1 Tesalonicenses 5 - Dios Rimashca Shimicunami

¹ Huauquicuna, ima huata ima punlla Jesús shamunata cancunaman ñuca quillcachunca mana minishtinguichijchu.

² Cancunaca allimi yachanguichij. Mandaj Jesusca shuhua shinami tuta shamunga.

³ Tucuicuna: “Allitaj, sumajtami causacunchij” ninacucujpica, chichu huarmita nanai japij shinami paicunapajmanca, jatunta llaquichinaca ñapish shamunga. Chaimantaca manataj miticungacunachu.

⁴ Ashtahuanpish huauquicuna, cancunaca chai punlla shuhua shina ñapish japichunca, mana amsapichu canguichij.

⁵ Cancunaca tucuicunami achijpaj huahuacuna, punllapaj huahuacuna canguichij. Mana tutapaj, amsapajchu canchij.

⁶ Chaimanta shujtajcuna shina dormicujcunaca ama cashunchij. Ashtahuanpish chaparashpa, alli yuyaihuan cashunchij.

⁷ Dormijcunaca tutami dormincuna, machajcunapish tutami machancuna.

⁸ Ashtahuanpish ñucanchijca punllapaj cashcamanta, alli yuyaihuan cashunchij. Crishcata, c'uyanatapish fierro churanata churashca shinami canchij. Quishpichishcata shuyanatapish fierro cascota churashca shinami canchij.

⁹ Taita Diosca ñucanchijtaca, p'iñarishpa llaquichingapajllatajca mana agllarcachu. Ashtahuanpish ñucanchijta Mandaj Jesucristomanta quishpichishca cachunmi agllarca.

¹⁰ Causajcunapish, ña huañushcacunapish, paihuan tandalla causachunmi, paica ñucanchijmanta huañurca.

¹¹ Ima shina cunan ruracushca shinallataj, caishuj chaishujta animachichij caishuj chaishujta sinchiyachichij.

Crijcunata Pablo yuyachishpa rimashcami

¹² Huauquicuna, yachachishpa, cunashpa cancunapurapi Mandaj Jesusmanta trabajajcunataca alli cazuichij ninchijmi.

¹³ Paicuna allita rurashcamantaca, achcata c'uyashpa alli ninamari canguichij. Caishujhuan chaishujhuanpish sumajta causaichij.

¹⁴ Huauquicuna, caitapishmi roganchij. Imata mana rurasha nij q'uillacunataca sinchita cunaichij, llaquilla cajcunataca cushichichij, manaraj alli yachajcunataca yachachipaichij. Tucuicunahuan alli caichij.

¹⁵ Maijanpish ima mana allita rurajpica, ñataj canpish chashnallataj ruranguiman. Chaipaj randica, caishuj chaishujhuan, tucuicunahuanpish allita rurashpa catichij.

¹⁶ Imapipish cushijllacuna caichij.

¹⁷ Taita Diosta mañanataca ama shaicunguichij.

¹⁸ Cristo Jesushuan shujlla cajcunataca, tucui imapipish paita pagui nijcuna cachunmi Taita Diosca munan.

¹⁹ Taita Diospaj Espíritu ima nishcataca ama mana uyashun nichijchu.

²⁰ Taita Dios huillachijpi huillacujcunataca, ama mana uyashun nichijchu.

²¹ Tucui imalla yachachishcataca, alli cashcata mana alli cashcata alli ricuichij. Alli cajllata chariraichij.

²² Tucui millaimantaca anchurichij.

²³ Sumaj causaita cuj Taita Diosllataj cancunapaj espiritutapish, almatapish, cuerpotapish tucui mapa illajlla tucungacama chuyayachishpa ñucanchijta Mandaj Jesucristo shamunapajca, pi mana juchachipajta huaquichishca cachun.

²⁴ Cancunata cayajca pai imata rurasha nishcataca pajtachijmi. Chaitaca paica rurangami.

²⁵ Huauquicuna, ñucanchijmanta Taita Diosta mañanguichij.

²⁶ Tucui huauquicunata, jucha illaj muchahuan alli cashca canguichijman nichij.

²⁷ Cai quillcataca, Taita Diospajlla caj tucui huauquicunapaj ñaupajpi rezachunmi, Mandaj Jesuspaj shutipi cancunamanca c'uyaihuan mingani.

²⁸ Ñucanchijta Mandaj Jesucristopaj mana c'uyaipajta c'uyaj canaca, cancunahuan cashca cachun. Chashna cachun.