1 REYES 13 - Dios Rimashca Shimicunami

Diosca paipaj runata Jeroboamta cunachun cachashcami

¹ Bet-elpi caj altar c'uchupi inciensota rupachingapaj Jeroboam shayacujpimi, Mandaj Dios cachashca paipaj runa Judamanta chayamurca.

² Paica Mandaj Diosllataj mandajpimi, chai altarta p'iñashpa cashna nishpa sinchita caparirca: “Altar, altar, Mandaj Diosca cashnami nin: Davidpaj huasi ucupuramantami Josías shuti huahua huacharinga. Paimi lomacunapi tiyaj altarcunapi inciensota rupachij curacunataca cambaj jahuallapitaj sacrificanga. Runacunapaj tullucunatapish cambaj jahuallapitajmi rupachingacuna ninmi” nircami.

³ Chai punllallatajmi, chai huillaj runaca pai huillacushca chashnataj tucuna cashcata ricuchingapajca: “Mandaj Diostaj rimashcata yachachunca cashnami ricuchigrini: Cai altarca p'aquirigrinmi. Chai jahuapi caj ushpapish, jicharigrinmi” nircami.

⁴ Jatun mandaj Jeroboamca Taita Diospaj runa Bet-elpi caj altarta p'iñashpa caparishcata uyashpami, chai altarmanta maquita chutashpaca: “¡Chai runata japichij!” nirca. Chutashca maquica chaquishca saquirijpimi, ña mana tandai tucurca.

⁵ Diospaj runa Mandaj Dios huillachijpi nishca shinallatajmi chai altar p'aquirijpi, altarpi caj ushpapish jicharirca.

⁶ Chashna tucujpimi jatun mandajca, Taita Diospaj runataca: –Ñuca maqui alli tucuchun canta Mandaj Taita Diosta ñucamanta rogashpa mañai– nijpi Diospaj runa, Mandaj Diosta mañajpica, jatun mandajpaj maquica ñaupa shinallataj alli saquirircallami.

⁷ Jatun mandajca Taita Diospaj runataca: –Jacu ñucahuan ñuca huasipi micungui, convidanatapish convidashami– nircami.

⁸ Ashtahuanpish Taita Diospaj runaca, jatun mandajtaca: –Cambaj huasipi tiyajcunata chaupita ñucaman cuna cajpipish, canhuanca manataj rishachu. Cai llajtapica manataj micushachu, yacutapish manataj ubyashachu.

⁹ Mandaj Diosmi ñucataca: Chai llajtapica ama micungui, yacullatapish ama ubyangui. Can rishca ñanllatatajpish ama tigrangui nishpa mandashpa cacharca– nircami.

¹⁰ Taita Diospaj runaca, Bet-elman maita shamushca ñanllatatajca mana tigrashpa shujtaj ñantami tigrarca.

¹¹ Chai punllacunapica, shuj yuyaj profetami Bet-elpi causacurca. Chai runapaj churimi paimanca, Diospaj runa Judamanta shamushpa, Bet-elpi chai punlla imallata rurashcata huillarca. Jatun mandajman imallata nishcatapishmi huillarca.

¹² Chaimi paipaj yayaca: –¿Maijan ñantataj rirca?– nijpi paipaj churicunaca, Judamanta shamushca Taita Diospaj runa mai ñanta tigrashcata ricuchircacuna.

¹³ Chai runaca paipaj churicunataca: –Burrota parejaichij– nijpimi, churicunaca burrota parejarcacuna. Chaimi paica burropi tiyarishpa,

¹⁴ Taita Diospaj runata catishpa rishpaca, shuj encina yura ucupi tiyacujta japishpaca: –¿Canchu Judamanta shamuj Taita Diospaj runa cangui? nijpi Taita Diospaj runaca: –Ari chaimi cani– nirca.

¹⁵ Chaimi: –Jacu ñucahuan, ñuca huasipi micungui– nirca.

¹⁶ Ashtahuanpish Taita Diospaj runaca: –Canhuanca mana tigrai tucunichu. Manataj ri tucunichu. Cai llajtapica canhuanca micunatapish mana micushachu, yacutapish mana ubyashachu.

¹⁷ Taita Diosca ñucataca: Chai llajtapica ama micunguichu, yacutapish ama ubyanguichu. Can maita rishca ñanllatatajpish ama tigranguichu nircami– nircami.

¹⁸ Chaimi chai runaca: –Ñucapish can shinallataj, profetami cani. Mandaj Dios cachashca shuj angelmi ñucataca: Chai runataca cambaj huasiman pushashpa micunatapish carai, yacutapish ubyachi nirca– nishpami llullarca.

¹⁹ Shina nijpica chai yuyaj runahuan tigrashpami, paipaj huasipi micunatapish micurca, yacutapish ubyarca.

²⁰ Mezapi paicuna micushpa tiyacujpimi, Mandaj Diosca chai tigrachimuj profeta runaman rimajpi,

²¹ profeta runaca Judamanta shamuj Taita Diospaj runataca caparishpa: –Mandaj Diosca cashnami nin: Mandaj Dios mandashcataca mana cazushcanguichu. Canta Mandaj Taita Dios quillcachishpa mandashcataca mana huaquichishcanguichu.

²² Ashtahuanpish Mandaj Dios ama tigrangui chaipica ama micungui, yacutapish ama ubyangui nishpa mandashca llajtamanmi tigrashpa micushcangui, yacutapish ubyashcangui. Chaimanta cambaj aichaca, cambaj ñaupa yayacunata churashcamanca mana ringachu ninmi– nircami.

²³ Diospaj runa ña tucui micujpi, ubyajpica, chai runata tigrachimuj runaca burrotami parejarca.

²⁴ Chai burropi Taita Diospaj runa tiyarishpa ricujpica, ñanpi shuj león tupashpami paitaca huañuchirca. Paipaj aichaca ñanpimi siricurca. Burropish leonpish huañushca cuerpo c'uchupimi shayacurcacuna.

²⁵ Chaita ricuj runacunaca huañushca ñanpi siricujta, leonpish chai huañushca c'uchupi cajta ricushpami, yuyaj profeta maipi causan puebloman shamushpa huillarcacuna.

²⁶ Taita Diospaj runata ñanmanta tigrachishpa pushaj profeta uyashpaca: “Taita Diospaj runa Mandaj Dios mandashcata mana cazushpa tigrashcamantamari Mandaj Diosca paitaca pai nishca shinallataj leonman cujpi cashtushpa huañuchishca canga” nircami.

²⁷ Chashna nishpaca paipaj churicunata: “Shuj burrota parejaichij” nijpimi, paicunaca burrota parejarcacuna.

²⁸ Pai rishpaca huañushca cuerpotaca ñanpi siricujta, burropish leonpish chai huañushcapaj c'uchupi shayacujtami japirca. Leonca huañushcataca mana micushcachu carca. Burrotapish imata mana rurashcachu carca.

²⁹ Profeta runaca Taita Diospaj runa huañushcataca burropi churashpami aparca. Yuyaj profetaca yupashpa yupashpa huacashpa pambangapajmi pai causacun puebloman apamurca.

³⁰ Paita churana cashca paipaj jutcupi paita churashpami: “Aij, ñuca huauquilla” nishpa yupashpa yupashpa huacarca.

³¹ Ña chai jutcupi churashpami paipaj churicunataca: –Ñuca tullucunapish Diospaj runapaj tullucuna tiyacun c'uchullapitaj cachun ñuca huañujpica cai jutcullapitaj churanguichij.

³² Mandaj Dios rimachijpi Bet-elpi caj altartapish p'iñashpa, Samaria llajtapi caj pueblocunapi tiyaj lomacunapi rurashca huasicunatapish p'iñashpa, pai caparishpa rimashcaca chashnatajmi tucunga– nircami.

³³ Chashna tucuna cashcata yachashpapish Jeroboamca pai millaita ruracushca ñanmantaca mana anchurircachu. Ashtahuanpish israelcunataca lomacunapi rurashca altarcunapi curacuna cachun churashpa catircallami. Chai lomacunapi tiyaj altarcunapi curacuna cachunca maijanpish chai munaita charijcunataca pitapish churarcallami.

³⁴ Jeroboam juchata rurashcamantaca paipaj huahua huahuacunapish chashnallatajmi juchallircacuna. Chaimi cai pachamantaca paipaj huahua huahuacunataca sapimanta llujshichij shina chingachirca.