1 SAMUEL 21 - Dios Rimashca Shimicunami

Davidca Saulta miticushpa rishcami

¹ Davidca Ahimelec cura causan Nob puebloman rijpimi, chai curaca mancharishpa tupanaman llujshishpaca: –¿Ima nishpataj canlla shamungui, manachu pi canhuan shamun?– nishpa tapurca.

² Shina nijpi Davidca, Ahimelec curataca: –Jatun mandajmi, ñucamanca shuj ruranata rurachun cachashpa cashna nirca: “Pai imata rurachun nishpa cachashcatapish, imata mingashpa cachashcatapish pi ama yachachun” nircami. Chaimi ñucahuan purij runacunahuanpish maipi tupana cashcata ña huillarcani.

³ Cunanca ¿imata ña micunallata charinguichu? Pichca tandata, mana cashpaca ima tiyashcallatapish cuhuai– nircami.

⁴ Shina nijpi Ahimelec curaca Davidtaca: –Maijan maijanpish micuna tandataca mana charinichu. Diospajlla ch'icanchishca tandallatami charini. Chashna cajpipish cambajta rurajcuna huarmicunahuan mana chayarinacushca cajpica cushallami– nircami.

⁵ Chaimi Davidca curataca: –Mana llullanichu. Cainapish, cainapaj cainapish huarmicunaca ñucanchijmanta carupimi carca. Ñucahuan cajcunaca ñuca llujshimunapajca ñami chuya carca. Caimanca Diospajta rurangapaj mana shamushca cashpapish cunancamacarin ¿maitataj mana ashtahuan chuya cangari?– nircami.

⁶ Chaipica shujtaj tanda mana tiyashcamantami chai curaca Diospajlla ch'icanchishca tandata curca. Chai tandaca Diospaj ñaupajpi caj tandata anchuchina punlla pajtajpi ña anchuchishca tandami carca. Cunanlla cusashca tandata churangapajmi anchuchishca carca.

⁷ Chai punllaca Saulpajta rurajcunamanta shujmi, Mandaj Diospajta rurashpa mana ri tucushca carca. Paica Saulpaj ovejacunata michijcunata mandaj, Edommanta caj Doeg shutimi carca.

⁸ Davidca Ahimelectaca: –¿Manachu shuj lanzata, mana cashpaca shuj espadata caipi charingui? Jatun mandaj utca ri nijpimari ñuca espadatapish, macanacunacunatapish mana apamui tucurcani– nircami.

⁹ Shina nijpi chai curaca: –Ela pugru pambapi Goliat filisteota can mishashpa quichushca espadallami caipica, efod huashapi linsohuan pilluchishca tiyacun. Can chaita apasha nishpaca apailla. Caipica ima shujtajca mana tiyanchu chaillami tiyan– nijpimi, Davidca: –Chaita yalli shujtaj espadaca mana tiyanchu. Chaita cuhuailla– nirca.

¹⁰ Davidca chaimanta chai punllallataj jatarishpa Saulta miticushpa rishpaca, Gat llajtata jatun mandaj Aquispajmanmi rirca.

¹¹ Chaipimi Aquispajta rurajcunaca: –¿Manachu paica Israelta jatun mandaj David? ¿Manachu paimantaca: Saulca, 1.000 gentecunatami huañuchishca, Davidca, 10.000 gentecunatami huañuchishca nishpa tushushpa cantarcacuna?– nircacunami.

¹² Chai yuyailla tucushpami Davidca, Gat pueblota jatun mandaj Aquistaca achcata mancharca.

¹³ Chaimantami Davidca paicunapaj ñaupajpica, yuyai illaj shina tucushpa, paicunapaj chaupipi loco shina tucuj tucushpa, pungucunatapish maipish cachun aspishpa, barbas uritapish ch'uca shutucuj tucurca.

¹⁴ Chaita ricushpami Aquisca paipajta rurajcunataca: –Riquichij, cai runaca yuyai illajmari ¿ima nishpataj ñuca ñaupajman pushamunguichij?

¹⁵ ¿Caillapitaj lococunaca illajpichu cai runataca ñuca ñaupajpi loco tucuchun apamunguichij? Cai runaca ñuca huasimanca mana yaicunachu carca– nirca.