1 SAMUEL 25 - Dios Rimashca Shimicunami

Samuel huañushcami

¹ Samuel huañujpica, tucui israelcunami paimanta huacangapaj tandanacurcacuna. Samueltaca Ramá pueblopi caj paipaj huasipimi pambarcacuna. Davidca chaimanta rishpaca Parán shuti shitashca pambamanmi rirca.

Davidca Abigailhuan cazarashcami

² Maón pueblopica shuj runami causarca. Paica Carmelpimi shuj haciendata charirca. Yallitaj charij cashpami, 3.000 ovejacunata, 1.000 chivocunata charirca. Paica Carmelpimi paipaj ovejacunata rutucurca.

³ Chai runaca Nabal shutimi carca. Paipaj huarmica Abigailmi carca. Chai huarmica yuyaisapa, sumaj ñahuimi carca. Ashtahuanpish paipaj cusaca rumi shungu, millaita rurajmi carca. Paica Calebpaj huahua huahuamantami carca.

⁴ Davidca shitashca pambapi cashpami, Nabal runa paipaj ovejacunata rutucujta yachaj chayarca.

⁵ Chaimi Davidca, chunga mosocunata cashna nishpa cacharca: “Carmelman huichi rishpa Nabalpajman chayashpaca ñuca shutipi allillachu cangui nishpa,

⁶ cashna nichij: Canca sumajta causangui, cambaj familiapish, sumajta causachun tucui can imalla charishcacunapish alli cachun ninmi ninguichij.

⁷ Canca ovejacunata rutuchicun nijtami yachani. Cambaj michijcunaca cai Carmelpica tauca punllacunatami ñucanchijhuan carca. Ñucanchijca paicunataca mana llaquichishcanchijchu, imata mana quichujpimi ima mana illarca.

⁸ Chaitaca cambajta rurajcunata tapuilla. Paicunallataj ima shina cashcata canman huillangallami. Ñuca cachashca mosocunata alli chasquipai ninguichij nircami. Chashna nishpaca ñucanchijca jatun micuita can ruracui punllatajmi shamushcanchij. Chaimanta cambaj churi Davidpajpish, paipajta rurajcunapajpish can imalla cusha nishcata cuchunmi rogani ninguichij” nichunpishmi cacharca.

⁹ David cachashca mosocuna Nabalpajman chayashpaca, David tucui imalla nishcata paipaj shutipi huillashpaca, upallarcallacunami.

¹⁰ Nabalca David cachashca mosocunataca: –¿Pitaj Davidca? ¿Pitaj Isaipaj churica? Cunan punllacunaca achcacunami amopajta rurajcunaca paicunapaj amocunata miticushpa puricuncuna.

¹¹ Ñuca ovejacunata rutujcunapajmi micunatapish, yacutapish, aichatapish ñucaca allichichircani. Chaitaca ¿maitataj maimanta cajtapish mana rijsishca runacunamanca carashari?– nircami.

¹² Shina nijpi David cachashca mosocunaca paicuna maita shamushcallatataj tigrashpa Davidpajman chayashpaca Nabal tucui imalla nishcatami huillarcacuna.

¹³ Chaimi Davidca paipaj runacunataca: –Tucuicuna cancunapaj espadahuan caj chumbillirinata chumbillirichij– nijpica, tucuicuna paicunapaj espadahuan caj chumbillirinata chumbillirircacuna. Davidpish espadahuan caj paipaj chumbillirinatami chumbillirirca. Chashnami Davidca 400 runacunata ñaupashca huichiyarca. 200 runacuna shinataca imalla charishcacunata cuidachunmi saquirircacuna.

¹⁴ Nabalpajta rurajcunapuramanta shujmi, paipaj huarmi Abigailmanca: –Davidca shitashca c'acacunapi cashpami, ñucanchij amota allillachu cangui nichun huillajcunata cachashca carca. Ashtahuanpish paica pinganayajta rimashpami cacharca.

¹⁵ Chai runacunaca, michina pambacunapi ñucanchijhuan cashpaca allicunamari carca. Imata mana llaquichircacunachu, paicunapaj chaipi ñucanchij michicui punllacunaca ima mana chingarircachu.

¹⁶ Paicuna chaipi cajpi ovejacunata ñucanchij michicui punllacunapica tutapish punllapish paicunaca ñucanchijpajca muyujta pirca shinami carca.

¹⁷ Chaimanta cunanca alli yuyarishpa imata rurana cashcata ricui. Ñucanchij amotapish, paipaj huasi ucupuratapish jatun llaquica ñami llapinalla. Cambaj cusaca yallitaj millai mana uyasha nij cajpimi, pi mana imata rimai tucun– nircami.

¹⁸ Chaimi Abigailca, 200 tandata, ishqui capachu vinota, pichca oveja aicha cusashcata, pichca taza camchata, patsaj huangu uvata chaquichishcata, chaquichishca 200 higotapish burrocunaman utca apachishpa,

¹⁹ paipajta rurajcunataca: –Cancunaca ñaupashpa richij. Ñucaca q'uipallata catimushallami– nirca. Paipaj cusa Nabalmanca imata mana huillarcachu.

²⁰ Abigailca shuj burropi tiyarishcami, pi mana ricuipajta urcu urita uriyarca. Davidpish paipaj runacunapish chai ñanllatatajmi tupamucurcacuna. Chaimi Abigailca paicunahuan tupagrirca.

²¹ Davidca: “Chai runa tucui imalla charishcacunataca shitashca pambapica yangallamari cuidashcani. Tucui paipaj imalla cashcacunaca ima mana chingarircachu. Chashna paipaj allita rurashca jahuamari ñucapajca ima allita mana rurashca nirircami.

²² Ñucata p'iñajcunata cayapaj shuj c'arillatapish mana saquishpa tucuita mana huañuchijpica, Taita Dios ñucataca jatunta llaquichichun” nircami.

²³ Abigailca Davidta ricushcahuan burromanta uriyashpaca, Davidpaj ñaupajpi cungurishpa pambaman tupajta cumurishpami,

²⁴ Davidpaj chaquipi siririshpaca: Ñuca amito ima juchata rurashcapish ñuca jahuami canga. Cambajta ruraj ñuca canhuan parlangapaj uyahuai. Cambajta rurajpaj shimicunata uyahuai.

²⁵ Ñuca amito, millai Nabal runa chashna rimashcataca ama cazuichu. Paipaj shutica Nabalmi. Chai shuti imata nisha nishca shinallataj yuyai illaj canami paipica tiyan. Cambajta ruraj ñucaca, can cachashca mosocunataca manamari ricushcanichu.

²⁶ Cunanca ñuca amito. ¡Mandaj Diosca causajmi, canpish causacunguimi! Canta llaquichijcunata cambaj maquihuantaj yahuarta jichashpa huañuchinaman shamucujtaca Mandaj Diosmi jarcashca. Can ñuca amota p'iñashpa llaquichisha nicujcunataca, Nabalta shinallataj tucuicunata llaquichishca cachun.

²⁷ Can amitopajta ruraj ñuca cambaj apamushcacunataca, canta catijcunaman carapailla nircami.

²⁸ Cambajta ruraj ñuca p'iñachishcacunata perdonapai. Can ñuca amoca Mandaj Dios mandajllapimi macanacungui. Tucui cambaj causaipi ima llaqui mana tiyangachu. Can ñuca amopaj tucui huasi familiaca huahua huahua huiñai huiñaita sinchi caticuchunlla.

²⁹ Maijan canta catirashpa llaquichingapaj jatarishpa huañuchinata yuyacujpipish, ñuca amo cantaca Mandaj Diospaj ñaupajpi causajcunahuan tandachishpami tucui cambaj causaipi cuidanga. Canta p'iñajcunapaj causaitaca rumita huaracapi churashpa shitaj shinami Mandaj Diosca chingachinga.

³⁰ Mandaj Diosca can ñuca amopaj imalla allita rurasha nishcataca pajtachichun. Israelcunata mandaj cachunpish churachun.

³¹ Ñuca amito canca ima jucha illajta mana huañuchishcamantaca, canta llaquichijtapish mana tigra cambaj maquihuan llaquichishcamantaca ima juchachinapish, imamanta canirishpa llaquirinatapish mana charinguichu. Ñuca amito llaquichij canamantaca jarcaripai. Mandaj Dios cambaj allita rurajpica, cambajta ruraj ñucataca yuyaripangui– nircami.

³² Chaimi Davidca, Abigailtaca: –Cunan canta ñucahuan tupanaman cachaj israelcunata Mandaj Taita Diosca alli nishca cachun.

³³ Canpish alli yuyaiyuj cashcamantaca, alli nishcami cangui. Ñucata llaquichijta ñuca quiquin maquihuan yahuarta jichashpa huañuchinaman ricujta jarcashcamantapish alli nishcami cangui.

³⁴ Israelcunata Mandaj Taita Diosca causajmi. Paimi ñuca llaquichichunpish mana saquin. Ñucata tupanaman can mana utca shamushca cajpica, caya tutamantapajca Nabaltapish, tucui paipaj cajcunatapish shujllatapish causaiyujta mana saquimanchu carcani– nircami.

³⁵ Davidca Abigail imalla apamushcacunata paipaj maquimanta chasquishpaca: –Can imata nishcata cazunimi. Chaimanta imata ama manchashpa cambaj huasiman huichiyailla– nircami.

³⁶ Abigail Nabalpajman tigranapajca, Nabalca paipaj huasipica jatun mandaj jatun micuita ruraj shinami ruracushca carca. Paica cushicuihuanmi carca. Yallitaj machashcapishmi carca. Chaimi Abigailca cayandij punllacama imata mana huillarca.

³⁷ Cayandij tutamanta Nabalpaj machai cacharirijpimi, paipaj huarmica tucui ima shina cashcata huillarca. Chaimi Nabalca shungu nanai japijpi rumi shina tucushpa saquirirca.

³⁸ Chunga punllacuna q'uipaca, Nabalca Mandaj Dios huañuchijpimi huañurca.

³⁹ Chai q'uipaca Davidca Nabal huañushcata uyashpami: –Mandaj Diosca alli nishca cachun. Mandaj Diosca ñucata llaquichishcamantami Nabaltaca llaquichishca. Paipajta ruraj ñucataca millaita ruranamantami huaquichishca. Nabal mana allita rurashcataca Mandaj Diosca paipaj jahuallamantajmi tigrachishca– nirca. Chai q'uipami Davidca paipajta rurajcunataca Abigailmanca ñuca huarmi cachun cantaca japigrinimi nishpa huillanaman cacharca.

⁴⁰ Davidpajta rurajcuna Carmel pueblopi caj Abigailpajman chayashpaca: –Davidca cantaca paipaj huarmi cachun japigrini ninmi nishpami huillachun cachan– nircacunami.

⁴¹ Chaimi Abigailca, jatarishpa cungurishpa pambaman tupajta cumurishpaca: –Cambajta ruraj ñucaca caipimi cani. Pai munajpica, ñuca amitopajta rurajcunapaj chaquita maillashpallapish, paipajta ruraj tucushapishchari– nirca.

⁴² Shina nishpaca Abigailca allichirishcahuanmi paipajta ruraj pichca solteracunata pushashpa, burropi tiyarishpa David cachashca huillajcunata catishpa rirca. Chashnami Davidpaj huarmi tucurca.

⁴³ Davidca, Jezreelmanta caj Ahinoam huarmitapishmi paipaj huarmi cachun japirca. Chai ishquindijmi Davidpaj huarmicuna carca.

⁴⁴ Saulca paipaj ushushi Davidpaj huarmi Micaltaca, Galimmanta caj Lais runapaj churi Paltihuanmi cazarachishca carca.