1 SAMUEL 5 - Dios Rimashca Shimicunami

Diospaj arcaca filisteocunapaj llajtapi cashcami

¹ Filisteocunaca Eben-ezerpi israelcunata Diospaj arcata quichushpaca Asdod pueblomanmi aparcacuna.

² Filisteocunaca Diospaj arcata apashpaca paicunapaj Dagón diospaj huasi ucuman yaicuchishpami, Dagonpaj c'uchupi churarcacuna.

³ Asdod pueblopi causajcuna cayandij tutamanta utca jatarishpa ricugrishpaca, Dagón diosca Mandaj Diospaj arca ñaupajpi urisinga siricujtami japircacuna. Dagón diostaca jatarichishpami, pai tiyanallapitaj churarcacuna.

⁴ Cayandij tutamantapish cutinllataj ricunapajca, Dagón diosca cungamanta urimanca Mandaj Diospaj arca ñaupajpimi urisinga siricushca carca. Dagonpaj umapish, paipaj ishqui maquipish p'itishcami pungu chaquipi quinriman churashca caspi jahuapi siricushca carca.

⁵ Chaimantami Dagonpaj curacunapish, Dagonpaj huasiman tucui yaicujcunapish, Asdod pueblopi tiyaj Dagonpaj huasi pungu chaquipi quinriman churashca caspipica, cunan punllacama mana sarushpa yaicuncuna.

⁶ Asdod pueblopi causajcunataca Mandaj Diospaj maquimi ashtahuan llapirca. Chaimi Asdod pueblopipish, chai muyundij llajtacunapipish chupu ungüihuan jatunta llaquichirca.

⁷ Chaita ricushpami, Asdod pueblopi causajcunaca: “Israelcunapaj Diospaj arcaca ñucanchijpurapica ama saquirichun, paipaj maquica ñucanchijtapish ñucanchij Dagón diostapish yallitajmi llaquichicun” ninacurcacuna.

⁸ Filisteocunapaj tucui mandajcunata tandachishpami: –¿Israelcunapaj Diospaj arcataca imatataj rurashun?– nishpa tapunacushpaca: –Israelcunapaj Diospaj arcataca Gat puebloman apaichij– nijpimi, israelcunapaj Diospaj arcataca chai puebloman aparcacuna.

⁹ Gat puebloman chai arcata apajpica, Mandaj Diosca chai pueblopi causajcunataca, uchillamanta callarishpa yuyajcunacamami chupu ungüihuan jatun mancharinata llaquichirca.

¹⁰ Chaimi Taita Diospaj arcataca Ecrón puebloman cacharcacuna. Taita Diospaj arcahuan Ecronman chayajpica chaipi causajcunaca: “Israelcunapaj Diospaj arcataca, ñucanchijtapish tucui caipi causajcunatapish huañuchingapajmari, caiman apamushcacuna” nishpami caparircacuna.

¹¹ Ecronpi causajcunapish filisteocunata tucui mandajcunata tandachishpami: “Ñucanchijtapish tucui caipi causajcunatapish ama huañuchichun, israelcunapaj Diospaj arcataca pai maipi cashcallapitaj saquinaman cachaichijlla” nircacuna. Diosca paipaj maquihuan jatunta llaquichijpimi, chai llajtapi caj pueblocunapi causajcunaca yallitaj jatun llaquita huañushcacuna.

¹² Chupu ungüihuan manaraj huañujcunaca, yallitaj chupu ungüihuan cashpa caparishcaca jahua pachacamanmi huichiyarca.