1 REYES 17 - Dios Rimashca Shimicunami

Israel llajtapi mana tamyanata Elías huillashcami

¹ Galaadpi causajcunapuramanta tisbita Eliasca jatun mandaj Acabtaca: “Israelcunata Mandaj Taita Diosca causajmi. Ñucaca paipajtami rurani. Ñuca cutin tamyachun ningacama cai huatacunapica manataj tamyangachu, shullallapish manataj tiyangachu” nircami.

² Mandaj Diosca, Eliastaca:

³ “Caimanta rishpa inti llujshin ladoman tigrarishpa, Jordán ch'imbapurapi caj Querit yacu huaicupi miticugri.

⁴ Chai yacuta ubyangui. Chaipi canman micunata carachunpish cuervo pajarocunatami mandarcani” nircami.

⁵ Eliasca, Mandaj Dios nishca shinallataj miticushpa rishpaca, Jordán ch'imbapurapi caj Querit yacu c'uchupimi causarca.

⁶ Elías chaipi cajpimi, cuervocunaca tutamantapish, chishipish tandata, aichata apamujcuna carca. Yacutaca chai yacu huaicumantami ubyaj carca.

⁷ Chai llajtata asha punllacunata ña manataj tamyajpimi, chai huaicu yacupish chaquirirca.

Eliaspish, Sarepta llajtamanta viuda huarmipish

⁸ Mandaj Diosca Eliastaca:

⁹ “Jatari, Sidonpi caj Sarepta puebloman rishpa chaipi causagri. Chaipi causaj shuj viuda huarmitami canman micunata carachun ña mandarcani” nircami.

¹⁰ Shina nijpi Eliasca jatarishcahuanmi Sarepta puebloman rirca. Chai pueblo punguman ña chayashpaca, shuj viuda huarmi yantata tandacujta ricushpa, chai huarmita cayashpami paica: –Ñuca ubyangapaj shuj vasopi asha yacuta convidahuai– nirca.

¹¹ Yacuta apanaman chai huarmi ña rigrijpimi, Eliasca: –Asha tandatapish apamupangui– nirca.

¹² Chaimi chai huarmica: –Mandaj cambaj Diosca causajmi. Tanda cusashcataca mana charinichu. Shuj lutsai valilla cutallatami p'undupi charini. Aceitetapish ashallatami shuj mangapi charini. Chaicunahuan ñucapajpish, ñuca churipajpish tandata ruranaman yaicuringapajmi, cunanca cai ishquijlla yantata tandacuni. Chai tandata micushpaca huañushunllami– nircami.

¹³ Shina nijpi Eliasca: –Ama manchaichu. Can nishca shinallataj ruragrilla. Chai cutataca, ñucapajraj shuj uchilla tortillata rurashpa tullpapi cusashpa apamugri. Chai q'uipaca cambajpish, cambaj churipajpish ruranguillami.

¹⁴ Israelcunata Mandaj Taita Diosca: Cai pachapi pai tamyachingacama p'undupi tiyaj cutapish, mangapi tiyaj aceitepish mana ucuyangachu ninmi– nircami.

¹⁵ Viuda rishpaca Elías nishca shinallatajmi rurarca. Chaimi Eliaspish, viudapish, paipaj huasi familiapish achca punllacunata micurcacuna.

¹⁶ Mandaj Dios Eliasta huillachishca shinallataj chai p'undupi tiyaj cutapish, mangapi tiyaj aceitepish mana ucuyarcachu.

¹⁷ Tucui chaicuna q'uipami, chai huasiyuj huarmipaj churica ungushpa, yallitaj anchayashpa huañurca.

¹⁸ Chaimi chai huarmica Eliastaca: –Diospaj runa, ¿ñuca canta imata rurashca cajpitaj llaquichingui? Ñuca juchacunata ñucaman yuyachishpa, ñuca churita huañuchingapajllamari shamushcangui– nircami.

¹⁹ Shina nijpimi Eliasca: –Cambaj churita caiman apamui– nijpi, chai huarmica paipaj churita marcashpa Elías tiyacun jahua ucuman apashpa, Eliaspaj camapi churarca.

²⁰ Chaipimi Eliasca Mandaj Diostaca: “Ñucata Mandaj Taita Dioslla, cai viuda huarmipaj huasipi ñuca pozashpa tiyacushca jahuachu paipaj churita huañuchishpa jatunta llaquichingui” nishpami caparishpa mañarca.

²¹ Shina nishpaca Eliasca huambrapaj jahuapi quimsa cutin siririshpami, Mandaj Diostaca: “Mandaj ñuca Taita Dioslla, cai huambrapaj almata paillamantaj tigrachi” nishpa caparishpa mañarca.

²² Elías mañashcata Mandaj Dios uyashpa chai huambraman almata tigrachijpimi paica causarirca.

²³ Eliasca, pai tiyana jahua ucumanta chai huambrata marcashcahuan mama tiyacun ucuman uriyashpami: –¡Riqui, cambaj churica causajmari!– nishpa, paiman curca.

²⁴ Chaimi chai huarmica Eliastaca: –Cunantajca cantaca, Diospaj runataj cashcata yachanimi. Cantaca Mandaj Diostajmi rimachicun– nircami.