1 Timoteo 2 - Dios Rimashca Shimicunami

Diosta mañanata yachachishcami

¹ Tucuimanta yallica caitami yuyachini. Taita Diosta mañashpa rogaichij, tucui gentecunamanta mañashpa pagui nichij.

² Jatun mandajcunamanta, tucui laya mandajcunamantapish casilla causangapaj, tucui imapipish llaqui illaj, Taita Dios yuyailla, alli cangapajca Taita Diosta mañaichij nishpa yachachingui.

³ Ñucanchijta quishpichij Diosca, chashna rurajtami munan.

⁴ Diosca tucui runacuna quishpirichun, mana llullata yachaj chayachunpishmi munan.

⁵ Shujlla Diosmi tiyan. Runacunamanta Dioshuan, Diosmanta runacunahuan rimajpish shujllami: Paica, runa aichayuj Jesucristomi.

⁶ Paillataj curishpami, tucuicunata randishpa cacharichirca. Chaitaca Taita Dios rurasha nishca punlla pajtajpimi ricuchirca.

⁷ Chaita huillachun churashca apostolmi cani. Mana judiocunaman mana llulla crinata yachachij cachun churashcami cani. Chaitami Cristomantaca, mana llullashpa huillani.

⁸ Runacunaca jucha illaj maquicunata chutashpa, mana p'iñarishca, mana p'iñanacushca yuyaihuan maipi cashpapish, Taita Diosta mañachunmi munani.

⁹ Shinallataj huarmicunapish sumaj churanacunata churarishpaca, ama pinganayajta maipish cachun churarichun: Ajchatapish ama maipish cachun allichirichun, curitapish, perlatapish, achca valij churanacunatapish ama churarichun.

¹⁰ Chaipaj randica allicunata rurashpa, Diosta yuyarij huarmicuna rurana cashca shinallataj rurachun.

¹¹ Huarmica tucui yachachishcata upajlla uyashpa, tucuita cazuchun.

¹² C'arita huarmi yachachij cachun, mandaj cachunca mana mandanichu. Ashtahuanpish upajlla cachun.

¹³ Puntaca Adantami rurashca carca. Chai q'uipami, Evata rurashca.

¹⁴ Shinallataj mana Adantachu umashca carca. Ashtahuanpish huarmimi umashca tucushpa, mandashcata p'aquirca.

¹⁵ Chaimanta huahuacunayuj tucushpa, crinapi, c'uyaipi, jucha illajyashpa mana maipish cachun causashpaca quishpiringami.