1 SAMUEL 1 - Dios Rimashca Shimicunami

Samuel huacharishcami

¹ Efraín urcupi caj Ramataim pueblopimi, zofitacunapuramanta Elcana shuti shuj runa causarca. Paica Jerohampaj churimi carca. Jerohamca Eliupaj churimi carca. Eliuca Tohupaj churimi carca. Tohuca Zufpaj churimi carca. Zufca Efrainpaj aillupurami carca.

² Elcana runaca ishqui huarmitami charirca. Shujca Ana, caishujca Penina shuti huarmimi carca. Penina huarmica huahuacunata charircami, Anaca mana charircachu.

³ Elcanaca tucuita Mandaj Diosta adorangapaj, sacrificiocunata cungapajmi pai causacun pueblomantaca, Silo puebloman huatanta huichiyaj carca. Chaipica Elipaj Ofni, Finees shuti ishqui churicunami Mandaj Diospajta rurashpa causacurcacuna.

⁴ Elcana runaca sacrificiota cuna punlla chayamujpimi, Taita Diosman sacrificiota cushpaca paipaj huarmi Peninaman, paipaj churicunaman, ushushicunamanpish paicuna japina cashcata cuj carca.

⁵ Ana huarmimanca Mandaj Dios huahuacunata mana cujpi mana huahuacunayuj cajpipish Elcanaca Anataca yallitaj c'uyashcamantami ashtahuan allita agllashpa cuj carca.

⁶ Anamanca huahuacunata charichunca Mandaj Diosllatajmi mana curca. Ashtahuanpish Penina huarmica Anataca chanzata rurashpa p'iñachishpami llaquichij carca.

⁷ Mandaj Diospaj huasiman huatanta huichiyashpapish Penina huarmica Anataca chashnallataj nishpami llaquichij carca. Chaimantami Anaca huacashpa mana micuj carca.

⁸ Paipaj cusa Elcanaca: “Ana, ¿imamantataj huacangui? ¿Ima nishpataj mana micungui? ¿Ima nishpataj cambaj shunguca llaquilla? ¿Manachu ñucallataj cambajca chunga churicunatapish yalli cani?” nijmi carca.

⁹ Shuj cutin Silo puebloman Ana rishpaca micushca ubyashca q'uipami Mandaj Diospaj huasiman rirca. Chaipica Elí curami shuj pilar c'uchupi caj tiyanapi tiyacurca.

¹⁰ Chaipimi Anaca shungumanta llaquirishpa achcata huacashpa Mandaj Diosta mañarca. 0

¹¹ Ana huarmica: “Tucuita Mandaj Dios, cambajta ruraj ñuca llaquihuan cajta ricuhuayari. Cambajta ruraj ñucataca amataj cungarichu. Ashtahuanpish cambajta rurajmanca shuj c'ari huahuata cuhuai. Ñucaca paitaca paipaj tucui causaipi can Mandaj Diospaj cachunmi canman cusha. Paipaj ajchatapish manataj p'itichishcami canga” nishpami mañarca.

¹² Mandaj Diospaj ñaupajpi unita mañacujllapimi, Elica Anapaj shimi cuyurijta mana cuyurijta chaparacurca.

¹³ Ashtahuanpish shungullapi mañacushcamanta Anapaj shimi cuyurishpapish rimashcaca mana uyarijpimi, Elica paitaca machashcami canga yuyarca.

¹⁴ Chaimi Elica: –¿Maicamataj machashpalla puringui? ¡Vinota ubyanataca saquiyari!– nirca.

¹⁵ Ashtahuanpish Anaca: –Ñuca amito, mana machashcachu cani. Vinotapish, sidratapish mana ubyarcanichu. Ashtahuanpish ñuca shungupi llaquihuan huañucuj huarmimari cani. Chaimi Mandaj Diospaj ñaupajpi shungu p'aquirishpa mañacuni.

¹⁶ Cambajta ruraj ñucataca millai huarmi cashcataca ama yuyaichu. Ashtahuanpish tucui shungu ruparishpa achca llaquilla cashpami, caicama mañacurcanilla– nirca.

¹⁷ Chaimi Elica: –Can imata mañashcataca israelcunapaj Taita Dios cushca cachun. Cushicushpa rilla– nirca.

¹⁸ Shina nijpi Anaca: –Cambajta ruraj ñucaca ñapishchari cambaj ñaupajpi alli huarmi cashca ricurini– nishpa pai maita shamushcallatataj tigrashpaca, micurcami. Ña mana ashtahuan llaquilla purircachu.

¹⁹ Cayandijta utca jatarishpaca, Mandaj Diosta adorashpami, Ramá pueblopi caj paicunapaj huasiman tigrarcacuna. Elcanaca paipaj huarmi Anahuan chayarinacucujpimi, Mandaj Diosca Ana mañashcata yuyarirca.

²⁰ Chaimi Anaca chichushpa huachana punlla pajtajpica, shuj c'ari huahuata huacharca. “Mandaj Diosta mañajpi, paimi cai huahuataca cun” nishpami Samuelta shutichirca.

²¹ Chai cati huatapish Elcanaca, tucui paipaj huasi ucu familiandij Mandaj Diosman sacrificiota cuj cashca shinallataj cunaman, Mandaj Diosman cusha nishcata pajtachingapajpishmi Silo puebloman rirca.

²² Ashtahuanpish Anaca mana huichiyarcachu, paipaj cusataca: –Ñucaca cai huahuata raquingacama mana huichiyashachu. Huahuata raquishca q'uipami paitaca Mandaj Diosman cungapaj apashpa huichiyasha. Paica paipaj tucui causaipajmi chaipi saquiringa– nirca.

²³ Chaimi paipaj cusa Elcanaca: –Can yuyashca shinallataj huahuata raquingacama saquirilla. Ashtahuanca Mandaj Dios pai nishca shina pajtachichun– nijpica Anaca saquirircallami. Huahuataca raquingacamami huiñachirca.

²⁴ Ña huahuata raquishca q'uipaca huahua uchillaraj cajpipish, Mandaj Diospaj huasimanmi Silo puebloman aparca. Quimsa malta huagratapish, shuj efa cutatapish, shuj puñu vinotapishmi aparca.

²⁵ Huagrata huañuchishpa Mandaj Diosman cushpaca, huahuatapish Elí curapajmanmi pusharcacuna.

²⁶ Chaipimi Ana huarmica: –Ñuca amito, canca causanguillami. Ñucaca caipi cambaj c'uchupi Mandaj Diosta ¿manachu mañacurcani? Chai huarmillatajmari cani.

²⁷ Cai huahuata cuchunmi mañacurcani. Mandaj Diosca ñuca mañashcataca curcami.

²⁸ Chaimanta ñucapish cai huahuataca pai Mandaj Diosmanmi cuni. Paica tucui paipaj causaipimi Mandaj Diospaj canga– nirca. Chaipimi paica Mandaj Diosta adorarca.