1 Tesalonicenses 3 - Dios Rimashca Shimicunami

¹ Cancunata ricunaihuan canata mana ahuantai tucushpami, ñucanchijca Atenaspi saquirishpa,

² ñucanchij huauqui Timoteota cancunapajman cacharcanchij. Paica Taita Diospajta ruraj, Cristomanta alli huillaipi ñucanchijta ayudajmi. Paimi cancuna crishcapi sinchiyashpa alli catina yuyaita cushpa cunanga.

³ Llaquicunahuan cajpi pi ama muspachichunmi, chashnaca cunanga. Cancunallataj yachanguichijmi, ñucanchijca llaquicunata apanapajtajmi canchij.

⁴ Cancunahuan cashparajmi, llaquicunataca apanatajmi canchij nij carcanchij. Cancuna yachashca shinallataj chashnami tucurca.

⁵ Chai llaquicunahuan cajta yachashpa mana cungari tucushpami, cancuna crishcapi ima shina caticujta yachangapaj Timoteota cacharcani. Umaj diablo cancunata umajpica, ñucanchij trabajo yanga tucunatami mancharcani.

⁶ Ashtahuanpish Timoteo tigramushpaca, cancuna crishpa, c'uyaihuan caticujtaca alli cashcatami huillarca. Ñucanchijtaca c'uyaihuan yuyarishpami ricunachicushcanguichij. Ñucanchijpish cancuna shinallatajmi ricunaihuan canchij.

⁷ Chaimanta huauquicuna, ñucanchijca ima illajlla, llaquicuna chaupipi cashpapish, cancuna crishcapi alli caticujta yachashpami cushicunchij.

⁸ Cancuna Mandaj Jesuspi sinchita caticushcata yachashpami, llaquicunahuan huañucushpapish cutin cushicuita japircanchij.

⁹ Cancuna chashna caticujpimi, ñucanchij Taita Diospaj ñaupajpica cushicunchij. Cai tucui cushicuimantaca ¿ima shinataj Taita Diostaca pagui nishunri?

¹⁰ Cancuna crishcapi manaraj yachashcacunata yachachingapaj, cancunata ñahui ñahui ricunaman ringapajpishmi, tutapish punllapish Taita Diosta mañacunchijlla.

¹¹ Ashtahuanpish ñucanchij Yaya Diosllataj, ñucanchijta Mandaj Jesucristollataj cancunapajman ñucanchij rinata allichichunmi mañacunchij.

¹² Ñucanchij cancunata c'uyaj shinallataj cancunapish caishuj chaishujhuan, shujtajcunahuanpish c'uyaita charichun, Mandaj Jesusllataj yallijta mirachishca cachun.

¹³ Ñucanchijta Mandaj Jesucristo paipaj tucui jucha illajcunandij shamuipica, ñucanchij Dios Yayapaj ñaupajpi mana juchachipaj, jucha illaj canapi cancunapaj shunguta paillataj sinchiyachichunmi mañacunchij.