1 REYES 19 - Dios Rimashca Shimicunami

Horeb urcupi Elías miticugrishcami

¹ Acabca paipaj huarmi Jezabelmanca, Elías imallata rurashcatapish, Baalpaj profetacunata espadahuan huañuchishcatapishmi tucuita parlarca.

² Chaimi Jezabelca, Eliasta cashna nichun shuj huillajta cacharca: “Can chai profetacunata huañuchishca shinallataj cantapish ñuca mana caya cai horaspaj huañuchijpica, ñucataca ñuca dioscuna jatunta llaquichichun” ninmi nichunmi cacharca.

³ Chaita uyashpami Eliasca jatarishcahuan paipaj causaita quishpichingapaj Judapi caj Beersebapi miticunaman rirca. Chaiman chayashpaca paipajta rurajtaca chaipimi saquirca.

⁴ Paica ña shuj punllata shitashca pambata rishpami, enebro yura ucupi tiyarishpa ña huañunata munashpa: “Mandaj Dioslla, caicamallami causasha nini. Ñucaca ñuca ñaupa yayacunata yallica mana canichu. Ñuca causaita quichuhuailla” nirca.

⁵ Chaipimi enebro yura ucupi siririshpa dormicujpi shuj ángel paita cuyuchishpaca: “Jatari micui” nirca.

⁶ Shina nijpi pai ricunapajca paipaj sauna c'uchupica tullpapi cusashca shuj tandahuan, uchilla puñu yacuhuan tiyacushcatami ricurca. Chaita ricushpa tandata micushpa yacutapish ubyashpaca cutinmi dormirirca.

⁷ Mandaj Diospaj ángel cutinllataj tigrashpa cuyuchishpaca: “Purinaca achcarajmi illan. Jatari micui” nircami.

⁸ Shina nijpi jatarishpaca micurcami, yacutapish ubyarcami. Chai micunata micushpaca fuerzayuj tucushpami, chuscu chunga punllacunata, chuscu chunga tutacunata purishpa Diospajlla caj Horeb urcuman chayarca.

⁹ Chaiman chayashpaca, shuj jutcuman yaicushpami, chai tutaca chaipi pacarirca. Chaipimi Mandaj Diosca: “¿Imatataj caipica ruracungui, Elías?” nirca.

¹⁰ Shina nijpi Eliasca: “Tucuita Mandaj Taita Dios nishcata pajtachina yuyailla huañuricuj cashcamantami caipi tiyacupani. Israelcunaca pajtachingapaj ari nishcata mana cazushpamari, cambaj altarcunatapish tucui urmachircacuna. Profetacunatapish espadahuanmi huañuchircacuna. Ñucallamari saquirishcani. Cunancarin ñucatapish huañuchingapajmi mashcacuncuna” nircami.

¹¹ Chaipimi Mandaj Diosca: “Canllaman llujshishpa, cai urcullapitaj ñuca ñaupajpi shayari” nirca. Mandaj Dios chashna nishpa pasajpica, yallitaj sinchi huaira shamushpami Mandaj Diospaj ñaupajpi chai urcutaca chaupirca. C'acayashcatapish t'unirca. Mandaj Diosca chai huairapica mana ricurircachu. Chai q'uipaca, allpa chujchuimi tiyarca. Mandaj Diosca allpa chujchuipipish mana ricurircachu.

¹² Chai q'uipaca ninami ricurirca. Mandaj Diosca chai ninapipish mana ricurircachu. Chai q'uipaca, sumaj huairami allijlla huij huij nishpa uyarirca.

¹³ Chaita uyashpami Eliasca jahua churanahuan ñahuita ch'ungullirishpa, chai jutcumanta llujshishpa pungullapi shayarirca. Elías chaipi shayarijpimi: “¿Imatataj caipica ruracungui, Elías?” nishpa rimashca uyarirca.

¹⁴ Shina nijpi Eliasca: “Tucuita Mandaj Dios nishcata pajtachina yuyailla huañuricuj cashcamantami caipi cani. Israelcunaca pajtachingapaj ari nishcata mana cazushpamari, cambaj altarcunatapish tucui urmachircacuna. Profetacunatapish espadahuanmi huañuchircacuna. Ñucallamari saquirishcani. Cunancarin ñucatapish huañuchingapajmari mashcacuncuna” nircami.

¹⁵ Shina nijpi Mandaj Diosca: “Can maita shamushca ñanllatataj tigrashpa, shitashca pambapi caj Damasco puebloman ri. Chaiman chayashpaca Siria llajtata jatun mandaj cachun Hazaeltaca aceitehuan churangui.

¹⁶ Nimsi runapaj nieto Jehutaca, israelcunata jatun mandaj cachun aceitehuan churangui. Abel-mehola pueblomanta caj Safatpaj churi Eliseotaca, cambaj randi profeta cachun aceitehuan churangui.

¹⁷ Hazaelpaj espadamanta quishpirijtaca, Jehumi huañuchinga. Jehupaj espadamanta quishpirijtaca, Eliseomi huañuchinga.

¹⁸ Ñucaca Israelpica Baalta mana cungurij, mana muchaj, 7.000 runacunatami puchuchigrini” nircami.

Profeta cachun Eliseota churashcami

¹⁹ Elías chaimanta tigrashpaca, Safatpaj churi Eliseo chunga ishqui yuntacunahuan yapucunmanmi chayarca. Caishujcunahuanca paita ñaupashpami yapucurcacuna, shuj yuntahuanca Eliseomi caticurca. Chaipimi Eliasca Eliseo paipaj ñaupajta pasacujpica paipaj jahua churanata Eliseopaj jahuapi churarca.

²⁰ Chaimi Eliseoca, yuntata chaipi saquishcahuan Eliasta catishpa callpashpa shamushpaca: –Ñuca yaya mamata muchashpa caya minchacama nishpa, shamungacamalla shuyai. Chai q'uipaca canta catishallami– nirca. Shina nijpi Eliasca: –Shinashpaca rilla, imapaj cayashpa ñuca chashna rurashcataca ama cungaringuichu– nircami.

²¹ Shina nijpi Eliseo tigrashpaca, ishqui huagrata huañuchishpa, yapuna caspicunata yantashpami, aichata cusashpa tucuicunaman cararca. Chai q'uipaca Eliseoca, Eliasta catishpa rishpami, paipajta ruraj tucurca.