1 Timoteo 4 - Dios Rimashca Shimicunami

Crishcataca yangallami cashca nishpa saquingacunami nishcami

¹ Ashtahuanpish Taita Diospaj Espirituca, allitajmi cashna huillan. Q'uipa punllacunapica, umaj espiritucunata, supaicunapaj yachachinacunata uyashpaca, taucacunami crishcataca yangallami cashca nishpa saquingacuna.

² Chaicunapaj yuyaicunaca mishqui shimi jayaj shungucuna, llullajcuna canapi sinchiyashcami.

³ Paicunaca cazaranatapish jarcangacunami. Mana llullata crishpa caticujcunaca, Taita Dios cushca micunacunata Taita Diosta pagui nishpa micunalla cajpipish, chai yachachijcunaca mana micunachu nishpami jarcangacuna.

⁴ Taita Dios rurashcaca tucuimi alli. Imapish mana shitanallachu. Taita Diosta pagui nishpaca micunallami.

⁵ Taita Diospaj Shimimanta, Taita Diosta mañashcamantaca chuyayachishcami.

Jesucristopajta alli rurajmi

⁶ Caita huauquicunaman yachachishpaca, Jesucristopajta alli rurajmi cangui. Crina shimicunata, alli yachachinata caticushcatapish alli micushca shinami cangui.

⁷ Ñaupa yanga mapa parlocunataca ama chasquingui. Ashtahuanpish Taita Diospajta alli rurana yuyaillapi catirangui.

⁸ Aichata cuyuchinapish, asha allimi. Ashtahuanca Taita Dios yuyailla canami tucuipaj alli. Paimi cai causaipajpish, shamuj causaipajpish cusha nishcata charin.

⁹ Cai huillashcacunaca tucuicuna alli nishpa chasquinallami:

¹⁰ Causaj Taita Diospi shunguta churashca cashpami, mana alli nishpa rimajpipish llaquita apashpa trabajacunchijlla. Paica tucuicunata quishpichijmi, paipi crijcunatami Quishpichin.

¹¹ Caicunata mandai, yachachi.

¹² Pajta cantaca, huambrami nishpa pi rimanman. Chaimanta rimanapi, causanapi, c'uyanapi, yuyanapi, crinapi, chuya canapipish crijcuna ricushpa catinalla alli cangui.

¹³ Ñuca shamungacamaca, tucuicunaman Taita Diospaj Shimita rezashpa uyachingui. Yuyachishpa rimangui, yachachingui.

¹⁴ Cunaj yuyajcuna cambaj jahuapi maquicunata churajpi, Taita Dios huillachijpi rurai tucunata cushcataca rurashpa catirangui.

¹⁵ Chaicunata rurana yuyailla catirai. Chashna cajpimi, can rurashcacunaca tucuicuna ricunalla canga.

¹⁶ Canllatajpish cuidaringui. Imata yachachicushcatapish alli yuyaringui. Ima shina yachachishca shinallataj causangui. Chashna cashpami, canllatajpish quishpiringui, can yachachishcata uyajcunapish quishpiringacuna.