1 REYES 15 - Dios Rimashca Shimicunami

Judá llajtata Abiam mandashcami

¹ Nabatpaj churi jatun mandaj Jeroboam chunga pusaj huatata israelcunata ña mandacujpimi, Abiamca, Judá llajtata mandai callarirca.

² Abiamca Jerusalenpimi quimsa huatata mandarca. Paipaj mamaca Abisalompaj ushushi, Maaca shutimi carca.

³ Abiamca, paipaj yaya juchacunata rurashca shinallatajmi, juchacunata rurashpa purirca. Paica mana paipaj ñaupa yaya David shina, Mandaj Diostaca tucui shunguhuan cazurcachu.

⁴ Shina cajpipish Mandaj Taita Diosca, Davidta c'uyashcamantami lámpara nina mana huañuj shina tiyachun, paipaj huahua huahuacunataca huashan huashan Jerusalenpi mandachun saquirca. Chashnami Jerusalentaca chingarichun mana saquirca.

⁵ Davidca Mandaj Diospaj ñaupajpi paipaj ñanmanta mana anchurishpa pai mandashcacunata tucuita pajtachishpami, paipaj tucui causaipi maiman mana anchurishpa causarca. Davidca heteo Urías runata huañuchishpallami Taita Diostaca p'iñachirca.

⁶ Roboamhuan, Jeroboamhuanca tucui paicunapaj causaipimi, macanacucujlla carca.

⁷ Abiamhuan, Jeroboamhuanca macanacucujllami carca. Abiam ashtahuan imalla rurashcata, pai tucui imalla rurashcata ashtahuan yachasha nishpaca, Judá llajtata jatun mandajcuna imalla rurashcata quillcashca libropimi ricuna.

⁸ Abiam paipaj ñaupa yayacunahuan dormijpica, Davidpaj pueblopimi pambarcacuna. Abiampaj randica paipaj churi Asami mandarca.

Judá llajtata Asa mandashcami

⁹ Jeroboam israelcunata ishqui chunga huatata ña mandacujpimi, Asa shuti jatun mandajca, Judá llajtata mandai callarirca.

¹⁰ Asaca Jerusalenpimi chuscu chunga huatata mandarca. Paipaj mamaca, Abisalompaj ushushi Maaca shutimi carca.

¹¹ Asaca paipaj ñaupa yaya David shinallatajmi, Mandaj Diospaj ñaupajpica maiman mana anchurishpa causarca.

¹² Asaca chai llajtamantaca sodomitacuna shina c'aripurallataj siririjcunata, paipaj ñaupa yayacunapaj rurashcalla dioscunatapish tucuitami anchuchirca.

¹³ Paipaj yayapaj mama Maaca shutitapish Asera huarmi diosta rurachishcamantami paitaca mandaj canamanta anchuchirca. Asaca paipaj mamapaj manapish dios cajtaca anchuchishpami Cedrón huaicupi rupachirca.

¹⁴ Ashtahuanpish lomacunapi tiyaj altarcunataca mana anchuchircachu. Shina cashpapish Asaca paipaj tucui causaipimi Mandaj Diosman curishca causarca.

¹⁵ Asaca paipaj yaya caitaca Mandaj Diosmanmi cuni nishcacunatapish, Mandaj Diosman pai cuna tucushcacunatapish: Curita, cullquita, shujtaj sumajcunatapishmi Mandaj Diospaj huasipi churarca.

Asahuan Ben-adadhuan shuj yuyailla tucushcami

¹⁶ Judata jatun mandaj Asahuan, Israel llajtata jatun mandaj Baasahuanca tucui causaipimi macanacucurcallacuna.

¹⁷ Baasaca Judá llajtapi causajcunahuan macanacungapaj huichiyashpaca, Judá llajtata jatun mandaj Asapajman pi ama llujshi tucuchun, pi ama yaicui tucuchunmi Ramá pueblo muyundijpica jatun pircata shayachirca.

¹⁸ Chaimi jatun mandaj Asaca, Mandaj Diospaj huasipipish, mandana huasipipish huaquichinacunapi saquirishca cullquita, curita japishpa paipajta rurajcunaman cushpa, Siria llajtata jatun mandaj Ben-adadman cuchun cacharca. Paipaj yayaca, Tabrimón shutimi carca. Tabrimonpaj yayaca, Hezión shutimi carca. Ben-adan Damascopi causacujpimi jatun mandaj Asaca:

¹⁹ “Cambaj yayahuan ñuca yayahuan shuj shinalla cashca shinallataj canpish ñucapish shuj yuyailla tucushun. Chaipajmi cullquita, curita cambajman cachani. Israel llajtata jatun mandaj Baasahuan ari ninacushcataca p'aquilla. Chaipica ñucata llaquichinataca saquingallami” nichunmi cacharca.

²⁰ Ben-adadca, jatun mandaj Asa imalla nishcata allimi nishpami, israelcuna causan pueblocunata llaquichigrichun paipaj soldadocunata mandajcunata cacharca. Paicunami israelcunataca Ijonta, Danta, Abel-bet-maacata, tucui Cineret llajtata, Neftalipaj tucui llajtacunatapish quichurcacuna.

²¹ Chaita uyashpami, Baasaca Ramá pueblopi jatun pircata ruracushcata saquishpa Tirsa pueblopi causagrirca.

²² Chaimi jatun mandaj Asaca, Judá llajtapi causajcunataca shujllatapish mana saquishpa tucuicunata tandachishpa, Ramapi Baasa pircachicushca rumicunata, caspicunata chaimanta apashpa chaicunahuanca Benjamín llajtapi caj Geba pueblo muyundijpipish, Mizpa pueblo muyundijpipish jatun pircacunata rurachirca.

Asa huañushcami

²³ Asa ashtahuan imalla rurashcata, pai c'ari c'ari cashcata, maijanlla pueblocunata rurashcata ashtahuan yachasha nishpaca, Judá llajtata jatun mandajcuna imalla rurashcata quillcashca libropimi ricuna. Asaca ña yuyaj cashpaca chaquicunami ungüi tucurca.

²⁴ Asa paipaj ñaupa yayacunahuan dormijpica, Davidpaj pueblopimi paipaj ñaupa yayacunallahuantaj churarca. Paipaj randica paipaj churi Josafatmi mandaj tucurca.

Israel llajtata Nadab mandashcami

²⁵ Jatun mandaj Asa Judá llajtata ña ishqui huatata mandacujpimi, Jeroboampaj churi Nadabca Israel llajtata mandai callarirca. Nadabca, israelcunataca ishqui huatatami mandarca.

²⁶ Nadabca Mandaj Diospaj ñaupajpica paipaj yaya millaita rurashpa purishca ñancunallapitaj purishpami, israelcunataca paipaj yaya juchallichishca shinallataj juchallichirca.

²⁷ Isacarpaj aillupuramanta Ahiaspaj churi Baasami Nadabta llaquichingapaj jatarishpa filisteocunapaj llajtapi caj Gibetón pueblopi chugrichishpa huañuchirca. Nadab tucui israelcunandij Gibetón pueblota muyunchishca cajpimi, Baasaca c'ariyashpa Nadabtaca chashna huañuchirca.

²⁸ Nadabtaca, Judá llajtata Asa quimsa huatata mandacui huatami Baasaca huañuchirca. Paita huañuchishpaca, paillatajmi Nadabpaj randi mandarca.

²⁹ Baasa mandai callarishpaca, Mandaj Dios Silo pueblopi paipajta ruraj Ahiasman huillachishca shinallatajmi Jeroboampaj familiataca tucuita chingachingacama tucuita huañuchirca.

³⁰ Jeroboamca juchallishpami, israelcunatapish pai juchallishca shinallataj juchallichishpa israelcunata Mandaj Diostaca yallitaj p'iñarichirca. Chaimantami paicunataca chashna huañuchichirca.

³¹ Nadab ashtahuan imalla rurashcata tucui imallata rurashcata ashtahuan yachasha nishpaca, israelcunata jatun mandajcuna imallata rurashcata quillcashca libropimi ricuna.

³² Asahuan, israelcunata jatun mandaj Baasahuanca tucui paicunapaj causaipimi macanacucujlla carca.

Israel llajtata Baasa mandashcami

³³ Ña quimsa huatata Judá llajtata Asa mandacujpimi, Ahiaspaj churi Baasaca Israel llajtata mandai callarirca. Paica ishqui chunga chuscu huatatami, Tirsa pueblopi mandarca.

³⁴ Baasaca Jeroboam mana alli ñanpi purishpa israelcunata juchallichishca shinallatajmi mana alli ñanpi purishpa paipish Mandaj Diospaj ñaupajpica mana allita rurarca.