1 SAMUEL 23 - Dios Rimashca Shimicunami

Keila pueblopi causajcunata quishpichingapaj filisteocunahuan David macanacushcami

¹ Davidmanca: “Filisteocunaca Keila pueblopi causajcunahuan macanacushpami, paicunapajtaca parbashca trigotapish shuhuancuna” nishpami huillarcacuna.

² Chaimi Davidca Mandaj Diostaca: –¿Chai filisteocunahuan macanacunaman rishachu?– nishpa tapujpi Mandaj Diosca: –Ari, filisteocunahuan macanacunaman rishpa Keila pueblopi causajcunata quishpichigri– nirca.

³ Ashtahuanpish Davidhuan caj runacunaca: –Riqui, ñucanchijca cai Judá llajtapi cashpapish manchaihuanmi canchij. Keila puebloman rishpa, filisteocunapaj soldadocunahuan macanacunatacarin ashtahuanmi manchashun– nircacuna.

⁴ Chaimi Davidca, cutinllataj Mandaj Diosta tapujpi Mandaj Diosca: –Jatari, Keila puebloman uriyai. Ñucami filisteocunataca cambaj maquipi churasha– nijpimi,

⁵ Davidca, paipaj runacunahuan Keila puebloman rishpa, filisteocunahuan macanacushpaca, jatunta llaquichishpa paicunapaj huagracunata quichushpa aparcacuna. Chashnami Keila pueblopi causajcunataca Davidca quishpichirca.

⁶ Ahimelecpaj churi Abiatar, Davidhuan miticushpa tiyacujca efodta paipaj maquipi apashcami Keila puebloman uriyarca.

⁷ Keila puebloman David shamushcataca Saulmanca ñami huillashcacuna carca. Chaimi Saulca: “Taita Dios ñuca maquipi churajpimi, pungucunapish alli aldabayuj puebloman yaicushpaca paillataj huichcarishpa saquirishca” yuyarcami.

⁸ Chaimi Saulca Keila pueblopi macanacunaman uriyangapaj tucuicunata tandachirca. Davidtapish paihuan caj runacunatapish muyunchishpa japingapajmi chashna rurarca.

⁹ Davidca Saúl paita millai yuyaihuan llaquichigrijta yachashpami, Abiatar curataca: –Efodta apamui– nirca.

¹⁰ Chaimi Davidca: –Israelcunata Mandaj Taita Dioslla, cambajta ruraj ñucaca, Keila pueblopi causajcunata, chai pueblotapish ñucamanta chingachingapaj Saúl shamugrijtami entendini.

¹¹ ¿Keila pueblo c'uchullapi causajcunaca ñucataca Saulpaj maquipi churangachu? ¿Saulca cambajta ruraj ñuca uyashca shinallataj uriyamungachu? Israelcunata Mandaj Taita Dioslla, chaitaca cambajta ruraj ñucamanca tucuita huillachunmi rogani– nijpimi Mandaj Diosca: –Ari, uriyamungami– nirca.

¹² Chaimi Davidca: –¿Keila pueblo c'uchullapi causajcunaca ñucatapish, ñuca runacunatapish Saulpaj maquipi churangachu?– nijpi Mandaj Diosca: –Ari, cancunataca paipaj maquipi churangacunami– nirca.

¹³ Davidca paihuan caj 600 shina runacunandij Keila pueblomanta llujshishpaca, maiman rinata mana yachashpami caiman chaiman puricurcacuna. Keila pueblomanta David miticushpa rishcata Saulman yachaj chayachijpica, paica ña mana rishpami saquirircalla.

Shitashca pambapi David cashcami

¹⁴ Davidca chaimanta rishpaca, Zif shuti shitashcacunapi tiyaj peña jutcucunapimi miticushpa causarca. Saulca tucui punllacunami Davidtaca mashcarca. Taita Diosca Saulpaj maquipica mana churarcachu.

¹⁵ Davidca Saúl paita huañuchingapaj mashcashpa puricujta yachashpami, Zif shuti shitashcapi caj Hores urcupi miticushpa causacurca.

¹⁶ Chaimi Saulpaj churi Jonatanca jatarishcahuan Hores urcupi David cajpi chaiman shamurca. Paica Taita Diosllapi shunguta churai nishpami,

¹⁷ cashna nirca: –Ama manchaichu, ñuca yaya Saulca cantaca manataj japingachu. Israelcunataca canmi mandangui. Ñucaca cambaj q'uipa mandajmi casha. Chashna cana cashcataca ñuca yaya Saulpish yachanmi– nirca.

¹⁸ Chashna ruranataca paicunaca Mandaj Diospaj ñaupajpimi ishquindijtaj ari ninacurca. Davidca Hores urcullapitajmi saquirirca. Jonatanca paipaj huasiman tigrarcallami.

¹⁹ Chai q'uipami, Zifpi causajcunaca, Gabaaman huichi rishpa Saulmanca: –Davidca ñucanchij llajtapimi miticushpa tiyacun. Shitashca pamba uranijman tiyaj Haquila lomapi caj Hores shuti peñacunapimi causacun.

²⁰ Chaimanta jatun mandajlla, can munashpaca cunantaj utca uriyailla. Paitaca ñucanchijmi can jatun mandajpaj maquipi churashun– nircacuna.

²¹ Chaimi Saulca: –Cancuna ñucata llaquishcamantaca, Mandaj Dios cancunataca alli nishca cachun.

²² Cunanca richij, pai maipi miticushcata alli ricushpa rijsimugrichij. Pai maipi cashcata, pi ricushcatapish alli yachamugrichij. Paitaca yallitaj yachaj tucushca, umajlla cashcatami ñucamanca huillancuna.

²³ Maillapi miticuna jutcucunataca tucuita alli ricushpa, pai maipi cashcata alli yachashpa ñucaman huillanaman shamuichij. Chaimi ñucaca cancunahuan rishpa, pai mai llajtapi cashcata alli yachashpaca, Judá aillupaj llajtapica tucuita mashcasha– nircami.

²⁴ Shina nijpimi paicunaca Saulpaj ñaupajmanta jatarishpa Zifman rircacuna. Davidca paipaj runacunandijmi, shitashca pambamanta uranijman caj Arabá llajtapi caj Maón shuti shitashcapi carca.

²⁵ Saulca paipaj gentecunandijmi, Davidta mashcanaman rirca. Saúl mashcacushcata Davidman maijan huillajpimi, paica Maonpi caj rumicunalla tiyan c'acacunaman uriyashpa chaipi miticurca. Saúl chaita uyashpaca Maonpi caj rumicunalla tiyan c'acacunacamami Davidta catishpa rirca.

²⁶ Saulca chai urcu shuj ladotami rirca. Davidpish paipaj runacunandijmi chai urcu caishuj ladota rirca. Davidca Saulta miticungapajmi callpashpa rirca. Saulca paipaj runacunandijmi, Davidtapish, paihuan caj runacunatapish prezu japingapaj muyunchishca carca.

²⁷ Chaipimi shuj huillaj runa Saulpajman chayashpaca: –Filisteocunamari ñucanchij llajtaman shamushpa jatunta llaquichigrin. Utcashpa tigrai– nirca.

²⁸ Chaimi Saulca, Davidta caticushcata saquishpa, filisteocunahuan macanacunaman rirca. Chaimantami chai urcutaca, Sela-hama-lecot nishpa shutichircacuna.

²⁹ Davidca chaimanta rishpaca, En-gadi shuti peña jutcupimi miticushpa causagrirca.