1 Tesalonicenses 4 - Dios Rimashca Shimicunami

Taita Diosta cushichij causaimi

¹ Ashtahuanca huauquicuna, Mandaj Jesuspaj shutipimi cancunataca yuyachishpa animachishun ninchij. Ima shina causashpa Taita Diosta cushichinatami yachachircanchij. Chai shinami causacunguichij. Chashna causashpami ashtahuan ashtahuan yallitaj alli catinguichij.

² Mandaj Jesús ñucanchijta imallata yachachichun nishcacunataca, yachachijpi ñami cancunaca yachanguichij.

³ Taita Diosca cancunataca jucha illajlla causachunmi munan: Huainayanamanta anchurichij.

⁴ Tucuicuna, quiquin huarmillata jucha illajta, alli nishpa charinata yachaichij.

⁵ Taita Diosta mana rijsijcuna shina, millai munaicunahuan maipish cachun ama causaichijchu.

⁶ Maijanpish paipaj huauquita umashpa imapipish ama llaquichichun. Ña cancunaman nishca, huillashca shinallataj chashna rurajcunataca Mandaj Jesusmi paicunatapish llaquichinga.

⁷ Taita Diosca ñucanchijtaca, mapallapitaj causachunca mana cayarcachu, ashtahuanpish jucha illaj causachunmi cayarca.

⁸ Maijanpish cai yachachishcata mana uyasha nijca, mana runallatachu mana uyasha nin. Ashtahuanpish jucha illaj Espirituta cuj Taita Diostamari mana uyasha nin.

⁹ Taita Dios yachachijpimi cancunallataj caishuj chaishuj c'uyanacunataca yacharcanguichij. Chaimi cancunamanca, huauquicunapura c'uyanacunami canguichij nishpaca mana quillcani.

¹⁰ Macedoniapi caj tucui huauquicunahuanmi, chai shinallataj c'uyanacucunguichij. Shina cajpipish huauquicuna, cancunataca ashtahuan ashtahuan yallijta c'uyanacuichij nipanchijmi.

¹¹ Ñucanchij cancunata mandashca shinallataj shujtajcunapaj rurashcapi ama satirishpa, imatapish quiquin maquihuan trabajashpa tucuicunahuan sumajta causaichij.

¹² Mana crijcunapish alli nishca cangapaj, imapish mana illaj cangapajmi chashna cana canguichij.

Mandaj Jesús ima shina shamunami

¹³ Huauquicuna, huañushcacuna ima tucuna cashcata mana yachaj caishujcuna shina llaquilla cachunca mana munanchijchu. Ashtahuanpish yachajcuna cachunmi munanchij.

¹⁴ Jesús huañushpa causarishcatami ñucanchijca crinchij. Chai shinallatajmi Jesusta crij huañushcacunatapish Taita Diosca causachinga.

¹⁵ Chaimantami Mandaj Jesús shamungacama ñucanchij causacujcunaca huañushcacunataca mana ñaupashpa rishunchu nishpaca, Mandaj Jesús nishca shinallataj ninchij.

¹⁶ Mandaj Jesusllatajmi cazuchij caparishcahuan, angelcunata mandaj caparishcahuan, Taita Diospaj trompeta uyarishcahuanpish jahua pachamanta uriyamunga. Chaipica, Cristota crij huañushcacunarajmi causaringa.

¹⁷ Chai q'uipami ñucanchij caipiraj saquirishca causacujcunaca, Mandaj Jesusta huairapi tupangapaj paicunahuan tandalla p'uyupi apashca cashun. Chaipimi Mandaj Jesushuan huiñaita cashun.

¹⁸ Chaimanta chai shimicunahuan caishuj chaishuj cushichinacuichij.