1 SAMUEL 27 - Dios Rimashca Shimicunami

Filisteocunapaj llajtapi David cashcami

¹ Chai q'uipami Davidca: “Maijan cai punllacunapica Saulpaj maquipimi huañugrij yuyachini. Chaimanta Saulca ñucata mashcana yuyailla cashpa tucui Israelta ama mashcashpa caticuchunlla ñucaca filisteocunapaj llajtapi miticugrinami alli. Chashnashpallami Saulpaj maquimantaca quishpirisha” nishpami paipaj shungupi yuyacurca.

² Chashna yuyacushpami Davidca paihuan caj, 600 runacunandij rina tucushpa, Gat pueblota jatun mandaj Maocpaj churi Aquispajman rirca.

³ Davidca Aquishuanmi Gat pueblopi causarca. Paihuan caj runacunapish tucuicunami quiquin familiacunandij carcacuna. Davidca paipaj ishqui huarmicunandijmi carca. Shujca Jezreel pueblomanta Ahinoam shutimi carca. Caishujca Carmel pueblomanta Nabalpaj huarmi cashca Abigailmi carca.

⁴ Saulmanca Davidca Gat pueblopimi miticunaman rishca nishpami huillarcacuna. Chaimi Saulca ña mana ashtahuan mashcarca.

⁵ Davidca Aquistaca: –Jatun mandaj can causacun cai pueblopi canhuan cambajta ruraj ñuca causanaca mana allichu. Cambaj ñahuipi ñuca alli ricurishca cajpica, cai muyundij maijan llajtapi causangapaj chaita cuhuai– nircami.

⁶ Chaimi Aquisca chai punllallataj Davidmanca, Siclag pueblota curca. Chaimantami Siclag puebloca, cunan punllacama Judata jatun mandajcunapaj tucushpa shamushca.

⁷ Filisteocunapaj allpapi David causashca punllacunaca shuj huata chuscu quillacunami carca.

⁸ Davidca macanacungapaj allichirishpaca, gesuritacunahuan, gezritacunahuan, amalecitacunahuan macanacungapajmi paipaj runacunandij huichiyaj carca. Paicunaca ñaupa huatacunamantami Egiptoman rina Shur ñancama causajcuna carca.

⁹ Davidca chai llajtacunaman rishpaca, c'aricunatapish, huarmicunatapish shujllatapish causaiyujta mana saquishpami, ovejacunata, vacacunata, burrocunata, camellocunata, churanacunata apashpa chai llajtataca chushajta saquishpa Aquispajman tigraj carca.

¹⁰ Aquisca Davidtaca: “Cunanca ¿maijan pueblomantataj quichushpa apamunguichij?” nijpi Davidca: “Huaquinpica Judapi caj Neguevmantami quichumunchij” nijmi carca. “Huaquinpica Jerameelpi caj Neguevmantami quichumunchij” nijmi carca. “Huaquinpica ceneopi caj Neguevmantami quichumunchij” nijmi carca.

¹¹ Ñucanchijtaca Davidmari cashna llaquichicun nishpa Gat pueblopi pi ama huillaj shamuchunmi, c'aricunata, huarmicunatapish shujllatapish causaiyujtaca mana saquishpa tucuita huañuchij carca. Tucui chaicunataca filisteocunapaj allpapi tucui pai causacui punllacunapimi chashna ruraj carca.

¹² Aquisca, David tucui chaicunata nishcata crishpami: “Davidca israelcunapica jatunta millashca p'iñashcamari tucucun. Chashna cashpaca, tucui paipaj causaipimari ñucapajta rurashpa causanga” yuyarca.