1 REYES 8 - Dios Rimashca Shimicunami

Dioshuan ari ninacushca quillcata huaquichina arcata Diospaj huasiman Salomón apashcami

¹ Chai q'uipami Salomonca, israelcunata cunaj yuyajcunata, tucui aillucunata pushajcunata, tucui israelcunapaj huasi ucupuracunata pushajcunatapish Jerusalenpi paipaj ñaupajman tandachirca. Paicunataca Davidpaj pueblopi caj Sionmanta Mandaj Dioshuan ari ninacushca quillcata huaquichina arcata apamunapajmi tandachirca.

² Chaimi jatun mandaj Salomonhuanca tucui israelcuna Sionpi tandanacurcacuna. Chaica huatapaj canchis Etanim quilla jatun fiestata rurana punllami carca.

³ Israelcunata cunaj yuyajcuna ña tucuicuna chayajpica, curacunaca Diospaj arcata apangapaj japishpaca,

⁴ Mandaj Diospaj arcataca, Mandaj Dioshuan tupanacuna carpa huasindij, chai carpa huasi ucupi Diospajlla caj imalla tiyashcacunandijmi aparcacuna. Tucui chaicunataca curacunahuan, levitacunahuanmi aparcacuna.

⁵ Jatun mandaj Salomonpish, tucui paihuan tandanacuj israelcunapish Diospaj arca ñaupajpimi ovejacunata huagracunata Diosman cushpa sacrificacurcacuna. Chaicunaca yallitaj achca cashcamanta mashna cashcata mana yachai tucuipaj, mana yupai tucuipajmi carca.

⁶ Chai q'uipami, curacunaca Mandaj Dioshuan ari ninacushca quillcata huaquichina arcataca, maipi churana cashcaman aparcacuna. Diospaj huasi ucupi caj Diospajlla ch'icanchishca ucuman yaicuchishpami querubincunapaj alas ucupi churarcacuna.

⁷ Chai querubincunapaj alasca, Diospaj arca jahuata chutashcami carca. Chashna cashpami, Diospaj arcatapish, Diospaj arcata aparina caspicunatapish taparca.

⁸ Chai arcata aparina caspicunaca, yallitaj jatun cashcamantami Diospajlla ucumantaca ricunalla carca. Chaica Diospajlla ch'icanchishca huasi ñaupajpimi carca. Ashtahuanpish canllamantaca mana ricunallachu carca. Cunancamami chaica chashnallataj tiyacun.

⁹ Chai arca ucupica, ima shujtajca mana tiyarcachu. Horeb urcupi cashpa Moisés churashca ishqui tablajlla rumicunallami tiyarca. Chaipica Mandaj Dios israelcunata Egiptomanta llujshichimushpa ari ninacushca quillcami carca.

¹⁰ Diospajlla ch'icanchishca ucumanta curacuna llujshijpica, Mandaj Diospaj huasipica p'uyumi jundarca.

¹¹ Mandaj Dios sumaj cashca Mandaj Diospaj huasi ucupi jundajpimi, curacunaca Diospajta rurangapaj mana chai ucupi saquiri tucurcacuna.

Salomonca Diospaj huasita Diosman mingashcami

¹² Chai q'uipami Salomonca: “Mandaj Diosca, amsa p'uyupimi causasha” nishcami.

¹³ Shina cajpipish ñucaca can causachunca, shuj huasitami shayachini. Chaipi huiñaita causachun nircami.

¹⁴ Shina nishpaca jatun mandajca, chaipi tandanacushca israelcunapajman muyurishpami Dios allicunata cuchun nirca. Tucui tandanacushca israelcunami chaipi shayacurcacuna.

¹⁵ Chaipimi Salomonca: “Israelcunata Mandaj Taita Diosca alli nishca cachun. Ñuca yaya Davidman pai imallata rurasha nishcataca paipaj maquihuanmi pajtachishca, nishpami cashna nirca:

¹⁶ Ñuca agllashca israelcunata Egiptomanta llujshichimui punllamantapacha Israel aillucunapurapica maijan aillupaj maijan pueblopi ñuca huasita shayachishpa chaipi ñuca shutita churachunca mana agllarcanichu. Ashtahuanpish David cantami ñuca pueblo Israelta pushaj cachun agllarcani nishcami carca.

¹⁷ Ñuca yaya Davidca, israelcunata Mandaj Taita Diospaj shutipi huasita shayachinatami paipaj shungupica yuyarca.

¹⁸ Chashna cajpipish Mandaj Diosca, ñuca yaya Davidtaca: Canca cambaj shungupica ñuca shutipi huasita shayachinatami yuyashcangui. Chai yuyaita charinaca allimi.

¹⁹ Shina cajpipish chai huasitaca mana canchu shayachingui. Ashtahuanpish cambaj lomo tullumanta llujshishca cambaj churimi ñuca shutipi chai huasitaca shayachinga nishcami carca.

²⁰ Mandaj Diosca pai nishcataca pajtachishcami. Chaimantami ñucaca Mandaj Dios nishca shinallataj ñuca yaya Davidpaj randi shayarishpa israelcunata mandaj tucushpa jatun tiyarinapi tiyarircani. Israelcunata Mandaj Taita Diospaj shutipi shuj huasitapishmi shayachircani.

²¹ Chai huasi ucupica, arcata churangapajpishmi shuj uchilla ucuta rurarcani. Chai arcapica Egiptomanta llujshichimucuipi ñucanchij ñaupa yayacunahuan Mandaj Dioshuan ari ninacushca quillcami tiyacun” nircami.

²² Chai q'uipaca Salomonca, Mandaj Diospaj altar ñaupajpi, tucui israelcuna tandanacushcacunapaj ñaupajpi shayarishpa paipaj maquicunata jahua pachaman chutashpami,

²³ cashna nirca: “Israelcunata Mandaj Taita Dios, canhuan ari ninacushca shina causaj, cambajta rurajcunata llaquishpa chaitataj pajtachijca jahua pachapipish cai pachapipish can Dios shinaca pi mana tiyanchu.

²⁴ Cambajta ruraj ñuca yaya Davidman cambaj shimihuan cushatajmi nishcataca, cambaj maquihuantaj rurashpa pajtachijpimi, cunan punllaca chashna tucushca.

²⁵ Israelcunata Mandaj Taita Dioslla, cunanca cambajta ruraj ñuca yaya Davidman cushatajmi nishcataca pajtachiyari. Canca paitaca: Cambaj huahua huahuacuna ñuca nishcata cazushpa, can purishca shinallataj ñuca ñaupajpi purijpica, israelcunata mandaj canamantaca cambaj huahua huahuacunaca manataj illangachu nishcami carcangui.

²⁶ Israelcunata Mandaj Taita Dioslla, cambajta ruraj ñuca yaya Davidman cushatajmi nishcataca pajtachihuayari.

²⁷ ¿Taita Diosca allpa pachapica causangatajchu? Jahua pachacunapish, jahua pachamanta ashtahuan jahuaman caj jahua pachapish can causanapajca mana pajtaipajchu. Canta yuyarinapaj cachun ñuca shayachishca cai huasicarin ¿maitataj pajtangari?

²⁸ Chashna cashpapish ñucata Mandaj Taita Dioslla, cambajta ruraj mañashcata, rogarishcata uyangapajca chaparacunguimi. Cambajta ruraj ñuca cambaj ñaupajpi cunan caparishpa mañashcata uyahuai.

²⁹ Canca cai huasipimi causasha nircanguimi. Chaimanta tutapish punllapish cai huasita chapanataca ama saquihuaichu. Cambajta ruraj ñuca maipi cashpapish cai huasita ricushpa mañashcata uyangui.

³⁰ Cambajta rurajpish, can agllashca israelcunapish cambaj huasita chapashpa mañashcataca, can causacunmanta uyashpa perdonapai.

³¹ Maijanpish shujtajta mana allita rurajpi, pai mana allita rurashcataca cai huasipi caj altar ñaupajpi huillachun nijpi huillanaman shamujpica,

³² chaipica canca jahua pachamanta uyashpami cambajta rurajcunataca, Diosta mana manchajtaca pai ima shina cashcata ricuchishpa chai mana allita rurashcataca paipaj jahuallamantaj tigrachishpa llaquichingui. Cashcata rurajtaca pai cashcata rurashcata ricuchishpa allita cupangui.

³³ Can agllashca israelcunaca canta p'iñachishpa juchallishcamanta paicunata p'iñajcuna llaquichishca tucungachari. Chaipica canman cutirishpa, cambaj shutipi juchacunata huillashpa, canta mañashpa, rogashpa, cai huasipi huacashpa mañajpica,

³⁴ jahua pachamanta uyashpa can agllashca israelcunapaj juchata perdonashpa, can paicunapaj ñaupa yayacunaman cushca llajtallamantaj tigrachinguimi.

³⁵ Paicuna canta p'iñachishpa juchallijpi, jahua pachata huichcajpi mana tamyachijpi can llaquichishcamanta paicunapaj juchacunata cutirishpa, canman juchacunata huillashpa caimanta rogarijpica,

³⁶ jahua pachamanta can uyashpa cambajta rurajcunapaj juchacunata, can agllashca israelcunapaj juchacunata perdonashpa, alli ñanpi purinata yachachishpa, paicunapaj allpacuna cachun can cushca allpacunapica tamyachinguimi.

³⁷ Cai pachapi yaricai, ungüi, granocuna chaquiri, granocuna quilluyai, langostacuna, mana cashpaca piquicuna tiyajpi, maipi causacujpipish paicunata p'iñajcuna muyunchishca cajpi, ima llaquicunahuan, mana cashpaca ungüicunahuan cashpa,

³⁸ maijan runa cashpa, mana cashpaca tucui israelcuna cashpa chai llaquicunahuan cashpa paipaj shungupi llaquirishpa, cai huasiman paicunapaj maquicunata chutashpa mañajpi, rogajpica uyanguimi.

³⁹ Paicuna mañashcata jahua pacha can causacunmanta uyashpa paicunata perdonashpaca paicunapaj shungu ima shina cajta can yachashca shinallataj paicuna ima shina rurashca shinallatajmi tucuicunaman cungui. (Tucui runacunapaj shungutaca canllamari yachangui).

⁴⁰ Ñucanchij ñaupa yayacunaman can cushca allpapi causajcunaca, tucui causaipi canta manchashpa causachunmi chashna rurangui.

⁴¹ Chashnallataj manapish Israel cajcuna cambaj shutita uyashpa caru llajtamanta shamushpaca,

⁴² cai huasipimi mañangacuna. (Paicunaca cambaj jatun shutita, cambaj maquica tucuita rurai tucuj cashcata, cambaj rigracunapish chutashca cashcata uyashcamantami chashna shamungacuna)

⁴³ Paicuna mañashcataca quiquin causacun jahua pachamanta uyashpami, manapish Israel caj, quiquinta caparishpa mañashcataca uyangui. Tucui llajtapi causajcuna quiquinpaj shutita rijsishpaca, quiquin agllashca israelcuna shinallataj quiquinta manchachuncuna. Ñuca rurashca cai huasipi tucuicuna quiquinpaj shutita adorana cashcatapish entendichuncuna.

⁴⁴ Quiquin agllashca israelcuna paicunata p'iñajcunahuan macanacunaman quiquin cachajpi rishpaca, maipi cashpapish quiquin agllashca pueblopi ñuca rurashca huasi ladoman ñahuita churashpa quiquin Mandaj Diosta mañajpica,

⁴⁵ jahua pachamantami paicuna mañashcata, rogarishcata uyashpa ima shina cana cashcata rurachingui.

⁴⁶ (Juchata mana ruraj runaca mana tiyanchu) Shina cajpipish quiquinta mana cazushpa juchallijpica, quiquinca paicunahuan p'iñarishpami caru llajtaman cashpa, c'uchulla llajtaman cashpapish prezu apachun paicunata p'iñajcunapaj maquipi churangui.

⁴⁷ Paicunaca prezu apashca llajtapi cashpami, quiquin shungullapitaj mana allita rurashcamanta cutirishpaca, huananchijmi nishpa cashna nishpa mañangacuna: Juchallishcanchijmi, millaitami rurashcanchij, mapatami rurashcanchij ningacuna.

⁴⁸ Paicunata p'iñajcuna prezu apashca llajtapi cashpami, paicunaca tucui shunguhuan, tucui almahuan quiquinman cutirishca cashpaca, paicunapaj ñaupa yayacunaman quiquin cushca llajta ladoman, quiquin agllashca pueblo ladoman, cai ñuca rurashca huasi ladoman ñahuita churashpa mañangacuna.

⁴⁹ Paicuna mañashcata rogarishcata quiquin causacun jahua pachamanta uyashpami, paicunata mitsanata yuyaringui.

⁵⁰ Quiquin agllashcacunataca tucui quiquin mandashcacunata p'aquishcata, imallata rurashpa quiquinta c'ariyashpa juchallishcacunata perdonashpami, paicunata prezu apashpa llaquichishpa causacujcunamanpish llaquina yuyaita cungui.

⁵¹ Paicunaca cambajlla cachun quiquin agllashcacunamari. Paicunataca quiquinmari fierro hornomanta shina Egiptomanta llujshichimurcangui.

⁵² Cambajta ruraj mañashcata, quiquin agllashca israelcuna rogarishcataca cambaj ñahuicunahuan ricuracunguimi. Paicuna ima mañashcatapish uyarangapajmi chashna cangui.

⁵³ Mandaj Jatun Dioslla tucui cai pachapi cajcunapuramantami ñucanchijtaca cambajlla cachun ch'icanchircangui. Ñucanchij ñaupa yayacunata Egiptomanta llujshichimucushpa cambajta ruraj Moisesman nishca shinallatajmi rurarcangui” nircami.

⁵⁴ Salomonca Mandaj Diosta mañanata, rogarinata tucuchishpaca, Mandaj Diospaj altar ñaupajpi maquicunata jahua pachaman chutashpa cungurishcamanta jatarishpa,

⁵⁵ shayarishpaca tucui chaipi tandanacushca israelcunaman Mandaj Dios allicunata cushca cachun nishpaca sinchita caparishpami:

⁵⁶ “Pai agllashca israelcunaman sumaj causaita cuj, pai tucui imalla nishca shinallataj pajtachij Mandaj Diostaca alli nishca cachun. Paipajta ruraj Moisesman huillachishcacunataca shuj shimillatapish mana saquishpami pai cusha nishca shinallataj tucuita pajtachishca.

⁵⁷ Ñucanchijta Mandaj Taita Diosca, ñucanchijmanta ama ladoyashpa ama anchurishpa ñucanchij ñaupa yayacunahuan cashca shinallataj ñucanchijhuanpish cachun.

⁵⁸ Ñucanchij ñaupa yayacunata mandashca shinallataj ñucanchijpish pai mandashcacunata, chaitataj pajtachichun nishcata pajtachishpa, pajtachinguitaj nishca shinataj rurashpa, tucui pai mandashcacunata pajtachingapaj ñucanchijtaca paita cazujcunata rurachun.

⁵⁹ Paipajta rurajpajpish, pai agllashca israelcunapajpish imalla illashcapi cushpa ayudachunca, Mandaj Diospaj ñaupajpi imalla shimicunahuan mañashcacunaca tutapish, punllapish Mandaj Taita Diospaj c'uchupi cachun.

⁶⁰ Chashna cajpimi, tucui cai pachapi causajcunaca Mandaj Diosca Taita Diostaj cashcata, pai shina pi shujtajca mana tiyashcata yachangacuna.

⁶¹ Chaimanta tucui shunguhuan ñucanchijta Mandaj Taita Diospajlla tucuichij. Cunan punlla ima shina ruracuj shinallataj chaitataj pajtachinguichij nishca shina purishpa, pai mandashcacunata cazunguichij” nircami.

⁶² Chashna nishpaca jatun mandajpish tucui israelcunapish paihuan tucushpami, Mandaj Diosman sacrificiocunata curcacuna.

⁶³ Salomonca Mandaj Dioshuan alli cangapajmi sacrificiocunata curca. Chai sacrificiocunaca: 22.000 huagracuna, 120.000 ovejacunami carca. Chashnami jatun mandajpish, tucui israelcunapish Mandaj Diospaj huasitaca cambajlla cachun nircacuna.

⁶⁴ Chai punllallatajmi jatun mandajca Mandaj Diospaj huasi ñaupajpi caj patiotapish Diospajlla cachun nirca. Chai patiopimi Mandaj Diosman cushpa tucui rupachinatapish, chaquishca granocunatapish, Dioshuan alli cangapaj cushca huiratapish paiman cushpa rupachirca. Mandaj Diospaj huasi ñaupajpi caj bronce altarca uchilla cashcamanta Diosman cushpa tucui rupachinapajpish, chaquishca granocunata cungapajpish, Dioshuan alli cangapaj cushca huirata rupachingapajpish mana pajtajpimi chaipi rupachirca.

⁶⁵ Chai punllacunallatajmi Salomonca yallitaj achca tandanacushca tucui israelcunahuan canchis punllata fiestata rurarca. Paicunaca Hamat puebloman yaicunamanta callarishpaca, Egiptopi caj jatun yacucama causajcunami ñucanchij Mandaj Diospaj ñaupajpi tandanacurcacuna. Shujtaj canchis punllacunatapishmi fiestata rurarcacuna. Tucuimantaca chunga chuscu punllacunatami fiestata rurarcacuna.

⁶⁶ Pusaj punllapica jatun mandaj Salomonca tucuicunatami caya minchacamachij nirca. Paicunapish jatun mandajtaca Dios allicunata cuchun nishpaca, paicunapaj huasicunamanca yallitaj cushijlla shungucunahuanmi tigrarcacuna. Mandaj Diosca paipajta ruraj Davidpajpish, pai agllashca israelcunapajpish achca allicunata cushcamantami chashna tigrarcacuna.