1 SAMUEL 30 - Dios Rimashca Shimicunami

Amalecitacunata David mishashcami

¹ Quimsa punllacunapi David, paipaj runacunandij Siclagman chayanapajca, amalecitacunami Neguevmanpish, Siclagmanpish yaicushpa Siclag pueblotaca chushajta saquishpa chaipica ninata japichishca carca.

² Uchillacunamanta callarishpa yuyajcunacama huarmicunatapish tucui chaipi cajcunatami prezu aparcacuna. Shujllatapish mana huañuchishpami, paicunahuan pushashpalla rircacuna.

³ David paipaj cajcunandij chai puebloman chayanapajca, chai pueblopish tucui rupachishca, paicunapaj huarmicunatapish, paicunapaj churicunatapish, ushushicunatapish prezushpami apashca carca.

⁴ Chaimi Davidpish, paihuan cajcunapish tucuicuna mana ashtahuan huacai tucujta jatunta caparishpa huacarcacuna.

⁵ Davidpaj ishqui huarmicunatapishmi prezushpa apashca carca. Chai huarmicunaca shujca Jezreelmanta Ahinoammi carca. Caishujca, Carmelmanta caj Nabalpaj huarmi cashca Abigailmi carca.

⁶ Davidhuan cajcunaca paicunapaj churicunamanta, ushushicunamantaca almacama yallitaj llaquirishca cashpami, Davidtaca rumicunahuan shitashun nircacuna. Davidca yallitaj llaquilla cashpapish paita Mandaj Diospi shunguta churashpa sinchiyarca.

⁷ Chaimi Ahimelecpaj churi Abiatar curataca Davidca: –Efodta caiman c'uchuyachimuchunmi rogani– nijpi Abiatarca efodtaca Davidpajman c'uchuyachirca.

⁸ Chaipimi Davidca: –¿Prezu apashpa ricujcunataca catishpa rishachu? ¿Paicunataca cati japishachu?– nishpa Mandaj Diosta tapujpi paica: –Catishpa rilla. Cati japinguitajmi. Paicunataca prezushpa apacushcamanta quishpichinguitajmi– nirca.

⁹ Shina nijpimi Davidca, paihuan caj 600 runacunata pushashcahuan chaimanta rishpaca, Besor yacu huaicucama chayarca. Chaipimi maijancunaca saquirirca.

¹⁰ Davidca 400 runacunahuanca ashtahuan catishpa rircallami. 200 runacunaca achca shaicushcacuna cashpami, Besor yacu huaicuta mana ch'imbai tucushpa chaipi saquirircacuna.

¹¹ Paicuna catishpa ricushpaca, shuj egipcio runata japishpami Davidpajman pushamurcacuna. Chai runamanca tandata carajpi micurcami. Yacutapish ubyachun curcacunami.

¹² Chaquishca higo asha masatapish, ishqui huangu chaquichishca uvatapishmi curcacuna. Chaita micushca q'uipami paica yuyaita japirca. Paica quimsa tuta quimsa punllatami mana imata micushca, yacutapish mana ubyashca cashca carca.

¹³ Chaimi Davidca: –¿Pipajta rurajtaj cangui? ¿Maimantataj cangui?– nijpi egipcio mosoca: –Ñucaca amalecita shuj runapajta rurajmi cani. Ñuca ungushca cajpimi ñuca amoca caipi shitarirca. Ñami quimsa punlla tucun.

¹⁴ Ñucanchijca Neguevpi causaj cereteocunatapish, Judapi causajcunatapish, Neguevllapitaj causaj Calebpaj aillutapishmi llaquichircanchij. Siclag pueblotaca rupachircanchijmi– nircami.

¹⁵ Chaimi Davidca: –¿Chai soldadocuna maipi canman ñucata pushasha ninguichu?– nijpi paica: –Ñucata mana huañuchinata, ñuca amomanpish mana ricuchinata, Taita Diospaj ñaupajpi ari nijpica, chai gentecuna maipi canman pushashallami– nirca.

¹⁶ Chai runa pushashpa rijpi chayanapajca, chai runacunaca tucui chai pambapimi mirga mirga tucushpa micucushcacuna carca, ubyacushcacuna carca. Filisteocunatapish, judacunatapish, tucuita quichushpa apashcamanta cushicushpami, fiestata ruracushcacuna carca.

¹⁷ Davidca chai tutamantamanta callarishpaca, cayandij punlla chishicamami tucuicunata huañuchirca. Paicunamanta shujllapish mana quishpirircacunachu. 400 mosocunallami paicunapaj camellocunapi tiyarishcahuan miticugrishcamanta quishpirircacuna.

¹⁸ Davidca amalecitacuna quichushpa apacushcatami quichurca. Paipaj ishqui huarmicunatapish quichumurcami.

¹⁹ Churicunatapish, ushushicunatapish tucui imallata shuhuashpa apashcacunatapish tucuitami Davidca tigrachimurca. Uchillacunapish, jatuncunapish ima mana illashcachu carca.

²⁰ Davidca ovejacunatapish, jatun huagracunatapishmi japishpa apamurca. Chaita pushamucujcunaca: “Caicunaca David quichumushcacunami” nircacunami.

²¹ Davidca, 200 runacuna yallitaj shaicushpa, paita mana cati tucushpa Besor yacu huaicupi saquirijcunapajmanmi tigrarca. Paicunaca Davidtapish, paihuan cajcunatapish tupanaman llujshijpimi, Davidca paicunataca: “Allillachu canguichij” nirca.

²² Davidhuan rijcunapuramanta maijan millai mana alli shungucunaca: –Paicunaca ñucanchijhuanca mana rircacunachu. Ñucanchij quichumushcacunataca paicunamanca mana cunachu canchij. Ashtahuanpish paicunaca paicunapaj huarmita, paicunapaj churicunata pushashpa richunlla– nircacunami.

²³ Ashtahuanpish Davidca: –Ñuca huauquicuna, ama chashna ruraichijchu. Chaica Mandaj Dios cushcallamari. Paimari ñucanchijta huaquichishpa, ñucanchijta p'iñashpa llaquichinaman shamujcunatapish ñucanchij maquipi churashca.

²⁴ Chai yuyaica mana allichu. Macanacunaman rijcunapajpish, imalla apacushcacunata cuidashpa saquirijcunapajpish chai shinallatajmi chaupina– nircami.

²⁵ Chai punllamanta pachami chai mandashcaca chashnataj caticunlla. Cunan punllacamami Israelpica chaitataj pajtachincuna.

²⁶ Siclagman David chayashpaca, Judapi caj paihuan alli apanacuj cunaj yuyajcunaman paicuna quichumushcacunamanta ashata cunaman cachashpaca: “Caicunaca Mandaj Diosta p'iñajcunata quichumushcami. Chaitami cancunamanca cuni” nichunmi cacharca.

²⁷ Chai quichumushcacunataca Bet-elpi causajcunamanpish, Ramotpi caj Neguevpi causajcunamanpish, Jatirpi causajcunamanpish,

²⁸ Aroerpi causajcunamanpish, Sifmotpi causajcunamanpish, Estemoapi causajcunamanpish,

²⁹ Racalpi causajcunamanpish, Jerameelpi caj pueblocunapi causajcunamanpish, ceneopi caj pueblocunapi causajcunamanpish,

³⁰ Hormapi causajcunamanpish, Corasanpi causajcunamanpish, Atacpi causajcunamanpish,

³¹ Hebronpi causajcunamanpishmi cuchun cacharca. David paipaj runacunandij maillapi cashca pueblocunapi causajcunamanpishmi cacharca.