1 REYES 9 - Dios Rimashca Shimicunami

Taita Dioshuan Salomonhuan ari ninacushcami

¹ Mandaj Diospaj huasitapish, pai mandashpa tiyana huasitapish, pai imalla rurasha nicushcatapish Salomonca ña tucuchircami.

² Mandaj Diosca Gabaonpi ricurishca shinallatajmi Salomonmanca cutin ricurirca.

³ Chaipi ricurishpaca Mandaj Diosca: “Ñuca ñaupajpi can mañashcata, rogarishcata uyarcanimi. Cai huasipi ñuca shuti huiñaipaj cachun, can rurashca cai huasitapish ñucapajlla cachun ch'icanchircanimi. Ñuca ñahuicunapish, ñuca shungupish punllantami chai huasipi canga.

⁴ Canca cambaj yaya David shinallataj tucui shunguhuan ñucapajlla tucushpa, imatapish cashcata rurashpa, tucui ñuca imalla rurangui nishcacunata rurashpa, chaitataj pajtachichun nishpa ñuca mandashcata pajtachishpa, pajtachinguitaj nishca shinataj rurashpa ñuca ñaupajpi purijpica,

⁵ israelcunata can mandanataca huiñaipaj cachunmi pi mana cuyuchipajta churasha. Cambaj yaya Davidman: Cambaj huahua huahuapuraca israelcunata mandajca mana illangachu nircanimi. Chai nishca shinallatajmi rurasha.

⁶ Cancunapish, cancunapaj huahua huahuacunapish rumi shungucuna tucushpa ñucamanta anchurishpa ñuca mandashcacunata mana huaquichishpa, chaitataj pajtachichun nishpa cancunaman cushca mandashcacunatapish mana huaquichishpa, ashtahuanpish shujtajcunapaj dioscunapajta rurangapaj rishpa paicunata adorajpica,

⁷ ñuca cancunaman cushca allpamantaca israelcunataca anchuchishami. Ñucapajlla cachun ch'icanchishca cai huasitapish ñuca ñaupajmanta anchuchishami. Chashna rurajpimi israelcunamantaca, tucui cai pachapi causajcunaca yuyachij shimicunata rimashpa asicungallacuna.

⁸ Cai huasica sumaj nishca cashca cashpapish, llaquinayaj siricujta ricushpaca, maijanpish chaita pasajca mancharishpa asishpami: ¿Ima nishpashi Mandaj Diosca cai llajtatapish cai huasitapish chashna rurarca? ningacunami.

⁹ Shina nijpica: Paicunapaj ñaupa yayacunata Egiptomanta llujshichimuj Mandaj Diosta saquishpa, shujtajcunapaj dioscunapajman rishpa paicunapaj maquicunata chutashpa adorashpa, paicunapajta rurashcamantami Mandaj Diosca paicunapaj jahuamanca tucui cai llaquita cachashca ningacunami” nircami.

Salomonca shujtaj ruranacunatapish rurashcami

¹⁰ Salomonca Mandaj Diospaj huasitapish, pai mandashpa tiyana huasitapish, ishquindijtami ishqui chunga huatacunapi tucuchirca.

¹¹ Chai huasicunata ruranapajca, Tiro llajtata jatun mandaj Hirammi cedro caspicunatapish, ciprés caspicunatapish, curitapish, Salomón mashnata mañashcata apamurca. Chaicunamantaca jatun mandaj Salomonca Galileapi caj ishqui chunga pueblocunatami Hirammanca curca.

¹² Salomón cushca pueblocunata ricungapajmi jatun mandaj Hiramca Tiromanta shamurca. Chai pueblocunata ricushpaca mana munarcachu.

¹³ Chaimi Hiramca: “Huauqui ¿Cai pueblocunatachu ñucamanca cushcangui imamí?” nircami. Chashna nishpaca chai pueblocuna tiyan llajtataca Cabul shutitami shutichirca. Cunancama chai shutillatajmi.

¹⁴ Hiramca jatun mandaj Salomonpajca 120 talento curitami cachashca carca.

¹⁵ Jatun mandaj Salomonca, Mandaj Diospaj huasita, pai mandashpa tiyana huasita rurangapaj, pugru pugrupi allpata jundachichingapaj, Jerusalén muyundij pircatapish rurangapaj, shinallataj Hazor pueblotapish, Meguido pueblotapish, Gezer pueblotapish shayachingapajmi gentecunata tandachishpa mirga mirgata churarca.

¹⁶ Egiptota jatun mandaj faraonca Gezerman huichiyashpa chai pueblota japishpami, tucui chaipi causaj cananeocunata huañuchishpa chai pueblotaca rupachirca. Chai pueblotaca cazarashcamanta cuna cashcatami paipaj ushushi Salomonpaj huarmiman curca.

¹⁷ Chaimi Salomonca, Gezer pueblota, ura ladoman caj Bet-horón pueblota,

¹⁸ Baalat pueblota, shitashca pambapi caj Tadmor pueblotapish allichirca.

¹⁹ Shinallataj Salomonca paipaj tucui imalla minishtirishcacunata huaquichina pueblocunataca, carrocunata huaquichinapajpish, caballocunapi tiyarij gentecuna causanapajpish, Jerusalenpipish, Libanopipish, tucui pai mandacun llajtacunapimi pai imallata rurasha nishcataca tucuita rurarca.

²⁰ Amorreo, heteo, ferezeo, heveo, jebuseo nishcacunapura saquirishcacunatami chashna rurachirca. Paicunaca mana israelcunami carca.

²¹ Chaicunaca israelcuna mana tucuita huañuchishcacunapaj huahua huahuacunami carca. Paicunatami Salomonca tributota cuchishpa sinchita trabajachirca. Chaitaca cunan punllacamami chashna rurachicun.

²² Salomonca israelcunataca shujllatapish chashna sinchi trabajocunapica mana churarcachu. Paicunataca macanacuiman rijcuna cachun, paipajta rurajcuna cachun, paipaj q'uipa mandajcuna cachun, soldadocunata mandajcuna cachun, carrocunapi purij soldadocunata mandajcuna cachun, caballopi tiyarij soldadocunata mandajcuna cachunmi churarca.

²³ Salomonca tucui chaicunapi imallata rurajcunata mandajcuna cachun ricujcuna cachunca 550 mandajcunatami churarca.

²⁴ Faraonpaj ushushica Davidpaj pueblomantami Salomón chai huarmipaj rurashca huasiman huichi rirca. Salomonca pugru pugrupipish allpata jundachircami.

²⁵ Mandaj Diospaj huasita tucui rurashpaca, Salomonca Mandaj Diospaj pai rurashca altarpimi cada huata quimsa cutin Mandaj Diosman cushpa tucui rupachinatapish, paihuan alli cangapaj sacrificiocunatapish cushpa rupachij carca. Mandaj Diospaj ñaupajpi caj inciensotapish rupachijmi carca.

²⁶ Jatun mandaj Salomonca, Puca Cucha uripi caj Elot pueblo c'uchullapi caj Ezión-geber pueblopimi barcocunatapish rurachirca. Chai puebloca Edom llajtapimi carca.

²⁷ Hiramca chai barcocunapica mama cuchata alli rijsij barcocunata purichij paipajta rurajcunataca Salomonpajta rurajcunahuanmi cacharca.

²⁸ Paicunami Ofir puebloman rishpa chaimantaca, 420 talentota pizaj curita japishpa jatun mandaj Salomonpaj apamurcacuna.