1 REYES 18 - Dios Rimashca Shimicunami

Jatun mandaj Acabta ricunaman Elías tigrashcami

¹ Ña achca punllacuna q'uipa quimsa huata tucujpimi, Mandaj Diosca Eliastaca: “Ñucaca cai llajtapica ñami tamyachigrini. Acabpajman rishpa paipi ricurigri” nirca.

² Elías Acabpajpi ricurigri punllapica, Samariapica yallitaj yaricaimi tiyarca.

³ Acabca, paipaj mayordomo Abdiastami cayarca. Abdiasca, Mandaj Diosta tucui shunguhuan manchajmi carca.

⁴ Mandaj Diospaj profetacunata Jezabel huarmi huañuchicujpica, Abdiasca patsaj profetacunata japishpami pichca chungataca shuj jutcupi, caishuj pichca chungataca shujtaj jutcupi pacashpa, micunatapish cararca. Yacutapish curca.

⁵ Acabca Abdiasta cayashpaca: –Tucui cai llajtapi tiyaj yacu pugyu tiyancunapipish, yacu huaicucunapipish q'uihuacuna tiyanpishchari ricumugri. Caballocunata, mulacunata chaicunapi michishpa animalcuna illajlla ama saquiringapaj– nircami.

⁶ Maijan llajtacunallata mashcagrinata yuyarinacushpaca Acabca shuj ñanta, Abdiasca caishuj ñantami ch'icanyanacushpa rircacuna.

⁷ Ñanta ña ricushpami Abdiasca Eliashuan tupashpa paita rijsishpaca paipaj ñaupajpi pambaman tupajta cumurishpa: –¿Manachu canca ñuca amo Elías cangui?– nirca.

⁸ Shina nijpi Eliasca: –Ari, ñucatajmari cani. Cambaj amopajman rishpa Eliasca caipimi nishpa huillagri– nircami.

⁹ Chaimi Abdiasca: –¿Ima juchata rurashca cajpitaj, cambajta ruraj ñucataca Acab huañuchichun paipaj maquipi churasha ninguiyari?

¹⁰ Mandaj cambaj Taita Diosca causajmi. Tucui shujtaj llajtacunamanpish, tucui mandajcunapajmanpishmi ñuca amo Acabca canta mashcachun cacharca. Chai llajtacunata mashcashpa tigrajcunataca manatajchu ricurin nishpa allitaj tapujpimi manataj ricurinchu nishpa huillarcacuna.

¹¹ Cunanca ¿ima nishpataj canca ñuca amomanca Eliasca caipimi nishpa huillagrichun ninguiyari?

¹² Ashtahuanpish ñuca caimanta rishpa Acabman huillashpa tigranapajca, Mandaj Diospaj Espiritumi cantaca ñuca mana yachai tucuipaj mai shujtajman apanga. Chaipica canta mana japishpaca ñucatamari huañuchinga. Cambajta ruraj ñucaca, huambramantapachamari Mandaj Diosta tucui shunguhuan manchashpa causani.

¹³ Mandaj Diospaj profetacunata Jezabel huañuchicujpi, ñuca imallata rurashcataca can ñuca amomanca ¿manachari huillarcacunari? Mandaj Diospaj patsaj profetacunataca ñucamari pichca chungataca shuj jutcupi, caishuj pichca chungataca shujtaj jutcupi pacashpa, micunatapish cararcani, yacutapish curcani.

¹⁴ Cunanca ñucata huañuchichunmari ñuca amomanca Eliasca caipimi nishpa huillagrichun ningui– nircami.

¹⁵ Shina nijpi Eliasca: –Tucuita Mandaj Diosca causajmi. Paipaj ñaupajpimi cani: Cunantajca Acabpaj ñaupajpi ricurishami– nircami.

¹⁶ Chaimi Abdiasca Acabhuan tupanaman rishpa Elías chaipi cashcata huillajpi Acabca, Eliashuan tupanaman shamurca.

¹⁷ Acabca Eliasta ricushpaca: –¿Canca israelcunata muspachij Eliastajchu cangui?– nircami.

¹⁸ Shina nijpi Eliasca: –Mana ñucachu israelcunataca muspachircani. Ashtahuanpish canhuan, cambaj yayapaj huasi familiahuanmi Mandaj Dios mandashcacunata saquishpa, Baalcunata catishpa israelcunataca muspachircanguichij.

¹⁹ Cunanca tucui israelcunata Carmelo urcupi tandachichun cachai. Jezabel huarmipajpi micushpa causacuj Baalpaj 450 profetacunatapish, Asera diospaj 400 profetacunatapish tandachichigri– nircami.

Eliaspish Baalpaj profetacunapish

²⁰ Shina nijpimi Acabca tucui israelcunatapish, Baalpaj profetacunatapish cayachishpa Carmelo urcupi tandachirca.

²¹ Chaipimi Eliasca, tucui chaipi cajcunapajman c'uchuyashpaca: –Callaripi ruracushcata saquishpamari ishquipajta rurajcuna tucushcanguichij. Chashna canataca ¿maicamataj saquinguichij? Mandaj Dios Diostaj cajpica, paita catichigari. Mana cashpaca Baal diostaj cajpica, paita catichigari– nijpica, chaipi cajcunaca shuj shimillapish mana llujshircacunachu.

²² Eliasca cutinllatajmi tucui chaipi cajcunataca: –Mandaj Diospaj profetacunamantaca ñucallami saquirishcani. Ashtahuanpish Baalpaj profetacunaca, 450tami tiyan.

²³ Cunanca ishqui huagracunata apamuichij. Chai ishquimantaca paicuna munashcata shujta japishpa, mirga mirgata p'itishpa, yanta jahuapi churachuncuna. Chashna churashpaca, ninataca ama japichichun. Ñucapish caishuj huagrata allichishpa yanta jahuapi churashpa ninataca mana japichishachu.

²⁴ Cancunaca cancunapaj dioscunapaj shutipi mañanguichij. Ñucaca Mandaj Diospaj shutipimi mañasha. Mañashcata uyashpa ninata cachaj Diosmi Diostaj canga– nijpica tucuicunami: –Allitamari ningui– nircacuna.

²⁵ Chaipimi Eliasca, Baalpaj profetacunataca: –Cancunaca achcacunami canguichij. Cancuna munashca huagrata shujta japishpa cancunaraj allichichij. Ninataca ama japichishpa cancunapaj dioscunapaj shutipi mañaichij– nircami.

²⁶ Chaimi paicunaca Baalman cushca huagrata japishpa allichishpa altar jahuapi churashpa Baalpaj shutipi mañashpaca: “¡Baal ñucanchij mañashcata uyahuai!” nishpa, tutamantamanta chaupi punllacama mañarcacuna. Ashtahuanpish ima rimashca mana uyarircachu, pi imata mana cutichircachu. Paicuna rurashca altar muyundijtami caparishpa saltashpa puricurcallacuna.

²⁷ Ña chaupi punlla tucujpimi, Eliasca chanzata rurashpa paicunataca: –Ashtahuan sinchita caparichij. Paica diostajmi. Imatamari yuyaricunga, mana cashpaca imatamari ruracunga, mana cashpaca mai ñantamari puricunga, mana cashpaca dormicungamari rijchachinamari– nirca.

²⁸ Shina nijpi paicunaca ashtahuan sinchita caparishpami, paicuna ima shina ruraj cashca shinallataj cuchillocunahuan, uchilla lanzacunahuan chugririshpa yahuarsapa tucushpa yahuar shutucuj tucurcacuna.

²⁹ Ña chaupi punlla q'uipapish, sacrificiota cuna horascamami paicunaca ashtahuan caparishpa catircacuna. Chashna caparicujpipish, pi mana uyarcachu. Pi imata mana cutichircachu. Ima rimashcapish mana uyarircachu.

³⁰ Chaimi Eliasca tucui chaipi cajcunataca: –Ñucapajman c'uchuyamuichij– nijpi tucuicuna paipajman c'uchuyamujpi Eliasca Mandaj Diospaj altarta urmachishcata allichirca.

³¹ Eliasca chai altartaca, Jacobpaj churicuna chunga ishqui aillucuna cashca shinallatajmi, chunga ishqui rumicunata japishpa allichirca. Mandaj Diosmi Jacobtaca: “Cambaj shutica Israelmi canga” nishca carca.

³² Mandaj Diospajlla altarta chai rumicunahuan allichishpaca, chai altar muyundijpica uchilla larcatami rurarca. Chai larcaca, ishqui arroba granota apaipaj shinami carca.

³³ Yantata chai altar jahuapi churashpaca huagrata mirga mirgata rurashpami chai yanta jahuapi churarca.

³⁴ Eliasca: –Chuscu puñucunapi yacuta jundachichij. Chai yacutaca tucui rupachingapaj yanta jahuapi churashca aichapi tallichij– nishpami mandarca. Ña shuj cutin tallijpica: –Ishqui cutinhuan chashna ruraichij– nishpa mandajpimi, ishqui cutinhuan chashnallataj rurarcacuna.

³⁵ Chashna tallijpica altar muyundijta yacu uriyashpami, chai larcapi jundarca.

³⁶ Diosman animalta cushpa tucui rupachina horas tucujpica, profeta Eliasca altarman c'uchuyashpami: “Abrahampaj, Isaacpaj, Israelpaj Mandaj Taita Dioslla, Israel llajtapica canlla Dios cashcata cunantaj ricuchiyari. Ñuca cambajta ruraj cashcatapish, can mandajpi caita ruracushcatapish ricuchiyari.

³⁷ Mandaj Dioslla, cai gentecunaca canca Mandaj Diostaj cashcata yachachun, can quiquin paicunapaj shunguta cambajman cutirichij cashcatapish yachachun ñuca mañashcata cutichiyari, cutichiyari” nircami.

³⁸ Chaipi Mandaj Diospaj nina shamushpaca Diosman cushpa tucui rupachina aichata, yantata, rumicunata, chai mirga ñutu allpatapishmi tucui chingarijta rupachirca. Altar muyundij yacutapish tucui chaquijtami rupachirca.

³⁹ Tucuicuna chaita ricushpaca pambaman tupajta cumurishpami: “¡Mandaj Diosmi Diostaj, Mandaj Diosmi Diostaj!” nircacuna.

⁴⁰ Chaipimi Eliasca: –¡Baalpaj profetacunataca shujllapish ama miticushpa richun tucuicunata japichij!– nijpi paicunataca japircacuna. Ña japijpica Eliasca, Cisón shuti yacu huaicuman apashpami, chai profetacunataca cungata p'itirca.

Tamyachichun Diosta Elías mañashcami

⁴¹ Chai q'uipami Eliasca Acabtaca: –Ñami achca tamya uyarimucun. Micugrilla ubyagrilla– nirca.

⁴² Shina nijpi Acabca micunaman ubyanaman huichiyarcallami. Eliasca Carmelo urcu puntaman huichiyashpami, pambaman tupajta cumurishpa cunguricuna jahuapi ñahuita churarca.

⁴³ Chaipimi paipajta rurajtaca: –Huichiyashpa mama cuchata ricugri– nijpi chai runa huichiyashpa ricushpaca: –Ima mana ricurinchu– nijpi Eliasca: –Canchis cutincama cutin cutin ricumugri– nishpa mandarca.

⁴⁴ Ña canchis cutin ricushpa tigrashpaca Eliaspajta rurajca: –Mama cucha chaupimanta maqui shungu valilla p'uyu huichiyamucujtami ricumuni– nijpimi Eliasca paipajta rurajtaca: –Acabpajman rishpa: Amaraj tamya shamushpa jarcajpi cambaj carrota caballoman aisachishpa, huasiman utca tigrai nigri– nirca.

⁴⁵ Chaimi Acabca, paipaj carropi huichiyashcahuan, Jezreel puebloman tigrarca. Chaiman tigracujpimi, yana p'uyuta huaira apamujpica, punlla amsayashpa yallitaj tamyarca.

⁴⁶ Mandaj Diospaj maquica Eliaspaj jahuapimi carca. Chaimi paica alli chumbillirishcahuan rishpaca Jezreel pueblomanca Acab manaraj chayajpi chayarca.