnallataj huañunami nishca llaquimantapish quishpichicungallami.

¹¹ Cunanpish ñucanchijmanta Diosta mañapanguichij ninchijmi. Achcacuna mañashcamanta, Dios ñucanchijman rurai tucunata cushcamantaca, achcacunallatajmi Diostaca pagui ningacuna.

Pablo imamanta Corintoman mana rishcami

¹² Ñucanchijca cai pachapi Dios cushca mapa illaj, mana nij tucushcalla causaita cancunahuan causashcamantami cushicunchij: Chaica mana runacunapaj yachaimantachu, ashtahuanpish Diospaj mana c'uyaipajta c'uyaihuanmi chashna causarcanchij. Chaitaca ñucanchij ucu yuyaipimi huillacun.

¹³ Cancuna mana rezai tucuipaj, mana entendi tucuipajtaca mana quillcanchijchu. Ashtahuanpish tucuita entendishca cachunmi munani.

¹⁴ Mandaj Jesús shamui punllapi, ñucanchijca cancunapi, cancunaca ñucanchijpi cushicuna cashcataca, ñami ashata yachacurcanchij.

¹⁵ Chai yuyailla cashpami, cai cutinpica ricushpapish tigracushpapish ishqui cutin cushichingapaj cancunapajmanraj shamusha nicurcani.

¹⁶ Chaimantaca Macedoniamanmi pasasha yuyacuni. Macedoniamanta cutin cancunapajman ñuca tigramujpimi, Judeaman rinapaj cancuna ayudashcahuan rinata yuyacuni.

¹⁷ Ñuca caita yuyarishpaca ¿jahua jahua yuyarishpachu rurarcani? Mana cashpaca, chashna ruranata yuyarishpaca ¿aichallamantachu ñucapi “aripish, manapish tiyachun” nishpa yuyarcani?.

¹⁸ Ashtahuanpish Diosca pajtachijmi, chaimanta ñucanchijpish “chashnachu canga, manachu chashna canga” nishpaca mana huillashcanchijchu.

¹⁹ Ñucapish, Silvanopish, Timoteopish Diospaj Churi Jesucristomanta cancunapurapi huillashpaca, “chashnachu canga, manachu chashna canga” nishpaca mana huillarcanchijchu. Ashtahuanpish paipica tucui chaicunaca “chashnatajmi”.

²⁰ Chaimantami Diosca tucui pai cusha nishcacunataca, Jesucristopi pajtachin. Chashna cajpimi ñucanchijca, Diosta jatunyachishpaca, Jesucristomanta “Chashna cachun” ninchij.

²¹ Diosmi ñucanchijtapish, cancunatapish, Jesucristopi shujllata rurarca. Diosca paipaj Espirituta churashpami,

²² paipajta rurashpa sellarca. Japina cashcata ricuchij cachunmi, ñucanchij shungupi paipaj Espirituta churarca.

²³ Cancunata llaquishpa Corintoman manaraj shamushcataca, ñuca shunguta rijsij Diosllataj yachanmi. Yangamanta cashna niricushpaca, ñucami imapish tucusha.

²⁴ Cashna chashna crishpami catina canguichij nishpaca, mana mandanchijchu ashtahuan cushicuchun nishpallami, chashnaca ninchij. Cancunaca crishcamantami sinchicuna canguichij.