1 SAMUEL 28 - Dios Rimashca Shimicunami

¹ Chai punllacunallatajmi filisteocunaca, israelcunahuan macanacungapaj paicunapaj soldadocunata tandachircacuna. Chaimi Aquisca Davidtaca: –Canpish cambaj runacunapish macanacuiman ñucahuan rina cashcataca yachanguimi– nirca.

² Chaipimi Davidca Aquistaca: –Allimi, cambajta ruraj ñuca ima shina ruraj cashcataca cunanmi ricungui– nijpi Aquisca, Davidtaca: –Chashna cajpica cantaca ñuca tucui causaipimi ñucata cuidaj cachun churasha– nirca.

Adivinaj huarmita Endor pueblopi Saúl tapugrishcami

³ Samuelca ñami huañushca carca. Tucui israelcunami achcata huacashca carca. Samueltaca pai causashca Ramá pueblollapitajmi pambashcacuna carca. Saulca Israel llajtamantaca muspachij yumbucunatapish, adivinocunatapish llujshichishpami cachashca carca.

⁴ Filisteocunaca tucuicuna tandanacushpami, Sunempi carpa huasicunata shayachishpa tiyarircacuna. Saulpish tucui israelcunata tandachishpami, Gilboa urcupi carpa huasicunata shayachishpa tiyarirca.

⁵ Saulca filisteocunapaj carpa huasicunata ricushpa mancharishpami, paipaj shungupica yallitaj musparirca.

⁶ Saulca Mandaj Diostami tapurca. Ashtahuanpish Mandaj Diosca muscuipipish, Urimpi tapujpipish, Dios ima nishcata huillajcunata tapuchijpipish imata mana cutichircachu.

⁷ Chaimi Saulca, paipajta rurajcunataca: –Adivinaj espirituta charij huarmita mashcamushpa ñucaman huillaichij. Paita ñuca tapugringapaj– nijpimi paipajta rurajcunaca: –Cai Endorpimi adivinachij espirituta charij shuj huarmi tiyan– nircacuna.

⁸ Chaimi Saulca, shujtaj churanata churarishpa, shujtaj shina tucushpa ishqui runacunata pushashpa chai tutallataj adivinaj huarmipajman rirca. Ña chayashpaca: –Ñucami cantaca adivinachij espirituhuan ñuca ima tucuna cashcata adivinachun rogani. Maijan huañushcatami ñuca cayachun nini. Chaitami cayamuchun rogani– nirca.

⁹ Shina nijpi chai huarmica: –Huañushcacunahuan rimajcunatapish, adivinajcunatapish Saúl cai allpamanta tucuita anchuchishcataca canca allimi yachangui. Canca ¿ima nishpataj ñitcachishpa ñucataca huañuchichisha ningui?– nircami.

¹⁰ Shina nijpimi Mandaj Diospaj shutipi Saulca: –Mandaj Diosca causajmi, chaita huillashcamantaca cambajmanca ima llaqui mana shamungachu– nirca.

¹¹ Chaimi chai huarmica: –¿Pitataj cayachun ningui?– nijpi Saulca: –Samueltami cayachun nini– nirca.

¹² Chai huarmica, Samuelta ricushpa sinchita caparirishpami Saultaca:

¹³ –Saul-llataj cashca jahuaca ¿ima nishpataj ñucataca umarcanguiyari?– nijpi jatun mandajca: –Ama manchaichu. ¿Imatataj ricurcangui?– nijpi chai huarmica Saultaca: –Allpa ucumanta dioscuna huichiyamucujtami ricuni– nirca.

¹⁴ Chaimi Saulca: –Paica ¿imaman rijchajtagari?– nijpi, chai huarmica: –Shuj yuyaj runami shuj jatun linsohuan tucui pillurishca shamucun– nijpimi Saulca Samuel cana cashcata yachashpa pambaman tupajta cumurishpa paita alli nishcata ricuchirca.

¹⁵ Chaimi Samuelca Saultaca: –¿Ima nishpataj ñucataca cambajman cayashpa p'iñachingui?– nijpi Saulca: –Ñucaca jatun llaquihuanmi cani. Filisteocunamari ñucahuan macanacugrin. Taita Diospish ñucamanta anchurishcamari. Chaimantami Dios huillachishcata huillajcunata tapuchijpipish, muscuicunapipish, imata mana cutichijpi ñuca imata ruranata can huillachun cayachircani– nirca.

¹⁶ Shina nijpi Samuelca: –Mandaj Dios canmanta caruyashpa canta p'iñacujpica ¿imapajtaj ñucatacarin tapunguiyari?

¹⁷ Mandaj Diosca can ima tucunata ñucata huillachishca shinallatajmi pajtachicun. Chaimantami Mandaj Diosca can mandanataca cambaj maquimanta quichushpa, canllahuantaj purij cashca Davidman cushca.

¹⁸ Canpish Mandaj Dios rimashcataca mana uyarcanguichu. Chaimi Amalec runacunahuan Mandaj Dios yallitaj p'iñarishpa paicunata huañuchigri nishpa cachajpipish, mana cazurcangui. Chaimantami cunanca Mandaj Diosca cantapish chashnallataj llaquichicun.

¹⁹ Cantaca israelcunandijmi Mandaj Diosca filisteocunapaj maquipi churanga. Canpish cambaj churicunapish cayaca ñucahuanmi canguichij. Mandaj Dios israelcunapaj soldadocunata filisteocunapaj maquipi churajpimi chashna tucunga– nircami.

²⁰ Samuel chashna nijpimi Saulca jatunta llaquirishpa, yallitaj mancharishpa pambaman urmarca. Paica chai punllapish chai tutapish imata mana micushca cashpami fuerza illaj carca.

²¹ Chai huarmi Saulpajman c'uchuyashpaca yallitaj musparishcata ricushpami: –Cambajta ruraj ñucaca can nishcata cazushpami huañungapajpish can nishcata uyashpa pajtachishcani.

²² Chaimanta canpish cambajta ruraj ñuca imata nishcata uyachunmi rogani. Can micushpa cutinllataj fuerzata japishpa richunmi asha micunata caragrini– nirca.

²³ Saulca mana ninichu mana micunanchu nircami. Shina nijpipish paipajta rurajcunahuan, chai huarmihuan tucushpa micuilla nishcatami cazurca. Pambamanta jatarishpaca, shuj cama jahuapimi tiyarirca.

²⁴ Chai huarmica, paipaj huasipica huirayachishca shuj bizitami charirca. Chai bizitami huañuchirca. Cutata japishpa masashpami levadura illajlla tandata rurashpa cusarca.

²⁵ Chaitami Saulmanpish, paipajta rurajcunamanpish carangapaj apamurca. Paicunaca chaita micushca q'uipaca jatarishcahuan chai tutallataj rircallacunami.