1 REYES 6 - Dios Rimashca Shimicunami

Diospaj huasita Salomón shayachishcami

¹ Salomonca israelcunata ña chuscu huatata mandacushpami, chai huatapaj Zif shuti ishqui quillapi Diospaj huasita shayachinata callarirca. Israelcuna Egiptomanta llujshimushcaca chaicamaca 480 huatacunami carca.

² Salomón shayachishca Mandaj Diospaj huasica, sunimanca ishqui chunga canchis metrota, anchomanca iscun metrotami charirca. Altomanca chunga quimsa metro chaupitami charirca.

³ Diospaj huasi ñaupajpi caj corredorca, sunimanca Diospaj huasi ucu ancho shina iscun metromi carca. Anchomanca chuscu metro chaupimi carca.

⁴ Salomonca Diospaj huasipaj ventanacunataca ucu ladomanca anchota, canlla ladomanca quichquitami rurachirca.

⁵ Diospaj huasi muyundijtapish chai patallapitaj pegachishpami shujtaj ucucunata rurachirca. Diospajlla ch'icanchishca ucu muyundijtapish chashnallatajmi muyundijta ucucunata rurachirca.

⁶ Callaripaj caj ucucunaca tucui muyundijpi caj ucucuna shinallatajmi anchomanca ishqui metro ishqui chunga pichca centímetro carca. Jahua chaupi altopi caj ucucunaca anchomanca ishqui metro canchis chunga centimetromi carca. Ashtahuan jahua altoman caj ucucunaca anchomanca quimsa metro chunga pichca centimetromi carca. Chai altibajo ucucunata rurangapaj caspicunata churangapajca, Diospaj huasi lado uripi caj pircacunaca callaripica ancho, tucurimanca ñañuyachishcami carca. Diospaj huasi pircataca ama jutcushpa caspita satichishpa churangapajmi chashna rurachirca.

⁷ Diospaj huasita ruracushpaca, rumicunataca labrashpa allichishca pircacushpa ña churanallatami apamurcacuna. Chaimantami huasita ruracunpica martillocunahuan, hachacunahuan, fierromanta rurashca ima shujtajcunahuan tacashcacunaca mana uyarirca.

⁸ Chaupi altibajo ucucunaman yaicuna punguca Diospaj huasi alli ladomanmi carca. Chaimanpish quimsa altibajoman yaicunapajpish muyushpa llujshina churutajlla gradacunami tiyarca.

⁹ Salomonca Diospaj huasita tucui pircashpaca cedro caspicunahuan, cedro tablacunahuanmi jahua c'atataca churarca.

¹⁰ Diospaj huasi muyundijpica, ishqui metro ishqui chunga pichca centímetro altota charij ucutami chai patallapitaj pegachishpa rurachirca. Chaitaca cedro caspicunahuanmi rurachirca.

¹¹ Mandaj Diosca Salomontaca cashnami nirca:

¹² “Can ruracun huasimantaca caitami nisha nini: Chaitataj pajtachichun nishpa ñuca nishca shinataj purishpa, ñuca pajtachinguitaj nishca shinataj rurashpa, ñuca mandashcacunata tucuita huaquichishpa chaicunapi nishca shinataj purijpica, cambaj yaya Davidman imallata nishcataca chaitatajmi cambajca pajtachisha.

¹³ Chai huasipi causashpami ñucaca israelcunapaj chaupipi causasha. Ñuca agllashca israelcunataca manataj saquishachu” nircami.

¹⁴ Salomonca chashnami chai huasitaca sumajta rurashpa tucuchirca.

¹⁵ Chai huasi ucu pata quinritaca pambamanta callarishpa, jahua caspicunaman tupajtami cedro tablacunahuan churarca. Pambatapish ciprés tablacunahuanmi churarca.

¹⁶ Chai huasi ashtahuan ucu c'uchumanca iscun metrota charij shuj ucutami pambamanta callarishpa jahua c'atacama cedro tablacunahuan rurarca. Chai ucutaca Diospajlla ch'icanchishca cachunmi rurarca.

¹⁷ Diospaj huasica Diospajlla ch'icanchishca ucumanta pungucamaca chunga pusaj metrotami charirca.

¹⁸ Diospaj huasi ucu patataca cedro tablacunahuan tucuita tapashcami carca. Chai tablacunapica, sachapi tiyaj calabazacunatajllata, sisa botoncunatajllata labrashcami carca. Cedro tablacunahuan tucuita tapashca cajpimi shuj rumillapish mana ricurirca.

¹⁹ Salomonca Mandaj Dioshuan ari ninacushca quillcata huaquichina arcata churangapajca, Diospajlla ch'icanchishca ucutaca sumaj ricunacunata churashpami allichirca.

²⁰ Diospajlla ch'icanchishca ucuca chuscundij ladomanpish altomanpish iscun metrotami charirca. Chai ucutaca ashtahuan alli curihuanmi churarca. Cedromanta rurashca altartapish curillahuantajmi churarca.

²¹ Chashnami Salomonca Diospaj huasi ucutaca ashtahuan alli curihuan churashpa, Diospajlla ch'icanchishca ucuman yaicuna pungupipish curi cadenacunallatataj churarca. Tucuitami curihuan churarca.

²² Diospaj huasi ucutaca tucuitami curihuan churarca. Diospajlla ch'icanchishca ucuman yaicuna pungupi tiyaj altartapish tucuitami curihuan churarca.

²³ Diospajlla ch'icanchishca ucupi churangapajca olivo caspimantami ishqui querubincunata rurarca. Chaicunaca ishquindijtajmi altomanca chuscu metro pichca chunga centímetro carca.

²⁴ Chai querubinpaj shuj alasca, ishqui metro ishqui chunga pichca centimetrotami charirca. Caishuj alaspish ishqui metro ishqui chunga pichca centimetrollatatajmi charirca. Chashnami shuj alas puntamanta caishuj alas puntacamaca chuscu metro pichca chunga centimetrota charirca.

²⁵ Caishuj querubinpaj alaspish chuscu metro pichca chunga centimetrotami charirca. Chai querubincunaca ishquindijtaj chai shinallatataj, chai valillatataj rurashcami carca.

²⁶ Shuj querubinca altomanca chuscu metro pichca chunga centimetrotami charirca. Caishuj querubinpish chai shinallatatajmi charirca.

²⁷ Chai querubincunatami Diospaj huasipi caj Diospajlla ch'icanchishca ucupi churarca. Shujpaj alasca pata quinriman tupajta chutashcami carca. Caishujpaj alaspish caishuj pata quinriman tupajta chutashcami carca. Chaupi ucupica, ishquindij querubincunapaj alaspura tupanacushcami carca.

²⁸ Chai querubincunatapish, curillahuantajmi jahuata churarca.

²⁹ Diospaj huasi tucui patacunapica ucutapish, jahuatapish tucui laya sumaj querubincunatajllata, palmera yuracunatajllata, sisa botoncunatajllata rurashpami churarca.

³⁰ Diospajlla ch'icanchishca ucu pambatapish, Diospaj huasi ucu pambatapish curihuanmi churarca.

³¹ Diospajlla ch'icanchishca huasi ucuman yaicuna pungupi punguta churangapajca olivo caspimantami rurarca. Pungu jahuaman tiyaj caspipish, lado uriman shayaj caspicunapish pichca esquinacunayujmi carca.

³² Chai pungu hojacunaca ishquindijtajmi olivo caspimanta rurashca carca. Chai pungucunapica querubincunatajllata, palmera yuracunatajllata, sisa botoncunatajllata labrashpa rurashcami carca. Chaicunataca curihuanmi churarca. Querubincunatajllatapish, palmera yuracunatajllatapish curillahuantajmi churarca.

³³ Diospaj huasiman yaicuna pungu quisyucunapish olivo caspita rurashca cuadradomi carca.

³⁴ Chai pungu hojacunataca ciprés caspitami rurarca. Chai pungu hojacunaca ucumanpish, canllamanpish muyujllami carca.

³⁵ Canllaman caj pungu hojacunapipish querubincunatajllata, palmera yuracunatajllata, sisa botoncunatajllata labrashpa rurashcami carca. Chai jahuataca tucuita curihuan churashcami carca.

³⁶ Diospaj huasi chaupi canllapica labrashca rumicunatami quimsa filata churarca. Chai jahuapica shuj filataca cedro caspicunatami churarca.

³⁷ Salomonca ña chuscu huatata mandacushpami, Zif shuti quillapi Mandaj Diospaj huasita shayachingapaj callari rumicunata churarca.

³⁸ Chai huasitaca chunga shuj huatata mandacushpa Bul shuti pusaj quillapimi, imapajlla minishtirishca ucucunandij rurashpa tucuchirca. Chai huasitaca canchis huatapimi rurarca.