1 Timoteo 6 - Dios Rimashca Shimicunami

¹ Taita Diospaj shutitapish ñucanchij yachachishcatapish ama c'amichun, amopajta huatashca shina ruracujcunaca, paicunapaj amo cashcamanta tucuipi alli nichun.

² Crij amota charijcunaca, huauquillami nishpa ama mana cazuchun. Ashtahuanpish alli servichun. Paicunaca alli rurashcata chasquijcuna, c'uyashca crij huauquicunami. Chaita yachachi, yuyachishpa rimai.

Ima charishcallahuan cushicuichij nishcami

³ Maijanpish ñucanchijta Mandaj Jesucristopaj alli yachachinatapish, ñucanchij caticushca yachanatapish mana yachachishpa shujtajta yachachijca,

⁴ jatun tucushca imata mana yachajmi. Rimashca imata nisha nishcata rimanacushpa, p'iñanacuna yuyaillami. Chaimantami shujtajpaj charishcata munan, p'iñanacushpa rimanacun, c'aminacun, shujtajcunapish mana alli cashcata yuyan.

⁵ Yuyai ismushca runacunaca, ch'ahuanyashca rimanacucujllacunami. Mana llullamantapish carupimi. Taita Diosta crinapish, cullquita japinapajlla cashcatami yuyancuna. Canca chashnacunamanta anchuri.

⁶ Ashtahuanpish ima charishcallahuan cushicujcunapajca, Taita Diosta crij canaca achca cullquita japishca shinallatajmi.

⁷ Cai pachamanca imata mana apamushcanchijchu. Imata mana apashunchu.

⁸ Chaimanta micunata, churanatapish charishpaca, chaillahuan ña cushi cashunchij.

⁹ Charijyashun nijcunaca mana allita rurana yuyaicuna shamujpi urmashpaca, cutinllatajmi ch'ahuanyachij yuyaipi huatashca tucun. Chai ch'ahuanyashca llaquichij yuyaicunami runacunataca llaquichishpa, tucurinapi, chingarinapi huashicuchin.

¹⁰ Tucui millaita ruranata callarichijca, cullqui munaimi. Chaita munashcamantami maijancunaca crishcata saquishpa, achca llaquicunata apacuncuna.

Crijcunaca alli macanacuj shina cachun nishcami

¹¹ Ashtahuanpish Taita Diospaj runalla, canca chaicunamanta anchurishpa cashcata ruranapi, Taita Dios yuyailla canapi, alli crij canapi, c'uyanapi, mana p'iñarinapi, manso shungu canapi catirai.

¹² Achcacunapaj ñaupajpi crishcata ricuchishcamantaca, crishcapica alli macanacushpa huiñai causaita chasquingacama alli catirai. Chaipaj Taita Dios cayashcami carcangui.

¹³ Tucuiman causaita cuj Taita Diospaj ñaupajpi, Poncio Pilatoman imapaj shamushcata huillaj Jesucristopaj ñaupajpipishmi, cantaca mandani.

¹⁴ Ñucanchijta Mandaj Jesucristo shamungacama cai mandashcata cazushpa chuya, pi mana juchachipaj causangui.

¹⁵ Alli nishca caj, pailla tucuicunapaj Jahuapi caj, jatun mandajcunapajpish jatun mandaj, mandajcunapajpish mandajmi pai cachana punlla pajtajpica, Jesucristota cachanga.

¹⁶ Pai Taita Diosca mana huañujmi. Pi mana c'uchuyaipaj luzpimi causan. Paitaca pi runacuna mana ricushcachu, mana ricui tucunchu. Tucuita rurai tucujtaca huiñaita, alli nishca cachun. Chashna cachun.

¹⁷ Cai pachapi achcata charijcunataca ama jatun tucuchun, charinacunallapi ama yuyaita churachun mandangui. Chaicunaca chingarijllami. Ashtahuanpish ñucanchij cushicuchun tucui imatapish yallijta cuj causaj Taita Diospi yuyaita churachun mandangui.

¹⁸ Mana mitsacuna, imatapish cujllacuna, allicunata rurashpa chai ruranacunahuan charijcuna cachun mandangui.

¹⁹ Shamuj punllapi achcata charij cangapajca, chashna huaquichishpami huiñai causaita chasquishpaca cushicungacuna.

Timoteoman Pablo mingashcami

²⁰ Timoteo, canman imallata mingashcataca alli cuidangui. Yachaj canapaj allimi nishca, yanga ima mapa parlocunataca ama uyangui.

²¹ Maijancunaca chaita uyashpami, crishcamanta anchurircacuna. Mana c'uyaipajta c'uyaj canaca canhuan cashca cachun. Chashna cachun.