1 SAMUEL 4 - Dios Rimashca Shimicunami

Filisteocuna Diospaj arcata quichushcami

¹ Samuel rimashcaca tucui israelcunamanmi chayarca. Chai punllacunallatajmi israelcunaca, filisteocunahuan macanacungapaj llujshishpaca, Eben-ezer shuti pambapi carpa huasicunata shayachishpa tandanacurcacuna. Filisteocunapish Afec pueblo c'uchupimi, carpa huasicunata shayachishpa tandanacurcacuna.

² Filisteocuna macanacunalla tucushpa macanacushpaca israelcunatami misharca. Chai macanacuipica filisteocunaca 4.000 runacunatami huañuchircacuna.

³ Israelcuna carpa huasicunaman tigrajpimi, israelcunata cunaj yuyajcunaca: “¿Ima nishpashi Mandaj Diosca cunanca filisteocuna ñucanchijta mishachun saquin? Cunanca Mandaj Dios ñucanchijhuan ari ninacushca quillcata huaquichina arcata Silo pueblomanta apamugrishunchij. Chai arca ñucanchij chaupipi cashpami ñucanchijta p'iñajcunapaj maquimantaca quishpichinga” nircacunami.

⁴ Israelcunaca, Silo pueblomanmi taucacunata cacharcacuna. Paicunaca, querubincunapaj chaupipi tucuita Mandaj Dios causacun arcatami apamurcacuna. Elipaj churi Ofni, Finees shuti curacunapishmi shamurcacuna.

⁵ Mandaj Dioshuan ari ninacushca arcahuan carpa huasicunaman chayamujpica, tucui israelcunami jatun cushicuihuan pamba chujchujta caparircacuna.

⁶ Cushicushpa caparinacushcata filisteocuna uyashpaca: “Hebreocunapaj carpa huasicunapica ¿ima cushicui caparitashi caparicuncuna? nircacunami. Israelcunapaj carpa huasicunamanca Mandaj Dioshuan ari ninacushca arcata apamushcatami yachaj chayarcacuna.

⁷ Filisteocunaca mancharinacushpami cashna ninacurcacuna: “Paicunapaj carpa huasicunamanca Diosmari shamushca. ¡Aij, ñucanchijlla! Cunancamaca manamari chashna carcachu” nishpami caparinacurcacuna.

⁸ ¡Aij ñucanchijlla! Tucuita rurai tucuj chai dioscunapaj maquimantaca ñucanchijtaca ¿pitaj quishpichingari? Chai dioscunamari egiptocunataca, shitashca pambapi tucui laya llaquicunahuan huañuchircacuna.

⁹ Filisteocuna fuerzarichij, c'ari c'ari caichij. Hebreocuna ñucanchijpajta rurashpa causashca shina ñucanchijpish, paicunapajta ama rurangapaj c'ari c'ari macanacuichij” ninacurcacunami.

¹⁰ Filisteocuna macanacushpa israelcunata mishajpica, tucuicunami paicunapaj carpa huasicunapi miticugrircacuna. Chaipica yallitaj huañuimi tiyarca. 30.000 chaquillahuan purij Israel runacunami huañurcacuna.

¹¹ Taita Diospaj arcatapish quichurcami. Elipaj Ofni, Finees ishqui churicunapish huañurcami.

¹² Chai macanacuimantaca Benjaminpaj aillupuramanta shuj runami, callpashpa rishpa, Silo puebloman chai punllallataj chayarca. Paica churanacunapish lliqui, umapi allpa tapashcami chayarca.

¹³ Pai chayanapajca Elica, Diospaj arcamanta shungu chujchushpami ñan c'uchupi shuj tiyanapi chaparashpa tiyacurca. Chai runa shamushpa puebloman yaicushpa imalla tucushcata tucuicunaman huillajpimi, chai pueblopi tucui causajcunaca caparinacurcacuna.

¹⁴ Yallitaj caparinacuita uyashpami Elica: –¿Ima nishpataj yallitaj caparinacui tiyan?– nijpi chai runaca callpashpa rishpaca imalla tucushcata Eliman huillarca.

¹⁵ Elica iscun chunga pusaj huatayujmi carca. Paipaj ñahuicunapish ña zuyulla cashcamantami mana ricui tucurca.

¹⁶ Chai runami Elimanca: –Jatun macanacuimantamari miticushpa shamuni– nijpi Elica: –Huahua ¿imataj tucucunri?– nirca.

¹⁷ Chaimi huillanaman shamuj runaca: –Israelcunamari filisteocunata miticushpa callpancuna. Israelcunaca yallitaj achcacunamari huañuncuna. Cambaj Ofni, Finees ishqui churicunapish huañuncunami Taita Diospaj arcatapish quichushpami rincuna– nirca.

¹⁸ Huillaj runa Taita Diospaj arcata quichushcata huillajpimi Elica, pai tiyacushca tiyanamantaca huashaman urmashpa pungu c'uchuman urmarca. Paica yuyaj cashcamanta yallitaj llashaj cashpami cunga mucu llujshishpa huañurca. Paica israelcunataca chuscu chunga huatacunatami mandarca.

¹⁹ Elipaj nuera Fineespaj huarmipish, chichu ña huachanallami carca. Paipish Taita Diospaj arcata quichushcata, paipaj suegropish, paipaj cusapish, huañushcata uyashpaca, ñapish achca nanai shamujpi cungurishpa huacharcallami.

²⁰ Pai ña huañunalla cajpimi paihuan caj huarmicunaca: “C'ari huahuata huachashca jahuaca, ama manchaichu” nijpipish paica imata mana nircachu, imata nicushcata mana yacharcachu.

²¹ “Taita Diospaj arcata quichujpi Diospaj sumaj cana israelcunamanta anchushcamanta, paipaj suegropish, paipaj cusapish huañushcamantami” chai huahuataca Icabodta shutichirca.

²² “Taita Diospaj arcata quichushpa apashpaca, israelcunapi Diospaj sumaj canatamari anchuchishca” nircami.