1 REYES 5 - Dios Rimashca Shimicunami

Salomonhuan jatun mandaj Hiramhuan ari ninacushcami

¹ Salomontaca paipaj yaya Davidpaj randi jatun mandaj cachun aceitehuan churashcata uyashpami, Tiro llajtata jatun mandaj Hiramca, paipajta rurajcunata paipajman cacharca. Hiramca Davidtaca tucui causaipimi c'uyarca.

² Salomonca Hiramman huillachunca cashna nishpami cacharca:

³ “Ñuca yaya Davidca muyundij llajtacunahuan macanacui tiyajpi Mandaj Dios paita p'iñajcunata paipaj chaqui ucupi churangacama macanacucushpa, Mandaj Taita Diospaj huasita mana shayachi tucushcataca canllataj yachanguimi.

⁴ Cunanca ñucata Mandaj Taita Diosmi maipi cashpapish sumajta causachun churashca. Ñucata p'iñajcunapish mana tiyanchu. Imata manchanapish mana tiyanchu.

⁵ Chaimi ñucaca, Mandaj Dios ñuca yaya Davidman nishca shinallataj ñucata Mandaj Taita Diospaj huasita shayachina tucurcani. Mandaj Diosca ñuca yayamanca: Cambaj mandanapica ñucami cambaj randi mandachun cambaj churita churasha. Paimi ñuca huasitaca shayachinga nishcami carca.

⁶ Cunanca, líbano urcupi tiyaj cedro yuracunata ñucapaj p'itichun mandai. Cambajta rurajcunata ayudachunca ñucapajta rurajcunata cachashallami. Ñucanchijpurapica, sidoniocuna shina caspicunata rurajcuna mana tiyashcataca canllataj yachanguimi. Cambajta rurajcuna trabajashcamanta can mashnata cuchun nijpipish ñuca cushallami” nichunmi cacharca.

⁷ Salomón imalla nishcata uyashpaca Hiramca jatunta cushicushpami: “Cai jatun pueblota mandachun Davidman yachaisapa churita cuj Mandaj Diosca alli nishca cachun” nirca.

⁸ Hiramca Salomonmanca: “Can imallata nishcacunataca ari ninimi. Cedro caspicunata, ciprés caspicunata can ima shina rurachun nishcataca rurashallami.

⁹ Chai caspicunataca ñucapajta rurajcunami, líbano urcumanta mama cuchacama apangacuna. Chaimantaca can maiman apachun nishcacamami balsacunapi churashpa mama cuchata cachasha. Chaipi pascajpi can apanguilla. Canpish ñuca mañashca shinallataj ñuca familiapaj micunata cachangui” nichunmi cacharca.

¹⁰ Hiramca Salomonmanca cedro caspicunata, ciprés caspicunataca Salomón munashca shinami curca.

¹¹ Salomonpish Hirammanca, paipaj familiacuna micuchunca 20.000 coro trigota, ishqui chunga coro ashtahuan alli aceitetami curca. Chaitaca Salomonca Hirammanca huatantami cuj carca.

¹² Mandaj Diosca Salomonmanca pai cusha nishca shinallatajmi yachaita curca. Hiramhuan, Salomonhuanca sumajta causangapaj ishquindij ari ninacushpami sumajta causarcacuna.

¹³ Jatun mandaj Salomonca, mirga mirga trabajachunmi 30.000 runacunata tucui Israelmanta tandachichirca.

¹⁴ Paicunataca cada quillami 10.000, 10.000 chaupishpa huashan huashan líbano urcuman cacharca. Chashnami paicunaca shuj quillataca líbano urcupi, ishqui quillataca paicunapaj huasipi carcacuna. Paicunataca Adonirammi pushaj carca.

¹⁵ Salomonca aparishpa trabajajcunatapish 70.000 runacunatami charirca. Urcupi rumicunata labrajcunatapish 80.000 runacunatami charirca.

¹⁶ Salomonca chaicunapaj jahuami imallata rurajcunata ricushpa mandajcunataca 3.300 runacunata charirca.

¹⁷ Jatun mandajca huasita rurangapaj callaripi churangapajca, jatun rumicunata, sumaj valij rumicunata, labrashca rumicunatapishmi apamuchun mandarca.

¹⁸ Huasita shayachijcunaca, Salomonpaj runacunapish, Hirampaj runacunapish, Gebalmanta runacunapishmi carca. Paicunami huasita shayachingapajca caspicunata p'itishpa, rumicunata labrashpa allichircacuna.