1 SAMUEL 29 - Dios Rimashca Shimicunami

Filisteocunaca Davidtaca macanacuiman mana pushashun nishcami

¹ Filisteocunaca tucui paicunapaj soldadocunatami Afec pambapi tandachircacuna. Israelcunapish Jezreelpi caj yacu pugyu c'uchupimi carpa huasicunata shayachircacuna.

² Filisteocunata mandajcunaca paicunapaj soldadocunataca patsajcunapurapipish, huarangacunapurapipish tucuicunatami paicunapaj shutipi cayashpa ricurcacuna. Davidpish paipaj runacunapish Aquista cuidashpami paipaj huashata caticurcacuna.

³ Chaimi filisteocunata mandajcunaca: –Chai hebreocunaca ¿imatataj caipica ruracuncuna?– nijpi Aquisca filisteocunata mandajcunamanca: –Cai Davidca, israelcunata jatun mandaj Saulpajta rurajmari. Paica cai punllacunata, cai huatacunataca ñucahuanmari cashca. Paipica ñucapajta rurai callarishcamanta cunan punllacama ima mana allita mana japishcanichu– nircami.

⁴ Shina nijpimi filisteocunata mandajcuna Aquishuan p'iñarishpaca: –Cai runaca macanacuiman ñucanchijhuan ama richun can maipi causachun churarcangui chaillamantaj tigrachishpa cachai. Chai macanacuipica ñucanchijta p'iñajcunapura tucungallatajmari. Chaimantaca ñucanchij runacunata huañuchishpa umacunata apashpa paipaj amopi alli ricurigringallatajmari.

⁵ ¿Manachu cai Davidta: Saulca, 1.000 gentecunatami huañuchishca. Davidca, 10.000 gentecunatami huañuchishca nishpa, cantashpa tushushcacuna?– nircacunami.

⁶ Chaimi Aquisca, Davidta cayashpaca: –¡Mandaj Diosca causajmi, canca imatapish cashcata ruraj runami cangui! Llujshishpapish tigrashpapish, carpa huasicunapica ñucapajca tucuitami alli rurashcangui. Ñucapajman shamushca punllamantapacha cunan punllacama, canpica ima mana allita mana japishcanichu. Ashtahuanpish caishuj mandajcunamari, cantaca mana munancuna.

⁷ Filisteocunata mandajcunata ama ashtahuan p'iñachingapaj, tigrashpa cushicuihuan rilla– nirca.

⁸ Davidca Aquistaca: –¿Imatataj rurashcaniyari? Ñuca amo jatun mandajta p'iñajcunahuan macanacunaman ama richunca cambajta ruraj ñucapica canhuan puri callarishca punllamanta cunancama ¿ima mana allitataj japircanguiyari?– nircami.

⁹ Aquisca Davidtaca: –Canca Diospaj ángel shina ñuca ñaupajpi alli cashcataca yachanitajmari. Shina cajpipish filisteocunata caishuj mandajcunami: Macanacuiman ñucanchijhuanca ama richun nincuna.

¹⁰ Chaimanta caya tutamanta utca jatarishpa canpish, canhuan shamuj can amopajta rurajcunapish pacarinca ringuichijlla– nircami.

¹¹ Davidpish paipaj runacunapish filisteocunapaj llajtaman tigrashpa ringapajmi cayandijtaca utca jatarircacuna. Filisteocunaca Jezreelmanmi rircacuna.