1 Tesalonicenses 1 - Dios Rimashca Shimicunami

Allillachu canguichij nishcami

¹ Pablohuan, Silvanohuan, Timoteohuanmi Tesalonicapi caj tandanacushca crijcunaman quillcanchij. Cancunaca Dios Yayahuan, Mandaj Jesucristohuanpish shujllami canguichij. Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

Tesalónica crijcunaca alli causaitami ricuchishca

² Taita Diosta ñucanchij mañacushpaca, tucui cancunata mana cungashpami, Taita Diosta pagui nicunchijlla.

³ Cancunaca crishcamantami allicunata rurashpa, c'uyaihuan trabajashpa, ñucanchijta Mandaj Jesucristopi shunguta churashpa paita shuyacunguichij. Chaimantami cancunata yuyarishpaca, ñucanchij Yaya Diosta mañanataca mana shaicunchij.

⁴ Taita Dios c'uyashca huauquicuna, cancunataca paillataj agllashcatami yachanchij.

⁵ Alli huillaihuanca ñucanchijca, mana rimarishcallahuan chayarcanchijchu. Ashtahuanpish poderpi, jucha illaj Espiritupi, chashnataj cashcahuanmi cancunamanca chayarcanchij. Cancunata c'uyashcamanta, ñucanchij cancunahuan ima shina cashcatapish allimi yachanguichij.

⁶ Jatun llaqui chaupipi cashpapish, jucha illaj Espíritu cushichijpimi, ñucanchij huillashcataca cushicushpa chasquircanguichij. Chaimantami ñucanchij shina, Mandaj Jesús shinapish cana yuyai tucumushcanguichij.

⁷ Chashnami Macedoniapi, Acayapi caj tucui crijcunapajca paicuna ricushpa catinalla tucushcanguichij.

⁸ Cancunamanta callarishpami, Mandaj Jesuspaj Shimitaca huashan huashan yachaj chayashca. Chaitaca mana Macedoniapi, Acayallapichu, ashtahuanpish tucui llajtacunapimi, cancuna Taita Diospi crishcaca caipi chaipi uyarishca. Chaimantami cancunamantaca, ñucanchijca ña mana imata parlana canchij.

⁹ Causaj Taita Diospajtataj rurangapajmi, rurashcalla dioscunamanta anchurishpa, Taita Diosman tigrarishcatapish, ñucanchijta ima shina chasquishcatapish paicunallataj parlancuna.

¹⁰ Huañushcacunapaj chaupimanta causarishca, paipaj Churi jahua pachamanta shamujta shuyana tucushcatapishmi parlancuna. Shamuj punlla Taita Dios p'iñarishpa llaquichinamantaca, chai Jesusmi ñucanchijta quishpichirca.